2 Kronikas 36 - DAWAN BÎLA AISKA

Joacaz kingka lâka ba

¹ Tawan uplika nani ba Joacaz, Josías luhpia ba brih Jerusalem ra king mangkan ai aisika watlika ra.

² Joacaz ba king aimakan piua ra 23 mani bri kan, bara Jerusalem ra kati yumhpa king aimakan.

³ Idsip king mita ai kraunka dakban Jerusalem ra, bara tawan mawanra lal mana aibapaia lâka mangkan 3,300 kilo ba silbar bara 33 kilo ba lika gul nani.

⁴ Baha purkara Idsip kingka bui Juda bara Jerusalem wal ra Joacaz muihnika Eliaquim ba king mangkan, nina sin wala raya mangkan, Joaquim, bara Joacaz lika Idsip ra brih wan.

Joaquim kingka lâka ba

⁵ Joaquim ba king aimakan yua ra 25 mani bri kan, bara Jerusalem ra 11 mani king aimakan. Sakuna ai daukanka nani ba saura kan Dawan nakra ra.

⁶ Nabucodonosor, Babilon kingka ba, witin mapara balan, bara bras sînka nani wal wilki, Babilon ra brih wan.

⁷ Nabucodonosor tempel dukia holi kan ba wina bakriki prais brih wan, bara Babilon tempelka ra mangkan.

⁸ Joaquim sturka wala nani ba, ai warkka saura aidul lâka nani daukan ba, dîa wala daukan nani sut ba, Israel bara Juda kingka nani wauhkataya ra ulban sa. Bara ai watlika ra ai luhpia Joaquín king aimakan.

Joaquín Babilon ra alki brih wan

⁹ Joaquín ba mani 18 bri kan king aimakan, bara Jerusalem ra kati yumhpa pura yu matawalsip king aimakan. Witin daukanka nani ba Dawan nakra ra saura pali kan.

¹⁰ Bara mani tara bal diman ba piua ra, king Nabucodonosor mita adar yaban Babilon ra brih wabia, Dawan tempelka ra diara nani yus muni dukia nani kau manakira nani ba wal, bara Sedequías ba Juda bara Jerusalem kingka mangkan, witin Joaquín taika kan ba.

Sedequías king aimakan ba

¹¹ Sedequías ba 21 mani bri kan king aimakan, bara Jerusalem ra 11 mani king aimakan.

¹² Sakuna ai daukanka nani ba Dawan nakra ra saura kan. Prapit Jirimaya ra bawras kan, Dawan bui witin bâk aisi kan ba.

¹³ Baku sin king Nabucodonosor mapara sin buan, kan witin ra yaban Dawan nina ra swer takan wal ai uplika kaia, bara witin sin ai lukanka karna brin Dawan ra tawaia apia, Israel Gâdka ra.

¹⁴ Juda tâ uplika nani sin, prîs nani bara tawan uplika nani sut sin, Dawan wina laihura takan, aidul ra mayunan nisan wala nani baku, Dawan tempelka kulkras kan, baha witin wahbi sakan kan ba Jerusalem ra ai pliska holikira baku.

¹⁵ Dawan, ai almukka nani Gâdka ba, piu manis ra maisa paki bliki kan ai sturka twilki uplika nani ba wal, kan witin ai tawanka ra latwan kaiki kan, baha pliska witin nani ai iwaika kan ba.

¹⁶ Sakuna Gâd blikan uplika nani ra lawaska kikan, maisa papakra nani ra sin kulkras kan, prapit nani ra lawaska kikan, Dawan kupia baiwanka balan kat ai uplika nani mapara, bara diara wala daukaia âpu kan.

Tempel sauhkan bara Juda tasba wala ra brih wan ba

¹⁷ Bara Dawan ba witin nani mapara Caldea kingka ba blikan, bara wahma nani sut skiru wal ikan tempel bîla kat. Wahma nani ra umpira kaikras, mairin nani ra sin, almuk nani, skahwa nani ra sin kulkras kan, baha nani sut ba Dawan bui ai mihta ra mangkan kan.

¹⁸ Gâd tempelka ra diara nani bâra kan ba, tara, sirpi bara diara manakira nani sut brih wan, king prapatika bara ai uplika nani yuyaka sin sut, Caldea kingka ba bui Babilon ra brih wan.

¹⁹ Baha purkara Gâd tempelka ba angkan, Jerusalem kutbanka nani kan ba slingban, king watla nani ra sin pauta angkan, bara diara manakira nani kan ba sut sauhki tikan.

²⁰ Baha ningkara raya kau nani ba Babilon ra alki brih wan, bahara ai albika daukan, witin ai luhpia nani albika sin, Persia uplika nani ai karnika brin ba kat,

²¹ baha ba Dawan dîa win ba aimakaia dukiara, ai dahra aisasarika Jirimaya bâk win kata. Baku tawan ba ris kum briaia kata, kan sauhki tikanka lâka ra kan piua ra ris manis brin, 70 mani luan ba kat.

Ciro ulbi sakan ba

²² Ciro king aimakan pas mani alkan ba ra, Persia kingka ba, Dawan bîla Jirimaya aisinka ba aimakbia dukiara, Dawan ba Ciro ra tâ baikan, king tasbaya aiska ra ulbi lakaia naha lâka nani ba:

²³ “Ciro, Persia kingka, naku lâ mangkisa: Dawan ba, kasbrika purara nani Gâdka ba, yang mihti ra mangkan sa tasba ra king nani ba sut, bara sin ai win sa ai tempelka kum Jerusalem ra paskaia, baha lika Juda tasbaya pîska ra. Baku bamna, man nani tilamra Dawan uplika sma kaka, bahara was bara Dawan Gâdkam bui hilp mai munbia.”