2 Kronikas 35 - DAWAN BÎLA AISKA

Josías Insal luan Yua Liliaka daukisa

¹ Josías Insal luan Yua Liliaka ba daukan Jerusalem ra, Dawan yua tara ba kulkanka dukiara: mani aiska bilara kati pas yua 14 ra, sîp ba sakripais daukan liliaka ba dukiara.

² Prîs nani ba ai warkka pliska kat mangkan, bara maisa nihki win Dawan tempelka ra wark daukaia.

³ Baha purkara sin Libait nani ra win, witin nani ba Israel luhpia nani sut smasmalkrika nani sa, bara ai wîna ba Dawan ra holi sa, bara naha lâka nani yan: “Lâ auhbaia watla ba ark holikira Salaman, Debit luhpia Israel kingka paskan ba ra bri si, tempel ra swis. Nanara wina lâ auhbaia watla ba kli man nani pamhpaya ra twilkma apia. Nanara mahka Dawan Gâdkam dukia dauki banhs, bara sin Israel ra, kan Dawan uplika nani sa bamna.

⁴ Kiamka nani bani asla taks bara wark takaia, nahki Debit Israel kingka ulbi swin ba baku, ai luhpia Salaman sin.

⁵ Libait nani daknika kum takaski banhs plis holikira ra, kiamka asla takanka kumi bani wina bara Israel kiamka nani wala nani baku kulkanka briaia, kan muihkam nani sa bamna.

⁶ Insal luan Yua Liliaka sîpka ba sakripais dauks bara man nani klin taks, bara ridi taki banhs, bara muihkam nani daukbia dîa Dawan win ba kat, Moses bâk lâ mangkan ba daukbia.”

⁷ Ningkara Josías ai daiwra nani wina, tawan uplika nani sut Insal luan Yua Liliaka daukaia wisi bahara banhwi ba ra yaban: sîp bara guts nani, sut ba ra, 30,000 lal nani yan, baku sin bîp bul wainhka 3,000 lal nani yan.

⁸ King warkka tatakra nani sin, ai kupia kumi lâka ra Dawan ra prisant yan upla nani ra, prîs nani bara Libait nani ra. Bara sin Hilquías, Sakaraya bara Jehiel, witin nani ba Dawan tempelka ra hilp muni kan ba, prîs nani ra yan 2,600 daiwan nani, Insal luan Yua Liliaka daukaia, baku sin 3,000 bîp wainhka nani;

⁹ bara Conanías, ai pânika nani Semaías bara Natanael, baku sin Hasabías, Jehiel bara Jozabad, Libait nani tâ uplika nani ba, baha nani ra 5,000 daiwan nani yan, bîp wainhka sin 500 yan, Insal luan Yua Liliaka daukaia.

¹⁰ Liliaka daukaia piua balan ba ra, prîs nani ai pliska ba brin, bara Libait nani ba asla takan ai piua mangkan ba kat, dîa king adar lakan ba kat.

¹¹ Baku ba ra daiwan nani ba sakripais daukan, Insal luan Yua Liliaka ba dukiara, bara Libait nani ba nana dakbi kan, prîs nani lika tâlia nani ba wal altar ra srikbi kan Libait nani bui laki yabi kan ba wal.

¹² Baha ningkara batanka nani sakaia kata ba sakan angkaia dukiara, kiamka bani tawan ra asla takan ba tânka kat, Dawan ra sakripais daukan Moses wauhkataya ra ulban ba baku; bara bîp wainhka nani ba wal sim baku daukan.

¹³ Baha ningkara daiwan nani ba angkan, Insal luan Yua Liliaka ba dukiara, dîa ulban tânka ba kat; bara prisant wala nani, holikira kulkan ba dikwa ra mangki piakan, brit angkaia pânka nani ra sin, bara aihni pali upla nani tilara yan.

¹⁴ Baha ningkara Libait nani ai warkka kat dîa daukaia kan ba daukan, bara prîs nani ba sin, kan Eran kiamka prîska nani ba yu aiska sakripais dauki kan, batanka nani ba sin angkan. Baha mita Libait nani dîa daukaia kan ba daukan bara sin prîs nani Eran kiamka ba.

¹⁵ Asaf kiamka aiwawanra nani ba, baha nani sin ai pliska ra banhwi kan, Debit lâ mangkan ba kat, baku sin Asaf, Hemán bara Jedutún, diara kakaira ba, king warkka uplika ba. Dur kaina suni nani ba ai durka bani ra kan, kumi sin ai pliska swih waras kata, kan witin nani wark daukaia kan ba Libait nani daukan, kumi bani sakripaiska ba.

¹⁶ Baku asla taki banhwan Dawan warkka daukaia, bara Insal luan Yua Liliaka dukiara sakripais nani yaia Dawan altarka purara, nahki king Josías win ba kat.

¹⁷ Israel luhpia nani baha piua ra bâra kan ba Insal luan Yua Liliaka daukan bara 7 yua ba sin bara brit nani îs âpu sin pin.

¹⁸ Israel ra naha Insal luan Yua Liliaka sâtka kumi sin daukras kan, prapit Samuil piua ba wina; Israel ra king kumi daukras kan, Josías daukan ba baku prîs nani wal, Libait nani, Juda bara Israel luhpia nani wal, baku sin, Jerusalem uplika nani wal.

¹⁹ Baha Insal luan Yua Liliaka ba Josías 18 mani king aimakan ba piua ra daukata.

Josías pruan ba

²⁰ Baha ningkara, Josías tempel ba pat paskan kan taim, Necao, Idsip kingka ba, Éufrates awalka ra auya kan Carquemis mapara war daukaia. Bara Josías ai mapara bal takan;

²¹ sakuna Necao ai bîla bliki win: “Juda kingka, man kupia kumi ai swis. Nanara yang lika man mampara balras, nisan wala wal aiklabaia aulna maipara ba. Dawan bui ai blikan isti munamna; baku bamna, yamnikam dukiara, Dawan mapara bupara, kan witin ba yang wal sa, baku ba ra mai sauhki tikbia apia.”

²² Sakuna Josías ai ninara tawras, ban mapara aiklabaia lukan, Necao bîla walras kan naha na Dawan bui blikan balan ba. Baku bamna mahka war aiklaban Meguido langnika ra,

²³ bara trisba lalulkra nani lulkan ba king Josías ra diman, bara king ba war tâ uplika ra win: “¡Naha wina ai sâks, yang ai insauhkan, latwan pali brisni!”

²⁴ Ai war tâ uplika nani mita mahka wagin ra mangki brih wan, bara wagin wala ra sunan, ningkara Jerusalem ra brih wan ba ra, bahara pruan. Bara ai almukka nani raitika ra bikan. Juda bara Jerusalem aiska Josías pruan ba dukiara ini banhwan.

²⁵ Jirimaya lawana kum paskan witin pruanka ba dukiara kulkanka yabi, bara aiwawanra nani ra yan aiwanaia Josías raitika ra, bara naiwa kat lâwanka ba upla pruan lâwanka kulkisa, bara Israel ra kulkanka tara brisa, lawana wahbi sakan wauhkataya ra sa.

²⁶ Josías sturka nani bara diara kasak nani daukan sut ba, Dawan lâka wauhkataya ra ulban ba baku,

²⁷ bara witin daukanka nani tâ wina lâs ba kat, baha sut ba Israel bara Juda kingka nani wauhkataya ra ulban sa.