2 Kronikas 29 - DAWAN BÎLA AISKA

Ezequías king aimakan ba

¹ Ezequías 25 mani bri kan ba ra king aimakan, bara witin 29 mani Jerusalem ra king aimaki kan. Ai yaptika nina ba Abí mâki kan, bara Sakaraya luhpia mairin kata.

² Ezequías daukanka nani ba sut Dawan nakra ra wapni kata, ai damika nani bara Debit sin daukan ba baku.

³ Witin sika mani tâ krikan wal tâura kati diman ra, witin kingka lâka piua ra, Dawan watla durka nani kwâkan bara aisawan kan nani ba sin paskan.

⁴ Baha ningkara prîs bara Libait nani ra paiwan, witin nani asla daukan tawan asla taki ba latka ra.

⁵ Bara witin nani ra win: “Libait nani, wals: man nani klin taks nanara, bara Dawan tempelka ba sin klin dauks, damikam nani Dawanka ba. Holi pliska ba wina, diara tâski nani ba sut sâks.

⁶ Kan wan almukka nani ba Dawan yabalka wina tnaya ra kan, ai daukanka nani sin Dawan nakra ra saura kan bamna, Dawan ra sin swih banhwan. Ai nakra Dawan wina tnaya ra lakan bara Dawan bâra ba pliska saura kulki banhwan.

⁷ Kwala dimaia durka nani ba prakan, lamp nani sin daskan, bara sîka kîa yamni angki kata swin, Dawan watla ra sin sakripais daukras, witinka Israel Gâdka ba.

⁸ Baha mita Dawan ba Juda bara Jerusalem mapara ai kupia baikan, baha mita witin nani daukan ba mita sirang wan iki kaia Dawan mita baku daukan.

⁹ Baha mita wan aisika nani war ra prui banhwan, bara wan luhpia waitna bara mairin nani, wan maya nani sin silak ra brih wan.

¹⁰ Baku bamna, yang Dawan wal lâ kum plikisna, witinka Israel Gâdka ba, ai lawanka ba wan tila wina sakaia lâka.

¹¹ Baha mita, luhpi nani, swapi banhpara, kan Dawan bui bâk mai sakan ai warkka daukaia yu bani ra, bara sin kîa yamni angkaia.”

¹² Libait nani baha walan ba ra mahka wark takan ba naha nani kan: Quehat kiamka nani wina, Máhat, Amasai luhpia, bara Joel, Azarías luhpia ba; Merarí kiamka wina, Quis, Abdí luhpia bara Azarías, Jahaleel luhpia ba; Guersón kiamka nani wina, Joah, Zimá luhpia bara Eden, Joah luhpia ba;

¹³ Elisafán kiamka nani wina, Simrí bara Jehiel; Asaf kiamka nani wina, Sakaraya bara Matanías;

¹⁴ Hemán kiamka nani wina, Jehiel bara Simí, bara Jedutún kiamka nani wina, Semaías bara Uziel.

¹⁵ Tâura witin ai taya nani asla daukan, bara sut klin taki banhwan; baha ningkara tempel ra diman nahki sunu takaia dîa king lâ mangkan ba kat, bara dîa Dawan win ba baku daukaia.

¹⁶ Baha ningkara prîs nani ba tempel ra diman sunu daukaia dukiara, tâski dukia nani sut ba latara saki swin tempel bilara kan nani ba, bara Libait nani bui Cedrón tingni ba ra brih wan.

¹⁷ Bara baha wina kli kati pas yua pas aimakan ba ra klin takaia lâka nani ba daukan, bara yu 8 baku daukan bara pat Dawan tempelka ra dimaia mawanra wan. Tempel kutbanka bilara latka ba ra yu 8 baku daukan, bara yu 16 kat tnata alkan.

¹⁸ Baha ningkara witin nani king Ezequías watla ra diman bara win: “Pat tempel ba klin dauki banhri: aiska angkaia sakripaiska daukaia altarka ba, diara watla nani ba sin, baha brit kahbaia tibilka holikira pali pliska ra ba sin, bara diara watla nani ba sut.

¹⁹ Bara baku sin king Ahaz lâ krikanka nani daukan diara watla nani sut tâski dauki latara lulkan kan ba, yang nani baha sut kli wapni daukri, nanara baha nani ba Dawan mawanra sa tempel ra.”

