2 King Nani 9 - DAWAN BÎLA AISKA

Jehú ba Israel kingka kaia batana laya yukisa

¹ Bara prapit Ilaidsa mita prapit nani daknika tila wina kum paiwan balan, bara win: —Taki waia ridi bas. Naha batanka laya na bris bara Ramot Galaad ra was.

² Man bahara wama ba ra, Jehú Josafat luhpia kaikma, Nimsí mulika ba. Bara man dimi was, witin anira ba kat, bara man mita witin ba yakan saki ai uplika nani ba wina rum wala ra brih was.

³ Ba ningkara, man batana laya batilka ba brih ki lal ra laiks, bara wis: ‘Dawan naku win sa: Yang mita Israel kingka kaia mai mangkisna.’ Bara ningkara dur ba bukutbi takaskras plaps.

⁴ Bara naha prapit wahma ba Ramot Galaad ra wan.

⁵ Bara witin wih diman ba ra, war wihtka nani ba bahara iwi banhwi kan. Bara witin mita win: —Kiaptinki ra yang diara kum wiaia brisna. Bara Jehú mita win: —¿Yang nani sut na tilira, baha ba ya kabia ki? Bara witin mita win: —Kiaptin, baha ba man sika.

⁶ Bara Jehú baha wina buan, bara utla ra diman. Bara prapit mita ai lal ra batana laya ba laikan, bara win: —Naku wisa Israel Gâdka ba: ‘Yang bui Israel kingka mai mangkisna, baku upliki nani tâ brima.

⁷ Ahab kiamka nani ba sut âpu daukma, man dawankam, baku yang daira aisasara nani ba tâlia mana pana yamna, baku sin Jezabel mita duki dadaukra nani iki tikan tâlia mana ba dukiara sin.

⁸ Ahab taya nani sut ba sin sauhki tikan kabia, bara Israel ra waitna nani bani ba sin âpu daukamna, bara kumi sin raya kabia apia.

⁹ Baku sin Ahab kiamka bara Jeroboam Nabat luhpia waitna kiamka nani ra daukri ba baku, witin nani wal sin daukamna, baku sin Baasá, Ahías luhpia waitna kiamka nani ra daukri ba baku.

¹⁰ Bara Jezabel ba lika, Jezreel twiya ra yul nani mita pibia, bara upla kumi sin âpu kabia bikaia.’ Baha sut win ningkara, prapit dur ba saki mahka plapan.

¹¹ Naha diara nani ningkara Jehú ba ai kiaptinka wihtka nani ra wan, bara naha nani bui makabi walan: —¿Dîa trabil? ¿Dîa dukiara naha grisi na man ra balan? Bara witin bui pana win: —Man nani ba kakaira sma bara witin ai daukanka ba sin kakaira sma, nahki ai aisinka natka ba tânka brisma.

¹² Bara witin nani mita win: —Kunin wan munpara. ¡Kapu, sturi sut ba wan wis! Bara Jehú pana win: —Bara naha tânka nani ai win sa: ‘Dawan ba naku wisa: Yang bui Israel kingka kaia mai mangkisni.’

¹³ Bara kumi bani ai prâka ba brin bara Jehú mina munhtara mangkan, tips mina nani ba purara. Ningkara daiwan aringka ba puhban, bara wini banhwan: “¡Jehú ba king sa!”

Joram Israel kingka ba Jehú mita ikan

¹⁴ Jehú, Josafat luhpia bara Nimsí mulika ba, Joram mapara saura daukaia luki kan. Bara Joram ba lika, Ramot Galaad wina ba tâ baiki kan Israel luhpia nani sut aikuki, Hazael Siria kingka kra dimbiara sîa,

¹⁵ kan Jezreel ra kli tawi balan kan ai insauhkanka ba wina rawaia dukiara, Siria kingka wal aiklabi kan insauhkata ba. Bara Jehú bui ai pânika nani ra win aitani lukisa kaka witin ba witin nani ai kingka kaia, upla kumi sin tawan ba wina yaka taki wabiara Jezreel ra sturka ba wiaia.

¹⁶ Ningkara Jehú ba ai war waginka ra ulan bara Jezreel ra wan, Joram siknis ba pliska ra. Baku sin Ocozías Juda kingka ba, Joram kaikaia wan.

¹⁷ Bara aihwawakra ba Jezreel ra tawer kata pura ba wina kaikan, Jehú daknika ba aula kan kaikan. Bara winan. —¡Upla nani aula! Bara Joram adar yaban: —Upla kum saki aras purara blîks wih kaikbia, bara makabi walbia witin nani ba kupia kumi lâka wal aula sapa.

