2 Kronikas 3 - DAWAN BÎLA AISKA

Salaman tempel watla ba mâkisa

¹ Salaman Dawan watla ba mâkaia tâ krikan Jerusalem ra, Moria ilka ra, bahara sika Dawan ba Debit ra latan takan ba, witin ba Salaman aisika; Debit bui baha pliska ra ridi daukan Dawan watla ba mâkaia, wibia kaka Ornán Jebús uplika ba pliska kum kata, bahara plawar taya saki kan.

² Bahara watla ba mâkaia tâ krikan, lî wainhka kati lapta wâl, ai kingka lâka ba mani walhwal bri kan piua ra.

³ Tempel watla mâkaia playa nani Salaman bapan ba, yarika ba 90 pît bara twaknika ba 30 pît bri kan.

⁴ Watla ra dimaia durka ba 30 pît bri kata yarika ba, baha watla bîla yahpika wal baku, pura tani ra 180 pît, baha bîla aiska ba gul lalauban.

⁵ Bara watla bahamna dusa ba Chipre dusa wal paskan bara gul aihwa wal lalauban, bahara supa dusa wahia sâtka nani bara sîn nani wal purara bukan.

⁶ Watla ba sin walpa klauhira painkira wal lalauban, gul kau pain ba ni paskan

⁷ Baku bamna, watla bîla playka ba utla tâ baiki ba tnaya nani bara dur nani ba sut gul ni lalauban, bara kirubin lilka nani utla tnaya ba ra prakan.

⁸ Baku sin holikira pali Pliska ba daukan yarika ba 30 pît kata watla mawan ba, bara bîla ba 30 pît, bara gul kau pain ba 25 ton ni lalauban.

⁹ Bara sabaia sialaka kumi ba gul 20 auns ni paskan, bara pura rumka ba sin gul ni lalauban.

¹⁰ Bara bilara holikira Pliska ba ra upla wâl lilka paskan kirubin dusa nani wâl daukan, baha nani sin gul wal lalauban kan.

¹¹ Kirubinka nani tnawa yarika ba 20 pît bri kan, tnawa kumi yarika ba 5 bri kan bara utla kangbi kata; wala ba sin 5 pît bri kan. Tnawa kum ba kirubin wala tnawa kat kangbi kata.

¹² Baha sim natka ra, kirubin tnawa wala ba 5 pît bri kan, tnawa ba utla tnaya kat kangbi kata, bara wala ba lika 5 pît bri kan ba ra, kirubin wala tnawa tâ ba kat kangbi kata.

¹³ Naha kirubinka tnawa nani ba sakban ba ra 20 pît bri kata, ai mina ra bûi kan, ai mawan lika utla ba tani ra kata.

¹⁴ Pamaia kwalka ba pauni, balianta talia bara linin ni paskan; baha ni kirubin nani tnawa ba sin bukan kata.

Playka tara nani wâl ba

¹⁵ Watla ba mawanra playa tara wâl daukan, 35 pît bri kan ai pura tani ra, baha ba tempel tâ baikanka kata.

¹⁶ Baku sin, sîn nani paskan lilura baku, baha playka tara nani ba purara paman, bara bras ni dus mâ baku 100 paskan bara sîn nani ba ra paman.

¹⁷ Bara playka tara wâl tempel mawanra mangkan ba, kumi smihka ra bara wala aihkika ra. Mihta aihkika ra ba nina mâkan Jaquín, bara mihta smihka ra ba nina Bóaz mâkan.