2 Kronikas 26 - DAWAN BÎLA AISKA

Ozías king aimakan ba

¹ Bamna Juda tawanka aiska ba Ozías ra sakan bara king mangkan ai aisika watlika ra. Ozías ba 16 mani bri kata baha piua ra,

² bara witin mita sika Elat tawanka ba kli paskan, bara Juda tasbaika takan, ai aisika pruan ningkara.

³ Ozías king aimakan ba ra 16 mani bri kan, bara Jerusalem ra 52 mani king aimaki kan. Yaptika nina ba Jecolías mâki kan, witin ba Jerusalem wina kata.

⁴ Ozías daukanka nani ba Dawan mawan ra wapni kata, ai aisa Amasías daukanka kata baku.

⁵ Trai munan Dawan lâka daukaia Sakaraya raya kata ba ra, kan witin bui smalkan Dawan ra kulkaia ba. Bara Dawan ra luki kan ba ra pâwanka nani manis brin kata.

⁶ Ozías ba filisteo nani mapara buaia diara kum daukan baku munka plapaia, bara Gat, Jabnia bara Asdod ra kutbanka nani slingban, bara Asdod tasbaya ra tawan nani paskan filisteo nani tilara.

⁷ Dawan hilp munan filisteo nani mapara buaia, bara Arabia wina nani Gur-baal ra iwi kan ba bara meunita nani mapara sin.

⁸ Amón uplika nani sin Ozías ra ai lal mana aibapi kan, bara witin ai sturka Idsip tasbaya kat wan, ai karnika ba sin uya tara takan kata.

⁹ Witin Jerusalem ra tawer nani sin paskan, Tawan Unyukwika Getka purara, Il Bîla Getka ba purara bara unyukwika ba purara, bara baha nani ba kaina kahbata.

¹⁰ Baha purkara upla iwras tasbaya ra tawer nani paskan, liwanhta nani sin salhkan tasba langni nani ra, waitna nani bri kan unta ra wain nasla warkka dauki kan baha ba il pliska nani ra, kan witin insla warkka dadaukra kan bamna.

¹¹ Ba purkara, Ozías war aiklaklabra bri kan aiklabaia ridi baman, baha ba dakni nani ra aiklabaia taki wi kan, baha lika king watla ra sturi âiulbra Jehiel ba wina sa, baku sin Maaseías wihta tara ba bui wan marikisa, naha na Hananías munhtara kan ba, king kamandantika kum.

¹² Utla bani lalka aslika ba witin nani ba, war aiklaklabra kupia karna nani ba, wal asla sut bâra kan 2,600 nani.

¹³ Witin ai mihta ra war uplika bri kan 307,500, karnika tara pali, naha nani ba ani piua king mapara war kum aula ba taim hilp muni kan.

¹⁴ Ozías war uplika nani ra paski yan ai kan kahbaika nani, langsa, lal prakaia, ai wîna aiska prakaika, pantamangka bara praukpraukia sin.

¹⁵ Baha purkara Jerusalem ra war misinka sâtka nani paskan, tawer nani ra mangkan, kutbanka nani purara bara il nani purara sunan baha wina trisba lulkaia, walpa tara sin lulkaia. Ai sturka ba laihura plapi tawan, Dawan bui hilp munan bara sin karna takan kata ba.

¹⁶ Sakuna ai karnika ba brin ba ra kli praut takan, baha tâka witin ra sauhki tikan. Witin Dawan ai Gâdka ra kulkras daukata, kan witin Dawan tempelka ra dimi mahka kîa yamni dukia nani ba angkan altar ra.

¹⁷ Sakuna baha diman ninara prîs tara Azarías ba sin diman, Dawan prîska kupia karnakira nani 80 wal,

¹⁸ bara king mapara bûi naku wi banhwan: “King Ozías, Dawan ra sîka mâka kîa pain ni sakripais daukaia ba, man mihtam ra apia sa; baha ba prîs nani Eran kiamka nani ba mihta ra sa. Man taki was naha Dawan wal aisaia watla wina, kan man Dawan mapara saura daukram, ba mita Dawan kulkanka maikbia apia.”

¹⁹ Ozías sakripais angkaika kum ai mihta ra bri kan, sakripais angkaia dukiara bara prîs nani mapara ai kupia sauhkan. Bara baha pali piua ra, Dawan tempelka pali kat, sakripais angki altarka lamara bara prîs nani mawan kat, ai lal pura kat lipar sikniska takan.

²⁰ Bara prîs tara Azarías bara prîs wala nani sin witin ra kaikan ai lal purara lipar bri ba, aihni pali baha pliska ba wina sakan; witin pali sin mahka takaia luki kan, baku Dawan bui witin ra klala yaban bamna.

²¹ King Ozías ba liparkira kan pruan ba kat. Baku ba ra king ba liparkira kan raya kan ba piua sut, utla kum ra saki swin, bara sin Dawan tempelka ra swin dimras kata. Bara ai luhpia Jotam ba king aimakan, ai nisanka aiska purara.

²² Ozías ai sturka nani wala ba, kaina wina tnata lâs ba kat, baha ba prapit Aiseya, Emus luhpia ba ulban sa.

²³ Ozías pruan ba ra, upla nani ba aisin witin lipar brisa, sakuna witin ai damika king nani raitika ra bikan. Bara ai watlika ra ai luhpia Jotam king aimakan.