2 Kronikas 20 - DAWAN BÎLA AISKA

Moab bara Amón ra pura luan ba

¹ Piu kum luan ningkara, Moab bara Amón uplika nani ba meunita nani kira asla taki, Josafat mapara bal aiklaban.

² Bara upla nani kum kum wan bara wisata: “¡Edom wina, Kabu Pruan baila wala wina sin, suldiar kwâra tara nani aula mampara! ¡Bara pat Hasesón-tamar ra banhwisa!” (Hasesón-tamar nina ba lika En-gadi wal kumi sa.)

³ Josafat sibrin takan bara witin Dawan ra tniwan. Bara maisa pakan Juda aiska ra plun wahwi ai pura sunbia,

⁴ bara Juda uplika nani ba asla takan witin nani Dawan ra hilp makabaia. Juda tawanka nani sut wina sin upla balan.

⁵ Josafat buan upla nani tilara, Jerusalem ra asla takan bara tempel watla mawanra, Dawan watla raya paskan ba ra,

⁶ bamna naku winan: “Dawan, wan damika nani Gâdka, man sika kasbrika purara ba Gâdka, man nisan nani tâ brih wapisma, man mihtam ra sa karnika ba, upla kumi sin man mampara buras.

⁷ Wan Dawan, man mihtam kahbi sakram Israel luhpia nani mawanra, naha tasbaya luhpia nani ra yaram, ban kaia ra ban kabia, Ebraham kiamka man uplikam nani ba dukiara.

⁸ Nahara witin nani bal iwan ningkara, man tempelkam paskan, bara win:

⁹ ‘Yawan ra saurka kum aula sa kaka, klala kum baku, war kabia, siknis, apia kaka plun wahwan, yawan naha tempelka mawanra balan kaia sa, kan man naha tempelka ra sma, bara yawan pâtka wahwanka dukiara man ra makabi banhwamni, bara man wan walma, swaki sin wan sâkma.’

¹⁰ Bamna nanara, nâra sa Amón uplika nani, Moab uplika nani bara Seír untika biara ra iwi uplika nani sin, bara Israel luhpia nani Idsip wina aula kan taim man naha tasbaya nani ba ra diman mai daukras kan, sakuna baha wina tnaya ra tawan kan, baha mita sauhki tikras kan.

¹¹ Naha mana nanara wan aiklabisa, ai tasbaya wina kangbi wan sakisa, man tasba wankram kata wan dukia baku.

¹² Wan Gâdka, ¿witin nani ra klala yaras ki? Kan yang nani karnika luha sni, baha nani suldiar kwâra tara bri ba mapara aiklabaia. ¡Yang nani daihra walras dîa daukaia; baha mita wan nakra man kat mai kaiki banhwisna!”

¹³ Juda aiska Dawan mawanra bûi kan, mairin nani, luhpia nani sin bara tuktan kau sirpi nani sut.

¹⁴ Bara tawan aiska sut asla takan ba ra, Jahaziel, Sakaraya luhpia bara Benaías mulika ba, witin ba Jeiel luhpia bara Matanías mulika kan, witin lika Libait kum Asaf kiamka, bara witin ra Dawan spiritka diman

¹⁵ bara win: “Kasak pali wali banhs, Juda bara Jerusalem uplika nani, bara man, king Josafat. Dawan bui man nani ra mai wisa: ‘Si bripara, man nani tâ iwan sin takpara baha suldiar kwâra tara ba mapara, kan naha warkka na man nani dukiam apia, sakuna Dawan dukia sa.

¹⁶ Yauhka man nani mâyara iwi wih, war dauks. Witin nani Sis ilka bâk uli aula, bara bahara prawma tingni tâ kum ra, Jeruel upla iwras tasbaya mawanra.

¹⁷ Naha warka na man nani aiklabaia apia sma, pliskam pliki brih banhs, sâp banhwi bas, bara kaikma nahki Dawan bui swaki mai sâkbia ba. ¡Jerusalem uplika nani bara Juda aiska uplika nani, si bripara bara tâ iwan sin takpara; yauhka witin nani mapara was, kan Dawan ba man nani wal sa!’ ”

¹⁸ Bara Josafat ba ai lula krikan, bara ai mawan ba tasba kat kangban, baku sin Juda uplika nani bara Jerusalem aiska sins ai lula kriki, Dawan mawanra mayuni banhwan.

¹⁹ Bara Libait nani, Quehat bara Coré kiamka nani sin, Dawan ra mahka mayuni banhwan ai bîla tara kwâki, Israel Gâdka ra.

