2 Kronikas 17 - DAWAN BÎLA AISKA

Josafat kingka lâka ba

¹ Asá watlika ra ai luhpia Josafat king aimakan, witin bui Israel ra marikan ai karnika ba.

² Bara witin suldiar nani aihwakaia swin Juda tawanka tara nani sut ra Juda tasbaya ra, bara Juda tasbaya ra bara Efraín tawanka nani sut ra suldiar takaskaia watla mâkan, witin ai aisa Asá mita aiklabi pura lui brin tawanka nani ba ra.

³ Dawan ba Josafat wal kata, kan witin ai damika Debit kau wahma kan daukan ba baku witin sin daukan bamna, Baal lilka sât sât daukan ba warkka daukras kan,

⁴ sakuna ai aisa Gâdka ra lika, ai bîla lâka nani ba alki dauki, Israel luhpia nani nina lika blikras.

⁵ Baha mita, Dawan ai kingka lâka ba karna daukan. Juda aiska prisant nani yabi kan, bara lalah uya brin, kulkanka sin.

⁶ Bara ai kulkanka ba tara sa luki ai kainara impakan, Dawan bui yan bamna, kli Juda wina sakan kata aidul nani pura sunaika pliska nani, bara Aserá lilka nani sin.

⁷ King aimakan mani yumhpa alkan ba ra, ai wark uplika nani Ben-hail, Abdías, Sakaraya, Natanael bara Micaías, Juda tawanka ba marikaia blikan,

⁸ bara witin nani aikuki sin Libait nani Semaías, Netanías, Zebadías, Asael, Semiramot, Janatan, Adonías, Tobías, bara Tobadonías. Witin nani aikuki wan prîs nani Elisamá bara Joram.

⁹ Baha nani blikan wan kata Dawan lâ wauhkataya bri ba wal, Juda uplika nani ra smalkbia dukiara. Bara witin nani Juda tawanka nani aiska ra tauki banhwan.

¹⁰ Baha tilara, Juda lamara king nani uya bâra kan ba, Dawan ra sibrin daukan, baha mita Josafat mapara war aiklabaia lukras kata.

¹¹ Ban sakuna, kau ni filisteo nani kum kum ba prisant nani blikan, silbar ai lal mana Josafat ra bara Arabia uplika nani lika 7,700 sîp, guts nani sin 7,700 brih wan.

¹² Bamna Josafat kau karnakira tara pali taki auya kata. Juda ra kan kahbaika pliska nani paskan bara tawan nani diara auhbaika pliska sin.

¹³ Bara Juda tawanka nani ra diara ailal bri kata. Baku sin suldiar kupia karnika nani sin uya bri kan Jerusalem ra.

¹⁴ Baha nani nina ba wauhkataya ra ulban sa, ai taya nani bani nina ba naku sa: Juda ra kan kamandanti suldiar wihtka tara baku Adná, witin tâ bri kan ba 300,000 aiklaklabra.

¹⁵ Naha tâ uplika kata ba wal tâ uplika wala witinka wal kan, nina ba Johanán, witin 280,000 suldiar nani bri kata.

¹⁶ Bara baha tilara sin kata Amasías, Zicrí luhpia, witin ai kupia aiska wal wan Dawan warkka dauki kan, witin suldiar kupia karnakira nani 200,000 bri kata.

¹⁷ Benjamín nina ra kan, Eliadá war aiklaklabra kupia karnika ba, witin nani 200,000 aiklaklabra nani ai mihta ra bri kan, ai kaina sunaika nani bara trisba nani sin.

¹⁸ Bara Jozabad sin suldiar nani bri kata 180,000 waitna nani, war ra waia ridi uplika nani.

¹⁹ Naha nani na king suliarka nani kan, bara Juda aiska ra tawan nani kaina sunaika nani ra suldiar blikan nani ba lika kulkras kata.