2 Kronikas 32 - DAWAN BÎLA AISKA

Senaquerib bui Juda pura luisa

¹ Naha diara nani dauki luan ba bara witin kasak lukan warkka marikan ba ningkara, Senaquerib, Asiria kingka ba wan, Juda mapara aiklabaia buan, bara tawan karnika kaina kutban nani aiska ba kutbi brin, witin mita pura lui briaia dukiara.

² Ezequías ba kaikan Senaquerib ba Jerusalem ra war daukaia wan,

³ bara witin tawan tâ uplika nani ra tânka plikan, suldiar nani ra sin, bara witin win lî kârma plapi ba prakaia tawan tnaya ra nani ba, bara upla sut âu takan.

⁴ Bara upla kwâra asla takan, bara lî kârma nani sut prakan, baku sin tasba munhtak lî plapi ba sut prakan, bara Asiria kingka nani balbia piua ra lî ailal âpu kabia dukiara.

⁵ Ezequías ai kupia ba bukan bara tawan kutbanka ba kli paskan, bara tawer nani sin kutbanka ba purara kli paskan bara lata tani ra sin kutbanka kum. Baha purkara, Debit Tawanka ra tasba yakabi daukan pliska ba kau karna daukan, bamna langsa nani bara kan kahbaika dukia nani ailal paskan.

⁶ Baha ningkara suldiar wihtka nani upla kainara war tâura aimakaia nani mangkan bara upla sut asla daukan, plis langni ra tawan dimaia durka lamara, bara witin nani ra tâ baiki karnika yabi aisin:

⁷ “¡Man nani karna bara kupiam sin karna bri bas! Man nani si bripara, lukankam swapni takbiara Asiria kingka mawanra bara suldiarka nani ailal pali ai yula kahbi ba mawanra, kan yawan kau upla ailal sa bamna.

⁸ Witin waitna nani karnika ba ra kulkisa, sakuna yawan lika Dawan wal sa, Gâd wan tâ baikisa war aiklabaia.” Tawan uplika Ezequías aisin ba walan ba ra, ai kupia karna takan.

⁹ Baha ningkara king Senaquerib Asiria wina ba, witin Laquis ra war dauki tauki kan, ai war uplika nani sut aikuki, bara Jerusalem ra war tâ bri uplika nani kum blikan wan, Juda kingka Ezequías, bara Jerusalem uplika aiska ra naha sturka maisa pakaia:

¹⁰ “Senaquerib, Asiria kingka ba, man nani ra ai bîla blikan sa: ‘¿Dîa dukiara ban karna damra walisma, bara Jerusalem ra takaskisma, kainam aiska pat kutban sakuna?

¹¹ Ezequías man nani ra mai wisa kaka Dawan Gâd bui swaki mai sâkbia yang mihti wina, witin kunin mai munisa; bara man nani naika plun bla bara diran bla prui banhma.

¹² ¿Ezequías pura sunaia pliska nani sut prakan apia ki, altar nani ba bara sin adar yaban Juda bara Jerusalem uplika sut, sakripais daukan sîka mâka wal altar kum ra?

¹³ ¿Kaikras banhwisma ki yang almukki nani wal, baku sin tawan wala nani aikuki daukri ba? ¿Sip kan ki ai gâdka mita pri lâka yaia, yang karniki ba wina sin?

¹⁴ ¿Naha gâd nani wina, ani pali ba sip kabia ai nisanka nani swaki sakaia yang karniki wina, witin nani bui yang almukki nani sauhki tikan ba? ¿Dîa kan luki banhwisma man nani Gâdkam mita swaki mai sâkbia?

¹⁵ Baku bamna, Ezequías mita yarka kunin mai munbiara, bîla sin walpara, kan baha gâdka nani kumi sin nisan nani swaki sakras, bara ai tawanka nani sin, yang karniki wina bara almukki nani karnika wina sin, ¡kau pali sip apia kabia, man nani Gâdkam mita yang karniki wina swaki mai sakaia!’ ”

¹⁶ Asiria uplika suldiar nani wihtka nani ba mita kau pura praki Dawan Gâd mapara aisin, bara ai albika mapara sin.

