2 Kronikas 23 - DAWAN BÎLA AISKA

¹ Mani 7 alkan ba ra war tâ uplika sut Joiadá mita paiwan, baha ba naha nani kata: Azarías, Jeroham luhpia ba, Ismael, Johanán luhpia ba, Azarías, Obed luhpia ba, Maaseías, Adaías luhpia ba, bara Elisafat, Zicrí luhpia ba, bara naha nani na yan ai aslika daknika baku takan.

² Witin nani Juda tasbaya aiska tauki banhwan, bara Libait nani Juda tasbaika ra nani kan ba asla daukan, Israel luhpia nani utla lalka baku bâra kan ba sin asla daukan, ningkara alsut Jerusalem ra wan.

³ Bahara wih asla taki banhwan Dawan tempelka bilara, bara witin nani king wâl pramis kum daukan. Joiadá bui witin nani ra win: “¡Man nani nâra brisma ki king luhpia ba! Witin ba king kaia sa, Dawan baku pramis daukan Debit kiamka nani dukiara.

⁴ Naku sika man nani daukaia sma: man nani tilam wina baiki sakanka yumhpa wina kumi ba prîs bara Libait nani ris yua ra wark dauki nani ba, dur nani ba kaina sunbia;

⁵ bara baiki sakanka yumhpa wala ba, king watla ra kabia; baiki sakanka yumhpa wala ba, tawan playa pali durka ra kabia. Baha tilara tawan aiska sut ba, tempel latka ra kabia.

⁶ Sakuna upla kumi sin tempel ra dimaia apia, prîs nani baman sip sa, bara Libait ai warkka ra nani ba sin sip sa, kan witin nani ba pat holi lâka ra ba mita. Sakuna tawan aiska ba aihwaki kabia, Dawan ra kulkanka yaia dukiara.

⁷ Libait nani ba king kaina kir bri kabia, kumi bani ba war aiklabaia dukia ai mihta ra bribia, bara ya tempel ra dimaia munbia ba, ikan kabia. King anira auya bani ba, yakan swibia apia.”

⁸ Libait nani bara Juda uplika nani sin, prîs Joiadá dîa win ba kat daukan. Kumi bani ba ai warkka nani dauki kan, ris yua ra dimi kan nani ba bara mahka taki auya ba sin, kan prîs Joiadá bui baha nani yan waras kan ai warkka nani ba sut daukbia ba kat.

⁹ Bara Joiadá ba war kiaptin bani ra yan langsa nani, ai kaina kahbaia dukia nani, king Debit bri kan dukia nani kata ba, baha nani sut ba Dawan tempelka bilara kata.

¹⁰ Baha ningkara dur nani ra upla swin, aihkika tani wina smihka tani kat, tempel ra bara altar kir ba ra sin, upla kumi bani ba langsa ai mihta ra bri kan king ba main kaikaia.

¹¹ Bara Joiadá ai luhpia nani aikuki, king luhpia ba saki king kraunka lal ra mangkan, king tukinka wala nani ba sin, bara batana laiki king mangkan, ningkara ai bîla tara wini banhwan: “¡King ba raya sa!”

¹² Bara Atalía baha binka nani walan ba ra, upla nani ba plapi wini king ra mayuni kan, bara Dawan tempelka ra wan, bahara upla sut bâra kan.

¹³ Bahara king bâra ba kaikan, bâra bûi kan ai uplika nani aikuki get dimaika ba kat. Ai tnaya ra lalka wala nani bâra kan, lawana binka dauki nani bara upla nani ba uya lilia kan, tâ brih mayuni lawana nani aiwani kan. Bamna Atalía ba ai prâka nani kalki ai bîla tara winan: —¡Waihla lâka! ¡Waihla lâka!

¹⁴ Sakuna prîs Joiadá adar yaban kiaptin nani suldiar lalka nani kan ba taki wabia, bara win: —¡Prias watla bîla ba wina witin ba latara sâks, bara ya uplika witin nina blîkbia ba sut sord wal iks! Prîs ba bui win kan bamna witin ba tempel bilara upla ikbia apia,

¹⁵ bara baha nani ba alkan bara saki brih wan king watla ra aras nani dimaika bâk, bara baha kat ikan.

¹⁶ Baha ningkara, Joiadá tawan uplika wal aisi kaiki pramis kum daukan, king wal sin, witin nani ba Dawan uplika nani takan.

¹⁷ Baha ningkara upla sut Baal tempelka ra wan bara bataki sut sauhki tikan, altarka bara lilka nani sut sauhkan. Bara Matán, Baal prîska ba lika, altar nani ba kat nana dakbi banhwan.

¹⁸ Baha ningkara Joiadá bui Dawan tempelka ra main kakaira nani mangkan, bara prîs nani bara Libait nani adarka munhtara mangkan, baha nani ra Debit bui Moses lâka ra ulban ba baku mangkan ba Dawan warkka daukaia dukiara, baku ba ra piua nani sin kulki saki yan, Dawan ra sakripaiska nani dauki yabaia, witin nani sin lilia aiwani kaia, dîa Debit win ba kat.

¹⁹ Baku sin Dawan tempelka ra dur aihwawakra nani swin, bahara upla sunu apia nani ban kra dimbia apia dukiara.

²⁰ Baha ningkara war kiaptin nani ba, upla nani kau kulkanka bri nani ba aikuki, tawan wihtka tara nani ba sin, upla nani tawan aiska wina, king kaina kahbi aikuki wan, Dawan tempelka ba wina king watla ba kat, durka tara bâk diman, baha ningkara king iwaika ra yan iwan,

²¹ bara tawan aiska ba ai lilia takan. Bara Atalía ba sord wal pat pruan kan bamna, tawan ba ai kupia kumi lilia kan.