2 Kronikas 24 - DAWAN BÎLA AISKA

Joás kingka lâka

¹ Joás mani 7 bri kan king aimakan, bara 40 mani Jerusalem ra king lâka ra iwan. Ai yaptika nina ba Sibiá mâki kan, bara Beerseba wina kata.

² Joás daukanka nani ba Dawan nakra ra yamni kaikan, prîs Joiadá raya kan piua ra.

³ Joiadá ba mairin wâl ai maritka brin, baha nani wina luhpa waitna bara mairin nani sakan.

⁴ Piua kum luan ningkara, Joás ridi takan Dawan tempelka ba paskaia,

⁵ bara baha dukiara prîs nani asla daukan, Libait nani ba sin, bara naku win: “Man nani was Juda tawanka tara nani bâk bara Israel luhpia nani sut wina lalah wahbi banhs, lalahka ba wal mani bani Gâd tempelka ba kli paski kaia. Baha warkka ba man nani mahka dauks.” Sakuna Libait nani warkka ba isti daukras kan.

⁶ Bamna king bui prîs tara Joiadá ra winan, bara naku win: —¿Dîa muni man Libait nani ra karna munras, witin nani Juda bara Jerusalem wina brih balaia, prisantka nani Dawan napakanka Moses bui Israel tawanka ra adar yan ba, baha uplika nani wahbi banhwata ba tint watla ba dukiara?

⁷ Kan Atalía saura pali kata bara ai nina bliki nani ba aikuki, Dawan tempelka ra dimi dukia nani ba brih, bara witin nani aidul ra ai pura sunaia dukiara dauki banhwata.

⁸ Bara king ba win diara auhbaia watla kum paskaia, bara witin nani paski Dawan tempelka dur ba lata tani ra swin.

⁹ Baha ningkara Juda bara Jerusalem aiska ra maisa pakan, Dawan watla ra brih balaia, Dawan napakanka Moses upla iwras tasbaya ra ai prisantka yaban kata baku.

¹⁰ Bara tâ uplika nani ba tawan uplika nani sut lilia âuyapah kira âu win ai prisantka nani ba yabaia auhbaia watla paskan ba ra mangkaia, bara auhbi banhki daukan.

¹¹ Libait nani lâ auhbaia watla ba king ra brih bali kan, tânka ba laki kaikbia dukiara, bara lalah ailal mangkan sa piua ra, bara king sturka âiulbra ba bara pura kakaira kum prîs tara bui mangkan ba, baha watlika ba pliska wina saki kaiki, ningkara kli mangki kata. Yu bani baku dauki kan, bara lalah ailal wahbi kata.

¹² Bara king Joiadá mita tempel paski nani ra lalah ba yan, kau wark uplika pliki bribia dukiara, kan baha nani ba tempel aisawan pliska nani ba paski kan bamna, baku sin kau upla wark tânka bri nani ba plikbia wisi, ayan warkka taki nani bara bras warkka taki nani ra sin.

¹³ Bara warkka tâ bri nani ba, ai mânka wark ba dauki banhwan, bara witin nani mihta ra mahka wark ba pâwata, bara kli Gâd tempelka paski kan ba kainara, dîa ulbi mangkan sut kat daukan, bara tâura dîa kata ba baku paski swin.

¹⁴ Bara sut paski daukan bara king ra brih wata bara Joiadá ra sin lalahka kau takaskan ba, bara witin nani win lalahka kau tawan ba ni tempel ra diara yus munaia dukia nani ba paskaia, daiwra aiska angkaika Dawan ra tingki wi mayunaia dukiara, ispan tara nani gul ni paskan bara silbar ni sin. Joiadá raya kan piua sut ra, tempel ra tingki wi mayunaia daiwra aiska angki mayuni kan.

¹⁵ Baku Joiadá ba almuk pali takan, ai yua sut brin ba 130 mani, bara pruan.

¹⁶ Bara Debit Tawanka ra bikan, king nani bikan kan ba lamara, witin bui Israel tilara ai wark yamni daukan bamna, Dawan wal bara ai tempelka wal sin.

¹⁷ Joiadá pruan ningkara, Juda wihtka nani wan bara king ra nina mayunka tara yan. Bara witin nani mita lâ mariki kan ba alki brin,

¹⁸ bara witin nani Dawan tempelka ba mahka swin, ai damika nani Gâdka kata ba, bara Aserá gâdka lilka nani ra mayunan, aidul wala nani ra sin. Naha saurka tâwan, Dawan ai kupia sauhkan Juda bara Jerusalem ra sin.

¹⁹ Ban sakuna, Dawan ai dahra aisasarika nani blikan, kli witin ra tawbia wisi. Sakuna upla nani ba prapit nani smalkan ba walras kata.

²⁰ Bara Sakaraya, prîs Joiadá luhpia ba, Gâd spiritka witin ra iwan ba ra, plis prumhni kum ra uli wan bara ningkara upla nani ra win: “Gâd ba naku wisa: ‘¿Dîa kan man nani lâika bîla walras sma? ¿Man nani bui pliki banhwisma Dawan lawanka ba? ¡Man nani bui lulki ai swiram, bamna yang sin man nani ra lulki mai swimni!’ ”

²¹ Sakuna upla nani ba witin mapara buan, bara walpa ni sabi banhwan, king adarka ba kat, Dawan tempelka kutbanka ba ra.

²² King Joás ba ai âuya tikan Sakaraya aisika Joiadá witin ra marikan ba, bara Sakaraya ra ikan, ai luhpia ba, bamna witin pruaia baila kan ba ra winan: “¡Dawan naha na kaikbia, baha mana witin nani ra klala yabia!”

²³ Mani bal diman ba ra, Siria war aiklaklabra nani ba Joás mapara war aiklaban, bamna Juda bara Jerusalem aiska impaki taukan ningkara, baha tilara nisan bani lalka sut iki tikan, bara diara ailal dakbi brin ningkara Damaskus kingka ra blikan.

²⁴ Siria wina war aiklaklabra wiria baman wan, sakuna Dawan mita baha nani mihta ra aiklaklabra daknika kau ailal mangkan, baha ai damika nani Dawanka ra lulki swin bamna. Baku Joás ra klala yabaia kan ba yan.

²⁵ Siria uplika nani mahka wan ba ra, Joás siknis pali krikri ra prawi kan, ai warkka uplika nani witin mapara buan, prîs Joiadá luhpia ra ikan ba mana, pana yaka ikaia dukiara, bara witin ba ai krikrika kat ikan. Baha ningkara bri si Debit Tawanka ra bikan sakuna king nani raitika ra lika bikras kata.

²⁶ Witin mapara buan nani ba naha nani kata: Zabad, Simat luhpia ba, Amón uplika kum, bara Jozabad, Simrit luhpia ba, Moab uplika kum.

²⁷ Joás luhpia nani dukiara aisi ba ra, prapit nani witin ai mapara aisin ba bara Dawan tempelka raya daukan sturka sut, king nani dahra ulban ba wauhkataya ra ulban sa. Baha ningkara ai luhpia Amasías ba ai watlika ra king aimakan.