¹⁷ Baha purkara, Senaquerib wauhkataya ulban praut bîla nani Dawan Israel Gâdka mapara, bara baha lika naku ulban kata: “Kuntri wala tawanka gâdka nani bui karniki wina sin swaki takras kan ba baku, Ezequías Gâdka ba sin sip apia kabia yang karniki wina ai tawanka swaki sakaia.”

¹⁸ Senaquerib warkka tâ uplika nani mita Jerusalem uplika nani tawanka kutban bilara banhwi kan ba ra, ai bîla tara winan Hibru bîla ra, sirang ikaia dukiara, baha ningkara pura lui tawan ba briaia.

¹⁹ Jerusalem ra Gâdka dukiara aisin, tawan wala nani gâdka dukiara aisi kan, baha gâdka nani ba upla bui paskan.

²⁰ Baha trabilka takan ba ra, king Ezequías bara prapit Aiseya, Emus luhpia ba wal, Dawan kasbrika purara ba ra ai pura sunan.

²¹ Bara Dawan ba ai insalka blikan bara baha nani sut iki tikan, suldiar nani, kiaptin nani, kamandantika nani, Asiria kingka kiampka ra, bara witin kli ai tawanka ra wan, ai swira tara ba wal. Bara ai gâdka tempelka ra diman ba ra, silp ai luhpia nani mita ikan.

²² Baku natka ra, Dawan bui Ezequías swaki sakan, Jerusalem uplika nani sin swaki sakan Asiria kingka Senaquerib karnika wina, wala nani karnika ba wina sin, bara ai lamara iwi uplika nani aikuki kupia kumi lâka dauki yan.

²³ Baku bamna, upla ailal ai prisantka nani Jerusalem ra brih wan Dawan ra yabaia, diara mana tara dukia nani Ezequías, Juda kingka ra sin prisant yan. Baha piua wina witin ai nina ba tara kulkan nisan nani wala mawanra.

Ezequías ai sikniska wina rawan ba

²⁴ Baha piua ra Ezequías siknis saura pali takan; sakuna Dawan ra ai pura sunan, bara Dawan pana witin ra sain aihka kum natka ra aisin.

²⁵ Ban sakuna, Ezequías yamnika nani uya brin ba tingki lâka âpu, bara ai kulkanka ni aibanhwan kan, baha mita Dawan ba kasak ai kupia sauhkan witin ra, Juda ra bara Jerusalem uplika nani ra sin.

²⁶ Ban sakuna, Ezequías ba ai kulkanka ba tilara Dawan ra bawan, bara Jerusalem uplika nani sin baku daukan, bara Ezequías kau raya kan yua nani ra lika Dawan ai lawanka ba blikras kan witin nani purara.

Ezequías pâwanka

²⁷ Ezequías ba kasak yuya ailal pali brih lilia takan, pain kulkan lâka sin brin, silbar, gul, walpa manakira nani, isint sâtka nani, ai kan kahbaika nani, diara mana tara nani sâtka sut kuki brin.

²⁸ Diara auhbaika nani paskan, plun nani auhbaika, wain, batana laya nani laikaia watla bara daiwan yapaika pliska nani, sîp nani watla sin.

²⁹ Baha purkara tawan tara nani paskan, daiwan daknika wala nani sin, kan diara kukan ailal Gâd bui witin ra yan.

³⁰ Ezequías mita sika yaban Guihón ra lî kârma ba prakan, bara yaban mâya tani ra plapan Debit Tawanka muna tani ra. Baku bamna, diara sut Ezequías daukan ba yamni baman takan.

Babilon wina upla nani blikan ba Ezequías brisa

³¹ Baku takan kata Babilon ra sin, baha nani ai tâ uplika nani blikan wan ba piua ra, bara sin bal win kan nahki sain aihka tara kum takan ba baha tawanka ra. Bara Dawan bui Ezequías ra yakan swin, witin ai kupia mununhta ba kaikaia bara dîa luki ba sin kaikbia dukiara.

Ezequías pruanka

³² Ezequías sturka wala nani ba, ai yamnika daukan ba, Aiseya Emus luhpia wauhkataya ra sturka ba ulban sa, baku sin Juda bara Israel kingka nani wauhkataya ra.

³³ Ezequías ba pruan bara Debit taika raitika pura tani ra bikan. Juda bara Jerusalem uplika nani mita kulkanka tara yaban; bara witin ai watlika ra ai luhpia Manasés ba king aimakan.