2 Kronikas 27 - DAWAN BÎLA AISKA

Jotam king aimakan ba

¹ Jotam 25 mani bri kan king aimakan, bara Jerusalem ra 16 mani king lâka ra iwi kan. Ai yaptika nina ba Jerusá mâki kan, Sadoc luhpia mairin.

² Jotam daukanka nani ba Dawan nakra ra wapni kan, Ozías ai aisa daukan kan baku. Ban sakuna Dawan tempelka ra dimras. Sakuna upla nani ba ai saurka nani ban dauki kan.

³ Jotam tempel durka dimaika pura tani nani ba paskan, baku sin paskanka wala nani, Ófel kutbanka ra.

⁴ Baku sin Juda ilka ra tawan nani paskan, bara unta biara nani ra lika kan kahbaika pliska nani bara tawer nani paskan.

⁵ War aiklaban Amón uplika kingka nani wal, bara aiklabi witin nani ra pura luan. Baha manka ra Amón uplika nani mani yumhpa ai lal mana aibapan: Silbar ton walhwal, plawar mâ 2,200,000 batil bara barli mâ sim praiska. Mani wâl bani baku aibapi banhwan.

⁶ Jotam karna takan, witin Dawan nakra ra kasak wapni pali kan mita.

⁷ Jotam sturka nani wala ba, ai daukanka nani bara witin suldiar lâka ra iwan nani ba, Juda bara Israel kingka nani wauhkataya ra ulban sa.

⁸ Jotam king aimakan piua ra witin 25 mani bri kan, bara Jerusalem ra 16 mani king aimakan.

⁹ Witin pruan ba ra, Debit Tawanka ra bikan, ai damika nani raitika ra. Bara baha ningkara ai luhpia Ahaz ba king aimakan.