2 Kronikas 15 - DAWAN BÎLA AISKA

Asá bui Gâd mayunaia lâka daukan ba

¹ Azarías, Oded luhpia, Dawan spiritka aiska brin,

² bara taki wan Asá wal prawaia, bara naku wiaia: “¡Asá, man ai wals, bara Juda bara Benjamín uplika sut! Dawan ba man nani wal sa, man nani sin witin wal sma kaka. Man nani bui witin plikma kaka, saki banhma; sakuna witin wina laihura wama kaka, witin sin mai swibia.

³ Israel ba piu wihka pali kan Gâd kasakkira ba wina laihura kan, prîs nani âpu, Dawan yabalka smalkanka marikaia sin âpu.

⁴ Ban sakuna ai pâtka nani tilara, tawan uplika ba Dawan ra tawan, Israel Gâdka ra, bara sin plikan, witin mihta sin param takan.

⁵ Baha piua nani ra kupia kumi lâka âpu kan, kau yabal ra upla nani ra dara walras alki kan.

⁶ Nisan nani bara tawan nani ba pana pana aiklabi slingwi tiwaia kata, kan Dawan bui pâtka nani yaban ba bri kata bamna.

⁷ Sakuna man nani kupiam karna bris, bara sari taki banhpara, kan man nani warkkam ba mana yamni brima.”

⁸ Asá naha sturka walan ba ra prapit ba wina, ai kupia karna takan, bara aidul nani aihka saura bâra kan ba Juda bara Benjamín tasbaya ra, bara sin tawan nani Efraín untika pîska ra kan dakbi brin nani bâra kan ba, sut sauhki tikan; bara Dawan altarka kli paskan, baha tempel kutbanka bilara latka mawan kat kan yaba.

⁹ Baha ningkara Juda bara Benjamín wâlsut asla daukan, bara sin tasba wala wina balan kan nani ba, Efraín, Manasés bara Simian tasbaya wina, kan Israel wina baha nani Asá ra tawi banhwan kata ba, kan kaikan Dawan ba witin wal kata.

¹⁰ Jerusalem ra asla taki banhwan, kati yumhpa diman mani 15 mani nani Asá king aimakan piua ra.

¹¹ Bara baha yua ra Dawan ra 700 bîp bara 7,000 sîp sakripais daukan ai waihla wina nani dakban daiwra nani kan ba.

¹² Baha ningkara pramis taki banhwan, kulkanka tara pali wal, ai kupia aiska wal Dawan ba plikaia, ai almukka nani Gâdka ba.

¹³ Bara pramis taki banhwan, ani uplika, ya kabia Dawan plikras ba, Israel Gâdka ra, almuk, tuktan, waitna, mairin kabia, prura mihta ra mangkan kabia.

¹⁴ Swer taki banhwan ai Dawanka ra ai bîla tara wini, ai lilia tara ba wal, trumpit binka dauki bara aringka puhbi kira.

¹⁵ Juda aiska lilia takan, upla nani ai kupia aiska ni Dawan ra swer takan bamna, ai lukanka aiska kira Dawan ra plikan bamna, bara witin sin param takan bara kupia kumi lâka yan, ai lamara iwi tawanka nani ba wal.

¹⁶ Baha purkara, king Asá bui kwin yapti lâka wina sakan Maacá ra, ai kukika ba, Aserá lilka kum paskan ba tâwan. Baha lilka kata ba Asá bui baiki sauhki tikan, bara angkan luan Cedrón tingnika ra.

¹⁷ Bara Israel ra gâd bahki wal aisaia watla nani ba ai tila wina sakras kan, Asá ban Dawan ra kasak luki kan,

¹⁸ bara Gâd tempelka ra bri si mangkan gul nani bara silbar sut, bara witin aisa wâlsut baha Dawanka ra tniwan.

¹⁹ Bara Asá king aimaki ban ba piua ra 35 mani war aiklabras kan.