2 Kronikas 14 - DAWAN BÎLA AISKA

Asá kingka lâka ba Juda ra

¹ Abiam pruan ba ra, Debit Tawanka ra bikan. Baha ningkara witin ai watlika ra ai luhpia waitna, Asá king aimakan. Witin king aimakan ba ra, kupia kumi lâka bâra kan, ai tawanka ra mani matawalsip.

² Asá daukanka nani ba yamni wapni kan, Dawan ai Gâdka mawanra.

³ Tringsar nani gâdka altarka bâra kan ba sut sakan, ai pura sunaia pliska nani gâd bahki ra witin nani dawan wal aisaia bri kan pliska nani ba sin baiki tikan, baku sin Aserá lilka nani kan ba sut kalki tikan.

⁴ Bara sin Juda uplika nani ra win, ai Dawanka ba plikbia, ai damika nani Gâdka ba, bara lâka nani, adarka nani sin.

⁵ Juda wina altar bahki pura sunaia pliska kan ba sut sakan, witin ai piua sut ba kupia kumi lâka bâra kan.

⁶ Baha piua nani sut brin ba, kupia yamni lâka bâra kan, aiklabaia lâka âpu kan upla wal, kan Dawan bui kupia kumi lâka yaban kan bamna. Baha pali piua ra Asá ba Juda ra tawan nani paskan, kaina sunaika nani sin.

⁷ Juda uplika nani ra win: “Kaisa tawan nani na paskaia, kutbanka nani sin paskaia, tawer nani, getka nani bara ayan nani ba sin, kuntrika na kau yawan wan karnika ra bri na piua ra. Kan yawan sika Dawan wan Gâdka ra plikan, witin sika yawan ra kupia kumi lâka wankan ba wan uplika nani wan lamara iwi nani ba aikuki.” Bara baku witin nani baha dukia nani ba sut pain paskan.

⁸ Asá lika Juda wina 300,000 aiklaklabra nani brin, bara Benjamín wina sin 280,000 suldiar nani brin baha nani sin trisbaya bara ai kan kahbaika nani bri kan. Witin nani sut ba kupia karna kan.

⁹ Witin nani mapara Zérah Etiopía wina ba sin wan, suldiar 1,000,000 aikuki, war waginka 300 bri kan, bara Maresá kat wan.

¹⁰ Asá ba taki wal prawan ai waitnika nani wal, bara ai pliska brin war aiklabaia Sefata twiya ra, baha ba Maresá lamara kata.

¹¹ Asá ba Dawan ai Gâdka ra ai pura sunan: “Dawan, tâ baikaia natka ba man mampa ra kumi sa swapnikira, apia kaka karnakira ra. ¡Bamna wan tâ baiks, Dawan wan Gâdka, kan yawan man ra bîla kaikanka brisa, man wan munram balan naha suldiar nani mapara aiklabaia! Man Dawan, wan Gâdka sma. ¡Mariks man mampara sip upla buaia apia ba!”

¹² Bara Dawan bui Asá bara Juda wal ra pura luanka lâka yaban Etiopía uplika nani mapara, baha mita naha nani mahka plapan.

¹³ Sakuna Asá ai uplika nani wal nina blikan Guerar kat, bara Etiopía uplika nani ba kumi sin raya swiras kan, sut ba sauhki tikan Dawan mawanra, ai suldiar nani ba sut sin, ningkara ai waihla nani dukia diara ailal brin.

¹⁴ Baha ningkara tawanka nani aiska purara kauhan Guerar lamara nani ba ra, bara upla sut sibrin ni aibanhwan kata Dawan mapa ra. Juda uplika nani mita alki taibi dukia dakban, diara yamnikira nani ailal kan ba sut.

¹⁵ Baku sin bîp nani ailal bâra kan ba kiampka ra sin wih aiklaban, bara dakbi brih wan sîp nani ailal, kiamil nani sin ailal, bara witin nani kli Jerusalem ra tawi balan.