2 Kronikas 25 - DAWAN BÎLA AISKA

Amasías king aimakan ba

¹ Amasías ba 25 mani bri kan king aimakan piua ra, bara Jerusalem ra 29 mani king aimakan. Ai yaptika nina ba Joadán kata, witin ba Jerusalem wina kan.

² Amasías daukanka nani ba Dawan mawanra wapni kan, kuna ai kupia aiska wal lika apia kata.

³ Amasías ai karnika brin ningkara, wihta tara nani ai aisa ikan nani uplika sut ra ikan.

⁴ Sakuna witin nani luhpia ra lika ikras kan, dîa Moses lâka ra Dawan adar yaban ulban ba kat: “Aisika nani dîa saura daukbia ba tâwan luhpia nani ra ikbia apia, bara luhpia nani tâwan sin aisika nani ra ikbia apia, ban sakuna upla bani ba ai saurka ba tâwan lika prubia sa.”

⁵ Amasías ba Juda bara Benjamín uplika sut asla daukan, bara kiamka bani ba kat asla dauki ai tila kat war lalka nani mangkan. Baha ningkara upla mani 20 bri ba wina purara ba kulkan bara 300,000 wahma nani sakan war ra waia langsa wal, ai kan kahbaika sin twilkaia.

⁶ Baha purkara 100,000 kau wala nani sakan Israel wina, baha nani mana silbar 4 ton prais aibapan.

⁷ Sakuna Dawan waitnika kum latan takan bara witin ra win: —Ay king, man lika Israel aiklaklabrika nani ba Efraín aiklaklabra nani ba aikuki asla takpara, kan Dawan baha nani wal apia sa.

⁸ Sakuna man aiklaklabrikam nani tâ baikaia lukisma kaka, witin nani wal war ra waia, Dawan mita witin nani ba yaka kauhbia waihla nani mihta ra, kan Dawan ba karnika brisa tâ baikaia bara sauhki tikaia sin.

⁹ Amasías bui Gâd waitnika ra makabi walan: —Sakuna, ¿dîa takbia 3,300 kilo pura silbar Israel suldiar daknika ra yabri ba? Gâd waitnika ba pana witin ra win: —Dawan diara sut brisa man yaram ba pura praki maikaia.

¹⁰ Bara Amasías mita Efraín wina war uplika nani balan ba aihka saki kli watla ra blikan wan. Sakuna witin nani kasak ai kupia sauhkan Juda mapara, bara kli ai watla nani ra mahka tawi wan.

¹¹ Amasías ba ai kupia karna daukan bara ai aiklaklabrika nani ba Sâl Ilka bîla ra brih wan, bara Seír uplika nani ra 10,000 ikan.

¹² Baha purkara, Juda uplika nani sin 10,000 raya alki brih wan il kum walpa baman bahna ra; baha wina baha nani bataki yuya baman iki tikan.

¹³ Bara baha piua ra, Amasías mita suldiar nani swin waras kan nani ba, watla nani ra blikan kan, bara baha nani ba mita Juda tawanka nani ra wih diman, bara Sameria wina Bet-horón kat, 3,000 ikan, bara diara ailal sin impliki brih wan.

¹⁴ Amasías ba Edom uplika nani ra aiklabi pura luan, baha wina brih balan Seír gâdka nani ba, witinka ra mayuni sîka kîa yamni angkan.

¹⁵ Bara Dawan Amasías ra ai kupia sauhkan, bara prapit kum blikan witin ra wiaia: —¿Dîa kan gâd bahki nani ra waram, baha gâdka nani ba sip ai nisanka pri sakras ba?

¹⁶ Sakuna prapit ba kau naha aisi kan ba ra, king ba naku win: —¿Dîa yang nani mai mangki banhri king ra lâ marikaia? ¡Baha lâka ba swis! ¿Apia kaka, mai iki banhbia want sma? Prapit ba kau diara kumi aisaras, sakuna naku win: —Yang kaikisni Dawan mai sauhki tikbia naha daukisma mita, bara yang mai wisna walras sma bamna.

¹⁷ Sakuna Amasías, Juda kingka ba, witin ai uplika nani Israel kingka mapara aisi nani ba bîla walan bamna, Joás, Joacaz luhpia bara Jehú mulika, Israel kingka ba ra, ai bîla bliki win: “Bal, yawan wan mawan prawi kaikaia.”

¹⁸ Sakuna Joás mita naku ai bîla blikan: “Kiaya ba ai bîla blikan Líbano yalamka ra: ‘Luhpiam mairin ba luhpi waitna maya baiks.’ Sakuna daiwan kraskira kum bâk luan ba ra, kiaya ba ra ai mina ni taibi sauhkan.

¹⁹ Man bila wisma Edom uplika nani ba sauhki tikram, baha wal man liliam brisma, bara mayunra ba kau plikisma. Sakuna kau yamni sa wamtla ra kama. ¿Dîa kan man bui klauna plikisma sauhki tikaia bara Juda ra sin pât dingkisma?”

²⁰ Ban sakuna, Amasías ba bîla walras kan, baha ba Dawan bui baku daukan, Joás mihta ra mangkaia dukiara, kan witin Edom gâdka nani ra plikan bamna.

²¹ Bara Joás mahka wapan Amasías mapara, Bet-semes ra, baha Juda tawanka bilara kata.

²² Bara Juda ra Israel bui pura luan, bara upla kumi bani ba plapi ai watla ra diman.

²³ Joás, Israel kingka ba, Amasías Juda kingka ba alki silak ra mangkan Bet-semes tawanka ra. Baha ningkara Jerusalem ra brih wan, bara baha kutbanka ra unta kum daukan yahpika ba 200 yar bri kata, Efraín durka wina dur wala ba kat.

²⁴ Ba purkara gul bara silbar nani sut brih wan, baku sin Dawan tempelka ra diara nani bâra kata ba sut, Obed-edom bri kan ba bara king watla ra lalah nani kan ba sin sut. Ba ningkara upla nani kum kum ba silak uplika baku alki muni, kli Sameria ra wan.

²⁵ Amasías, Joás luhpia, Juda kingka ba, 15 mani tasba ra raya kan Joás pruan ningkara, witinka ba Joacaz Israel kingka luhpia kata ba.

²⁶ Amasías sturka wala nani ba, tâ wina tnata kat ba, Juda bara Israel kingka nani sturka ulban ba tilara sa.

²⁷ Amasías Dawan lâka wina tnaya ra tawan yua ba wina, Israel aiska ba witin mapara kan, bara witin plapi Laquis ra wan; sakuna nina bliki baha tawanka kat wih iki banhwan.

²⁸ Ningkara aras kum purara suni brih wan, bara ai almukka nani lamara bikan, Debit Tawanka ra.