2 Kronikas 12 - DAWAN BÎLA AISKA

Sisac bui Juda dakbi brin

¹ Roboam kingka lâka karna takan, bara witin ai dahra walan witin ba karna sa, bamna Gâd lâka wina tnaya ra tawan, Israel luhpia nani sut sin witin daukan baku daukan.

² Baha nani lukras kan Dawan ra, bara king Roboam ai kingka lâka mani matsip bri kan ba ra, Sisac, Idsip kingka ba, war daukan Jerusalem mapara,

³ bara 1,200 wagin nani, aras ra uli aiklabi nani ba 60,000, bara war uplika kwâra tara wal, Idsip wina witin wal aula kan ba aikuki: Libia uplika nani, suquieno nani bara Etiopía uplika nani sin.

⁴ Bara Juda tawanka nani karna daukan kata ba pura luan, bara Jerusalem kat wan.

⁵ Bara prapit Semaías ba Roboam ra wan bara baku sin Juda wihtka tara nani aikuki Jerusalem ra asla taki banhwan kan ba, Sisac dimi aula ba dukiara aisi banhwan kata: —Dawan bîla man nani bui witin ra lulki swiram ba mita, witin sin man nani mai lulki swin, bara nanara man nani Sisac mihta ra mai swisa.

⁶ Israel wihta nani bara king ba sin baha lâka ba bawikira ai dara wali banhwan: —¡Dawan ba ai raitka brisa!

⁷ Dawan kaikan baha nani bawan lâka brin, bara Semaías ra win: “Witin nani bawan bamna, yang sauhki tikamna apia, tisku pali pri daukamni, bara Sisac ra sin yarka lawanki Jerusalem purara bri wabia apia;

⁸ ban sakuna upla wala mihta ra kabia, bara ai dahra walbia aihka ba tânka, yang wal kaia, apia kaka king wala nani kiamka wala nani tilara kaia ba.”

⁹ Sisac, Idsip kingka ba, Jerusalem ra war aiklabi pura lui, Dawan tempelka wina bara king watla wina sin, diara kukan nani ba brin. Salaman mita gul ni aiklabi kan kahbaika nani paskan ba sut brih wan.

¹⁰ King Roboam baha pliska ra kaina kahbaia bras ni daukan nani kan ba, suldiar nani yaban main kaiki kata, king watla dimaika ba kat.

¹¹ Ani piua ra king ba Dawan watla ra dimaia wi kan ba ra, suldiar nani bui brih wi kata, ningkara kli ai rumka ra bri si swi kan.

¹² Baku bamna, Roboam Dawan lâka brin bara Dawan lawanka nani witin purara waras kan, baha ba mita aiska sauhkras kata. Ban sakuna, Juda ra saura nani tilara yamnika nani sin bâra kan.

¹³ King Roboam ba ai karnika ba kau brin Jerusalem ra, bara ban king aimaki kan. Witin nan king aimakan ba ra pat 41 mani bri kan, bara witin 17 mani king aimakan Jerusalem ra, baha sika Dawan mita bâk sakan tawanka ba Israel kiamka nani bahara kaia dukiara. Roboam yaptika nina ba Naamá kan, Amón wina.

¹⁴ Ai daukanka nani ba saura kan bara kasak pali ai kupia ra Gâd plikaia lukras kan.

¹⁵ Roboam sturka nani kaina wina tnata kat prapit Semaías sturi almuk nani ulbanka ba ra sa, bara prapit Iddo sin ai kiamka nani ulbi bri nani ba tilara sa.

¹⁶ Bara piua bani war aiklabi kan Roboam Jeroboam wal.

¹⁷ Bara Roboam pruan ningkara, Debit Tawanka ra bikan. Baha wina ai luhpia Abiam ba ai watlika ra king aimakata.