2 Kronikas 19 - DAWAN BÎLA AISKA

Prapit Jehú ba Josafat ra lawi daukisa

¹ Josafat Juda kingka ba pruras ai rayaka yamni wal balan Jerusalem ra king watla ra.

² Sakuna prapit Jehú, Hananí luhpia ba, witin ai mapara taki wan bara win: “¿Dîa muni upla saura ra tâ baikisma, bara Dawan wailhka wal uplikam takisma? Baha mita Dawan mai lawisa.

³ Ban sakuna, diara yamni nani manis bâra sa tâm baikaia, kan Aserá lilka nani sut sauhki tikram tawan bilara kata ba, bara Dawan ra plikram.”

Josafat bui wihta nani mangkisa

⁴ Josafat Jerusalem ra iwi kan, sakuna ai tawanka ba wapi kaikaia lâka bri kata, Beerseba wina Efraín ilka nani kat, upla nani ai damika nani Dawan Gâdka ra kli lakaia dukiara.

⁵ Bara sin wihta nani mangkan tawan bani kaina sunanka bri ba ra Juda ra, tawan kumi wina tawan wala kat.

⁶ Bara witin bui wihta nani ba ra win: “Aman kaiki bas man nani dîa daukisma ba, kan lâ daukaia ba upla nina ra apia, sakuna Dawan nina ra kaia sa, witin lika man nani wal sa upla lâka daukisma piua ra.

⁷ Bara Dawan ra kulkanka yas, bara sin damra wali banhwi bas dîa daukisma ba, kan Dawan wan Gâdka ba, lâ kat daukras nani ra yamni kaikras, pâtkira nani ra ban swin kabia apia.”

⁸ Josafat sin Jerusalem ra Libait nani, prîs nani kum kum bara Israel ra utla lalka nani sin mangkan prîs nani kaia witin nani ai taya tilara, bara Jerusalem ra upla nani iwi ba unsabia kaka pura kaiki kaia dukiara.

⁹ Bara naha lâka nani mangki yabata: “Man nani piu bani ra Dawankam ra kulkram kaia sma, kasak wapni lâka ra.

¹⁰ Ani piua uplikam nani unsabi kaka, tawan bani luhpia nani, bara man nani mamwanra kahban kabia, man nani laki kaikaia upla pruan lâka apia sapa, bara lâ sâtka nani kahbaia, lâ ulbi tawan dukiara sa kaka, nahki alki daukaia lâka bara daukan kabia, maisa paks lâ wina tnaya ra tawi Dawan mapara buaia apia, baku witin kupia baiwbia apia man nani wal bara witin nani wal sin apia.

¹¹ Prîs tara Amarías ba man nani wihtkam kabia, Dawan ra mayunaia warkka sut daukbia, bara Zebadías Ismael luhpia ba, Juda tawanka lalka kabia, tawan lâka nani ba dauki kaia dukiara. Bamna Libait nani ba lika man nani tâm baiki kabia wark dauki kaia. ¡Bara ya yamni dauki ba Dawan baha wal kabia!”