2 Kronikas 13 - DAWAN BÎLA AISKA

Abiam Juda ra king aimakan ba

¹ Abiam mahka Juda ra king aimakan Jeroboam pat 18 mani king aimaki kan piua ra.

² Jerusalem ra mani yumhpa king aimakan. Ai yaptika ba nina Micaías kan bara Uriel Guibeá wina ba luhpia mairin kata. Abiam bara Jeroboam wal tilara war ba baiwan kata.

³ Abiam 400,000 suldiar nani bâk saki brih war bukan, bara Jeroboam sin 800,000 suldiar nani bâk saki brih witin mapara wan.

⁴ Bamna Abiam, Semaraim untika purara bûi kata, bara Efraín untika winan ai bîla baikra tara wal winan: “¡Jeroboam bara Israel aiska sut, ai wali banhs!

⁵ ¿Man nani kaikras sma ki, Dawan, Israel Gâdka ba, king lâka Debit ra yaban ba bara ai kiamka nani ra sin, ban kaia ra ban lâ kum daukan ba, sip aihka takras ba?

⁶ Ban sakuna, Jeroboam Nabat luhpia Salaman albika, Debit luhpia ba, ai dawanka mapara buan.

⁷ Bara witin ra asla takan kata, waitna sringwaskira nani, lukan saura bri nani ba, bara Roboam mapara buan, witinka Salaman luhpia ba, kan witin ba wahma kan bara lukanka swapni kan. Baha mita karnika âpu kan ai waihla nani mapara buaia.

⁸ Bara nanara man nani Debit kiamka nani wark dauki bâk Dawan ai warkka dauki ba mapara buaia trai kaikisma, kan man nani kau ailal sma ba mita, bara Jeroboam sin gul ni bîp nani paski gâdkam nani maikan brisma ba mita.

⁹ ¿Bara Eran kiamka Libait Dawan prîs nani ba sin man nani mita kangbram wan apia, bara man nani mita idan prîs nani ba mangkram apia aidul nisan wala nani dauki baku? ¡Ani uplika kabia bal bîp wainhka kum sîp 7 bri ai gâdka nani ba prîs mangki pura sunaia!

¹⁰ Sakuna tani wala ra, yang nani maipa ra wan Gâdka ba Dawan sa, bamna witin ra lulki swiras. Prîs nani Dawan warkka dauki nani ba Eran kiamka nani sa, bara warkka alki dauki nani ba Libait nani sa.

¹¹ Witin nani ba titan bara tutni ra sin Gâd ra sakripais yabisa, bara sîka mâka kîa painkira nani sin tibil kum ra suni mayunanka tara daukisa, kasak lâka ra brit holikira ba wal; bara sin tutni bani, lamp nani ba angkisa gul kiandilka dusa nani ra, kan yang nani Dawan Gâd lâka nani ba alki daukisna, sakuna man nani lika witin wina laihura takram sa.

¹² Damra wali banhwi bas, kan yang nani kainira Dawan ai prîska nani aikuki bâra sa, bara ridi banhwisa war trumpit ba puhbaia man nani mampara. Baha mita, Israel luhpia nani, Dawan mapara war bukpara, kan almukkam nani Gâdka sa, bara man nani sip pura luma apia.”

¹³ Jeroboam adar yaban kan, ai suldiar nani ninara aula ba, kaina kir kutbi nina wina aiklabaia, baku ba ra Jeroboam suldiarka kau kwâra ba mawan tani wina aiklabaia Juda mawan ba kat, bara suldiar nani ninara aula kan ba, nina wina aiklabi kan.

¹⁴ Juda uplika nani ai ninara tawi kaikan, bara ai dahra walan witin nani ra nahki aiklabi kan ba ai nina wina bara ai mawan wina, bara witin nani Dawan ra winan, bara prîs nani sin trumpit ba puhban.

¹⁵ Bara Juda uplika nani war binka nani wal winan ba ra, Dawan bui Jeroboam ra pura luan bara sin Israel aiska sut Abiam bara Juda mawanra.

¹⁶ Israel luhpia nani ba Juda sîa plapata, kan Dawan bui witin nani mihta ra mangkan bamna.

¹⁷ Abiam ai uplika nani aikuki Israel luhpia nani ba kasak ikan, Israel suldiarka pain nani ba 500,000 pruan.

¹⁸ Baku Israel luhpia nani ba, kasak umpira yaban takan baha piua ra, sakuna Juda uplika nani lika karna pali ai dara wali kata, kan Dawan ra kasak lukan ba mita, ai almukka nani Gâdka ba.

¹⁹ Abiam ba Jeroboam nina blikan, bara Betel, Jasaná bara Efraín tawanka nani ba mihta dakban, ai tawanka sirpi nani tnaya ra kan ba sut kira.

²⁰ Jeroboam ba kli sip ai karnika briras kata, Abiam raya kan ba piua ra. Tnata ra Dawan bui Jeroboam ra klala yan bara witin pruan.

²¹ Bara piua tilara Abiam ba kau karna taki kan. Ai maya mairin 14, ai luhpa waitna 22 bara ai luhpia mairin 16 bri kan.

²² Abiam sturka nani wala bara dîa daukan sut ba, prapit Iddo aisinka bîla nani ra ulban sa.