2 Kronikas 22 - DAWAN BÎLA AISKA

Ocozías kingka lâka

¹ Jerusalem uplika nani mita Joram watlika ra luhpia sirpika Ocozías ba king mangkata, kan âimplikra daknika ailal takan yabal nani ra bara Arabia uplika nani aikuki asla taki, kiamp nani ra wih ki, Joram luhpia almukka nani sut iki tikan, witin Juda kingka kan ba. Baku bamna, Ocozías, Joram luhpia, Juda kingka ba, mahka king aimakan.

² Mani 22 bri kan king aimakan piua ra, bara Jerusalem ra mani kum king aimakan. Ai yaptika nina ba Atalía mâki kan, baha ba Omrí kiamka kan.

^3-4 Bara Ocozías sin Ahab yabalka alkata, kan baha nani kiamka kan bamna, yaptika mita smalkanka saura smalki maisa kapi kan, bara ai taya nani wal sin prawi mita, Ahab kiamka ba, baha mita ai daukanka sut ba Dawan nakra ra saura kulkan. Witin nani bui sika smalkanka saura baman yaban bara ai aisa pruan ningkara, sauhkaia yabalka ra brih wan.

⁵ Baha nani aisin ba bîla walan tâka, Joram, Ahab luhpia bara Israel kingka ba, Ocozías wal asla taki Ramot Galaad ra wan, Siria kingka Hazael mapara aiklabaia. Sakuna Siria uplika nani bui Joram ra insauhkanka yaban,

⁶ bara witinka na Jezreel ra kli balan ai insauhkanka nani ba rawaia, baha sika Ramot ra latwan brin kan ba, Hazael Siria kingka ba mapara war aiklabi. Bara Joram ba siknis pali kan bamna, Ocozías ba Jezreel ra wan kaikaia.

Jehú bui Ocozías ra ikan

⁷ Gâd mita pat daukan kata Ocozías ba Joram kaikaia wabia piua ra pruaia kan ba. Bara wan wal baku, aihni pali Joram taki wan Jehú wal prawaia, witinka Nimsí luhpia ba. Sakuna Gâd bui pat sakan kan Jehú ra Ahab taika nani sut ba iki tikaia.

⁸ Bara Jehú ba Ahab taika nani mapara lâ dauki kan piua ra, Juda tâ uplika nani bara Ocozías taika nani sin wal prawan, witinka warkka dauki kan ba, bara witin baha nani sut sin ikan.

⁹ Bara Ocozías ra sin plikaia blikan, sakuna witin ba Sameria ra yukuwi kan, bara alki muni Jehú ra brih wan bara ningkara iki banhwan. Sakuna wîna tara ba biki banhwan, tânka bri kan baha ba Josafat luhpia kan ba, kan kasak witin Dawan ra ai kupia aiska wal plikan ba. Naku natka ra Ocozías taika kumi swiras kan, baha nani kumi sin sip apia kan king lâka karnika ba kli bukaia.

Atalía king iwaika ba dakbi brin

¹⁰ Atalía Ocozías yaptika walan ai luhpia ba pruan bara witin Juda ra wan, bara king kiamka nani sut iki tikan.

¹¹ Sakuna Joseba, king Joram luhpia mairin ba, Joás Ocozías luhpia ba tnaya ra lakan king luhpia wala nani wina, kan king luhpia nani ba sut iki tikan kata, bara Atalía mawan wina yukukan kata witin ra main kaiki mairka ba wal, yapaia rumka kum ra. Bara baku lika iki banhras kan. Naha na Joseba king Joram luhpia mairin bara Ocozías lakrika mita daukan, baha lika prîs Joiadá maya kan.

¹² Baku sika Joás ba Dawan tempelka ra yukuwi kan 6 mani. Bamna baha piua ra, Atalía ba ai tasbaya aiska ra wihta tara aimaki kan.