²⁰ Yapra wala titan pali ba bûi banhwan, Tecoa twiya tani upla iwras tasbaya ra impakaia dukiara. Bara Josafat ai mina ra buan, naha wiaia dukiara: “Jerusalem bara Juda uplika nani, ai wali banhs: Dawan ra bîla kaikanka bris, Gâdkam ba, bara kasak tâm baikan ba damra walma; ai prapitka nani ra bîla kaikanka bris, bara diara aiska sut yamni takbia.”

²¹ Bara tawan ra tânka plikan ningkara, aiwawanra nani kum kum mangkan kata, holi kwalka nani dingkan, suldiar nani kainara wapaia; bara lawana aiwani Dawan ra mayunaia: “Dawan ra tingki wis, kan ai latwanka lâka ba ban kaia ra sa.”

²² Tisku witin nani mahka lilia lawana Dawan ra aiwani banhwan ba ra, Dawan mita Amón uplika nani tilara tanis sin daukan, Moab uplika nani tilara sin, bara Seír ilka uplika nani tilara sin, baha nani Juda mapara war daukaia aula kan, sakuna baha nani ra sut sauhki tikan.

²³ Kan Amón bara Moab uplika nani ba, Seír, tawanka nani il tara nani ra kan ba ra aiklabi sauhki tikan aiska sut; baha ningkara witin nani ai tila kat pana pana sauhki tiki banhwan kata.

²⁴ Juda waitnika nani ba upla iwras tasbaya ra wih kaikan piua ra, ai waihla nani ba sut pruan kata, tasba ra prawi banhwi kan, upla kumi sin baha wina swak takras kata.

²⁵ Bara baha ningkara Josafat ai uplika aikuki kupia tanh krawan, ai waihla nani diara swih wan ba wih wahbi briaia. Witin nani wan bara aiklabaia dukia nani, kwala nani bâra kan, bara baha sut witin nani wahbi kan. Diara ailal pali kan bamna, sut bri waia sip apia kan. Baha diara ailalka ba yu yumhpa wahbi kan.

²⁶ Yu walhwal luan ningkara, Beracá twiya langnika ra asla taki banhwan, bara bahara witin nani Dawan ra yamni win. Baha mita pliska ba nina mâkan Beracá twi langnika, bara naiwa kat baha nina ba kau mâkisa.

²⁷ Baha ningkara, Juda bara Jerusalem uplika nani sut lilia pali kli tawi balan, Josafat ai tâura aimaki kan, Dawan bui lilia daukan ai waihla nani pura luanka bâk.

²⁸ Witin nani Jerusalem ra wan ba ra, gitar tara nani, sirpi nani bara trumpit nani binka dauki Dawan tempelka ra diman.

²⁹ Ai dahra wali banhwan taim Dawan ba Israel waihla nani ba mapara aiklaban, nisan wala nani ba sut Gâd ra sibrin lukan.

³⁰ Bamna baku Josafat kingka lâka ba ai kainara wan kata yamni lâka ra, kan Dawan bui kupia kumi lâka ra iwaia daukan ai lamara iwi uplika aikuki.

Josafat king aimakan ba sturka prahni

³¹ Bamna Josafat lika Juda ra king aimakan ba ra witin 35 mani bri kata, bara 25 mani Jerusalem ra king aimakan. Ai yapti nina ba Azubá mâki kan, bara Silhí luhpia mairin kata.

³² Josafat ba kasak lâka ra, ai kingka lâka ba brih wan kata. Ai aisa Asá kan baku, ai daukanka nani ba Dawan mawanra wapni baman kata.

³³ Ban sakuna, aidul ra pura sunaia pliska idan nani bri kan ba kau sakras kan, kaikan tawan uplika nani ba kau kasak bapi buras kata, Dawan nina blikaia ai damika nani bliki kan ba baku.

³⁴ Witin ai sturka nani wala, tâ krikan wina prakan kat ba, Jehú ai ulbanka ra sa, Hananí luhpia, bara Israel kingka nani ulbi sakanka tilara sa.

³⁵ Baha ningkara, Josafat, Juda kingka, Ocozías Israel kingka wal ai uplika takan, sakuna mahka ai tawanka ra saura praut lâka ra rausauhki bri kan.

³⁶ Wal ai uplika takan slaup tara nani paskaia dukiara, baha wina Tarsis ra waia, bara paski banhwan kata Esión-guéber ra.

³⁷ Bamna Eleazar Maresá wina ba, Dodavahu luhpia, Josafat mapara Dawan bui marikan naku aisaia: “Dawan ba diara daukram nani ba yuya baman daukbia, Ocozías wal asla takram bamna.” Bara kasak pali, slaup tara nani ba yuya baman takan kata, bara sip Tarsis ra waras kan.