2 Kronikas 28 - DAWAN BÎLA AISKA

Ahaz Juda ra king aimakan ba

¹ Ahaz mani 20 bri kan ba ra king aimakan, bara 16 mani Jerusalem ra king aimaki kan. Sakuna ai daukanka nani ba Dawan mawanra wapni apia kan, ai damika Debit kata baku apia kan,

² sakuna Israel kingka yabalka nani ba alkan, bara sin bras ni lilka nani paskan Baal lilka ba,

³ bara Ben-hinom il langnika ra sakripais dauki dus mâka kîa nani angkan, saura dadaukra nani Dawan mita Israel luhpia nani mawan wina kangbi sakata ba.

⁴ Baha purkara sakripais nani sin daukan dus mâka kîa pain nani ba ni idan pliska nani ra, kiuhsi nani ra bara wahia pain pâwi nani ba munhtara sin.

⁵ Baha tâwan Dawan Gâd mita witin ba Siria kingka mihta ra mangkan, bara Siria uplika nani mita pura luan, upla uya Damaskus ra bri si silak ra mangkan. Dawan mita Israel kingka nani mihta ra sin mangkan, bara baha nani mita sin pura luan bara ikan.

⁶ Kasak pali, Remalías luhpia Pécah mita Juda uplika nani ra yu kum 120,000 ikan, uplika nani ba war aiklaklabra nani kata, kan witin nani ai damika nani Dawan Gâdka wina tnaya ra tawan bamna pruan.

⁷ Bara Zicrí, Efraín wina war aiklaklabra ba mita Maaseías king luhpia ba ikan, bara Azricam king watla wihtka ba sin, wala ba Elcaná, king watla ra suldiar nani wihtka ba sin ikan.

⁸ Bara sin Israel aiklaklabrika nani mita upla 200,000 silak ra brih wan, Juda uplika nani tila wina, mairin, waitna bara tuktan nani sin. Bara diara uya wala kwahki Sameria ra brih wan.

⁹ Bahara Dawan dahra aisasarika kum bâra kan nina Obed, bara war wina aula nani ba wal prawaia taki wan, Sameria ra dimaia auya kan ba ra witin nani ra win: —Dawan, man nani damikam Dawanka ba, Juda wal ai kupia sauhkan, baha mita baha nani ba man nani mihtam ra mangkan. Sakuna man nani bui kupiam baiwanka saura karna uya iki tikram bara saurkam ba kasbrika purara ba Dawan kat wan.

¹⁰ Baku sin luki banhwisma Juda bara Jerusalem uplika nani ba albikam waitna bara albikam mairin nani briaia. Sakuna, ¿man nani pali sin Dawan Gâdkam mapara saura daukras ki?

¹¹ Baku bamna, man nani bîli wals, bara silak uplika nani sut blîks wabia, baha nani ba man nani muihkam sa, kan Dawan ba man nani wal ai kupia sauhkan sa.

¹² Bara Azarías Johanán luhpia ba, Berequías, Mesilemot luhpia, Ezequías, Salum luhpia, bara Amasá, Hadlai luhpia ba, baha nani sut ba Efraín uplika wihta nani kan ba, baha nani war wina aula kan ba kainara aimakan,

¹³ bara witin nani ra win: —Nahara war uplika nani silak ra mangkaia bri balpara, kan baha wal Dawan mapara pâtkira wan kulkbia. Man nani daukankam wal saurka nani kau aipaswisa, bara wan pâtka saurka nani ba uya pali sa, bara Dawan ba Israel wal uya ai kupia sauhkbia.

¹⁴ Bara suldiar nani ba tawan wina uplika mawan kat silak uplika sut lanhkan, bara dukia nani mihta dakban kan ba sut kli yaban, tâ uplika nani ba sin.

¹⁵ Ningkara kainara upla nani nina mâkata uplika nani ba bal dukia nani ba ai mihta ra bri banhwan, bara kwalka âpu kan nani ba kwala yaban, sûska sin yaban, plun yaban, diranka daskan, insauhkanka nani ba sîka yan, latwan bri nani ba biriku ra suni Jeriko kat brih wan, sila dusa ailal pâwi tawanka ba ra ai taya nani mihta ra mangkan. Ningkara witin nani kli Sameria ra balan.

¹⁶ Baha piua ra king Ahaz ba lengstar daknika kum blikan Asiria kingka ra hilp makabaia,

¹⁷ kan Edom uplika nani ba bal war aiklabi bara Juda mapara pura luan, bara upla nani ba alki silak ra brih wan.

¹⁸ Tani wala ra, filisteo nani balan Négueb langnika ra bara Juda tawanka nani bâra kan ba kutbi prak alkan: Bet-semes, Aialón, bara Guederot, bara sin Socó, Timná bara Guimzó tawanka sirpi nani bâra kan baha sut brin.

¹⁹ Dawan ai brinka kan Juda ra swira paskaia, kan Juda kingka Ahaz tâka mita sika witin nani saura daukaia lan takan, bamna witin ba kasak lukras kan Dawan ra.

²⁰ Tiglat-piléser, Asiria kingka ba, Ahaz mapara wan, bara tâ baikaia watlika ra, kau ni pât dingkan.

²¹ Bara Ahaz diara ailal tempel wina sakan, king watla wina, tâ uplika wala nani watla wina sin, Asiria kingka ra yabaia dukiara, sakuna witin baha wina lika hilp briras kan.

²² Bara pât tilara kan sakuna, witin Dawan ra tniwras kata. ¡King Ahaz ba baku kan!

²³ Damaskus gâdka nani ra sakripais daukan, bara baha wal witin kauhan. Witin lukan baha nani ba Siria gâdka bui tâ baikan, witin nani kingka ra sin ai tâ baikbia lukan baku daukbia kaka, sakuna baha nani bui witin ra sauhkanka bri balan, Israel aiska ra sin.

²⁴ Dawan tempelka yus muni dukia nani sut ba Ahaz mita sut sauhki tikan, bara tempel sin praki swin, bara blikan wan aidul nani ra pura sunaia pliska nani paskaia Jerusalem ra.

²⁵ Aidul gâdka nani watla paskan Juda tawanka nani ra, bara sîka mâka nani angkaia dukiara gâd nani wala ra, baha wal kau Dawan ra kupia sauhki kan, ai almukka nani Gâdka ra.

²⁶ Witin ai sturka wala nani, bara diara wala nani daukan ba, tâ wina prakan ba kat, Juda bara Israel kingka nani wauhkataya ra ulban sa.

²⁷ Witin pruan ba ra, ai damika nani tilara Jerusalem tawanka ra bikan, sakuna king nani raitika ra lika bikras kata. Ba ningkara ai luhpia Ezequías ba ai watlika ra king aimakan.