2 Kronikas 11 - DAWAN BÎLA AISKA

¹ Roboam Jerusalem ra wan ba ra, upla nani asla paiwi 180,000 wahbi sakan suldiar nani Juda kiamka wina bara Benjamín kiamka wina sin, witin nani wal Israel mapara war aiklabi bara ai kingka lâka ba kli briaia lukan.

² Sakuna Dawan bui Semaías Gâd uplika bâk aisin bara adar yaban:

³ “Roboam, Salaman luhpia waitna Juda kingka ra, bara Israel luhpia nani sut Juda wina Benjamín wina nani ba ra wis,

⁴ witin nani ra adar yabisna ai muihni nani Israel luhpia nani mapara aiklabia apia. Witin nani kumi bani kli ai watla ra tawi wabia, kan naha na yang mita baku daukri sa.” Naha Dawan aisin wali banhwan ba ra, mahka ai watla nani ra tawi wan, bara Jeroboam mapara lika waras kata.

Roboam piua yamni brin ba

⁵ Roboam ba Jerusalem ra iwan, bara kaina kahbanka bri tawan nani kau paskan Juda ra.

⁶ Baku natka ra Betlehem ra kau tâ baikan, Etam, Tecoa,

⁷ Bet-sur, Socó, Adulam,

⁸ Gat, Maresá, Zif,

⁹ Adoraim, Laquis, Azecá,

¹⁰ Sorá, Aialón bara Hebrón, naha nani lika kaina kahbanka bri tawanka nani kan Juda bara Benjamín wal ra.

¹¹ Karnika bri pliska nani ba kau karnika yaban, bara kumi bani tâura kamandanti nani mangkan, baku sin plun nani, batana laya bara wain sin ailal yan kata.

¹² Baha nani tilara sin yaban kata langsa nani, kaina kahbaika mihta dukia nani, bara tawanka bani ra kaina sunaika tara pali yan, baku ba mita Roboam ba bahara ai pliska brin, Juda bara Benjamín ra.

¹³ Prîs bara Libait nani Israel aiska wina bali banhwan, witin nani wal asla takaia,

¹⁴ baku ba mita Libait nani ba ai tasbaya swih taki wan, ai daiwra sahwaia pliska nani swin, ai pliska wala nani sin, Jerusalem ra waia dukiara bara Juda pliska nani wala ra sin, kan Jeroboam bara ai uplika nani wala ba wal witin nani ra kaina dakban, kli prîs warkka daukbia apia dukiara.

¹⁵ Jeroboam ba ai prîska nani mangkan kata, baha ba gâd nani tempelka nani ra, pirit saura ra pura sunaia, bara lilka nani paskan ra sin ai pura sunaia, upla ai mihta wal paskan ba.

¹⁶ Ban sakuna, kasak pali Dawan ra ai kupia aiska ni plikaia luki nani ba, Dawan Israel Gâdka ra, Libait prîska nani lâka nina blikan; bara Jerusalem ra wih banhwan sakripais daukaia ai almukka nani Dawan Gâdka ra.

¹⁷ Baku natka ra, Juda kingka ba karna daukan kata; bara Roboam Salaman luhpia ra tâ baikan mani yumhpa baman. Mani yumhpa baman nina blikata.

¹⁸ Roboam ba Mahalat ai maya brin, witin ba Jerimot luhpia mairin, Debit bara Abihail wal luhpia ba, Eliab luhpia ba, bara baha ba Jesé mulika.

¹⁹ Roboam bara Mahalat wal luhpia nani ba naha nani kata: Jehús, Semarías bara Záham.

²⁰ Baha ningkara Maacá wal marit takan, witin ba Absalón luhpia mairin, bara ai luhpia nani sakan Abiam, Atai, Zizá bara Selomit.

²¹ Roboam ai maya nani 18 bri kan bara ai lila mairin nani lika 60, sakuna baha sut tila wina, witin Maacá kau latwan kaiki kan. Ai luhpia waitna 25 bri kan bara ai luhpia mairin nani lika 60.

²² Roboam ba ai luhpia waitna Abiam ba ai luhpia wala nani sut ba lalka mangkata, kan witin ba sin king mangkaia luki kata.

²³ Ai luhpia nani sut ra ai yuyaka nani saki yaia lukan, Juda bara Benjamín tasbaika nani ra, baku sin tawan wala nani kaina kahbanka bri kan ra plun ailal yan, bara pliska bani ba ra mairin ailal pliki yaban.