²⁰ King Ezequías ba titan puk ba ra buan, tâ uplika nani sut asla daukan, bara Dawan tempelka ra wan.

²¹ Witin nani brih wan bîp wainhka 7, guts sirpi 7 bara sîp sirpi 7, saurka swih tikaia prisantka daukaia king taika nani ba, tempel ba bara Juda dukiara sin pura sunaia. King ba Eran kiamka prîs nani ba ra win, baha prisantka nani ba Dawan altarka ba purara aiska angkbia.

²² Bara prîs nani bîp nani ba ikan, tâlia nani ba brih baha ni altar lama aiska ba srikban, bara guts bara sîp nani tâlia ba wal sin baku daukan.

²³ Baha ningkara, guts sirpi nani ba saurka mana aibapaia brih wan, king mawanra bara upla nani mawanra sin, bara witin nani daiwra ba purara ai mihta kahban.

²⁴ Baha ningkara prîs nani ikan, tâlia nani laikan altar purara, prisant baku saurka mana saurka swika tikbia dukiara, Israel aiska sut dukiara, king pat adar yaban kan sakripais ba Israel aiska ra daukbia.

²⁵ Ezequías sin Dawan tempelka ra Libait nani ba swin singbaia dukia ba singbi kaia, Debit bara prapit Gâd wal lâ dauki win ba baku, king warkka ra prapit Natán win ba baku, kan baha lâka ba Dawan bui yaban, Gâd ai prapitka nani aisi bâk.

²⁶ Libait nani ba bûi kan Debit miusik pulaia sâtka yan ba wal, bara prîs nani lika trumpit nani ba wal.

²⁷ Bara Ezequías ridi kan, sakripais ba altar purara daukaia. Bara sakripais ba daukaia minitka ra, Dawan ra kulki lawana aiwani banhwan, trumpit puhbi, miusik sâtka wala sin kangbi, Debit yan ba wal.

²⁸ Upla nani ba ai lula kriki Dawan ra mayuni kan, trumpit ba prîs nani puhbi kan aiwawanra nani sin aiwani kan, ban trumpit nani puhbi kan sakripais ba sut aman ba kat.

²⁹ Sakripais ba luan ba ra king bara upla wala nani sut ai lula kriki Dawan ra mayunan.

³⁰ Ningkara king Ezequías bara wihta tara nani ba sin win Libait nani ra sin Dawan ra mayunbia, king Debit lawana ba aiwanaia bara prapit Asaf lawana ba sin aiwanaia. Bara witin nani lilia pali aiwanan, baku sin ai lula kriki Dawan ra mayunra yan.

³¹ Ningkara Ezequías bui upla nani ra win: “Man nani pat holi takram Dawan ra, bara nanara lamara bal, sakripais prisantka nani bri bal, Dawan tempelka ra tingki wiaia dukiara.” Bara upla nani ai prisant ba brih wan Dawan ra tingki wiaia, baku ya sakripais daukaia lukan ba baku daukan.

³² Upla nani sakripais daukaia daiwra nani brih wan kan ba lika bîp wainhka 70, sîp wainhka 100, sîp sirpi 200, baha sut ba Dawan ra ai prisantka yan.

³³ Dawan ra tingki wiaia yan daiwra nani sut ba bîp 700 kan, bara daiwan wala sirpi nani ba lika 3,000.

³⁴ Sakuna prîs nani ba ailal apia kan bamna, daiwra aiska angkaia taya nani ba sut sip sakras bamna, muihnika Libait nani ba sin hilp munan warkka ba danh daukaia, prîs wala nani ba wih klin taki balan ba kat; Libait nani ai tânka marikan witin nani kau ridi klin kan prîs nani ba wal.

³⁵ Baha purkara wîna aiska angki prisantka yaia sakripaiska ba ailal pali daukaia kan, kli wal uplika takaia sakripaiska daukaia wîna batanka nani ba sin ailal pali kan, baha angki bara wain di prisantka nani yabaia ba sin. Baku dauki natka ra tempel ra Dawan ra mayuni kaia lâka ba kli bukan.

³⁶ Ezequías bara upla nani sut lilia kan Gâd upla nani mata dîa daukan ba dukiara, kan naha sut takan na istikira kata.