¹⁸ Bara uplika ba aras ra uli wan kaikaia, bara win: —King ba makabi walisa kupia kumi lâka wal man nani aulma sapa. Bara Jehú mita win: —Kupia kumi lâka dukiara walaia ba man bisnis apia. ¡Bahara yang ninira taws! Bara aihwawakra ba mita maisa paki win: —Sturi twatwilkra ba witin nani kat wan, sakuna kli tawi balan kaikras sa.

¹⁹ Bara kli aima wala ra upla wala saki aras purara blikan wan, bara witin ba baha nani ra wan bara win: —King ba makabi walisa man nani ba kupia kumi lâka ra aulma sapa. Bara Jehú ba pana win: —Kupia kumi lâka dukiara walaia ba, man bisnis apia. ¡Bahara yang ninira taws!

²⁰ Bara aihwawakra ba kli tânka pain win: —Naha uplika wala nani na sin witin nani ra wan, ban sakuna kli tawi balras tiwan. Bara wagin waki ba Jehú Nimsí luhpia waitna ba talia sa, kan tanis baman baha wakisa, witin nahki ai natka ba kat.

²¹ Bara Joram mita adar yabi win: —¡War waginki ba ridi dauks! Bara ridi daukan ba ningkara, Joram, witin Israel kingka, bara Ocozías, Juda kingka ba, kumi bani ai waginka nani ra uli taki wan Jehú wal prawaia. Bara witin nani lika witin wal Nabot Jezreel wina ba tasbaya kat prawan.

²² Bara Joram ba Jehú kaikan ba ra win: —¿Kupia kumi lâka sturka brih aulma ki, Jehú? Bara Jehú pana win: —¿Dîa kupia kumi lâka bâra kabia, man mamikam Jezabel ba ur takan baman tauki ba, bara sukia lâka ba sin swiras ba?

²³ Baha ningkara, Joram ba mahka taki plapan bara Ocozías ra wini, win: —¡Ocozías, pât aula!

²⁴ Sakuna Jehú ba ai pantamangka ba sakan, bara Joram ra trisba ba ni sabi kupia tartar baikan, bara ai waginka ba kat kauhi pruan.

²⁵ Baha ningkara Jehú ai aiklaklabra wihtka Bidcar ra win: —Baha wina saki Nabot Jezreel ba tasbaya pîska ba ra saki lulki swis, kan kupi krawisa man ba yawan wal aima kum Ahab aisika war waginka nani uli auya kan, witin dukiara Dawan bui pat naku lahtubi win kan:

²⁶ ‘Nahwala Nabot, bara luhpia nani tâlia kaikri ba baku, man sin dîa briaia aitani sma ba baha maikamna naha tasbaya ra. Yang, Dawan, kasak aisisna.’ Bamna nanara witin ba alki muni Nabot tasbaya kat bri si lulki swis, Dawan dîa aisin kan ba baku.

Jehú bui Ocozías ra ikan ba

²⁷ Naha diara takan na Ocozías Juda kingka kaikan ningkara, Bet-hagan ra plapan. Sakuna Jehú ba nina bliki adar yaban: —¡Witin ba sin iki banhs! Bara baku, Gur ilka ra Bet-hagan ra ai waginka ra uli ba kat saban, Ibleam lama ba kat, sakuna Ocozías ba Meguido kat plapi wih pruan.

²⁸ Ningkara ai albika nani balan waginka brih wîna ba Jerusalem kat bri si, ai aisika nani lamara bikan, Debit Tawanka ra.

²⁹ Joram Ahab luhpia ba pat mani 11 Israel ra king aimaki kan ba ra, baha piua ra Ocozías ba Juda ra king aimakan.

Jezabel pruanka ba

³⁰ Baha ningkara Jehú ba Jezreel ra wan. Bara baha walan taim, Jezabel ba ai mawan ba pain aiskahkan, ai tâwa nani ba sin pain pitban, ningkara windar bâk taki kaikan.

³¹ Bara Jehú ba tawan dimaika bâk dimi auya kan ba ra, mairin ba mita win: —¿Nahki sma, Zimrí, man dawankam âikra?

³² Bara Jehú ai nakra windar tani ra kaikan bara win: —¿Ya yang wal nâra sa ki? Bara wihta wâl, apia kaka yumhpa bal, witin ra biki kaiki kan.

³³ Bara Jehú adar yan: —¡Mairka ba tasba ra bataks! Bara witin nani bui witin ba tasba ra batakan, bara tâlia ba srikwi utla kutbanka ra alkan, aras nani ba sin, bara baha nani ba ni Jezabel purak taibi luan.

³⁴ Baha ningkara Jehú mahka wan, bara plun pin bara din. Ningkara Jehú adar yaban: —Man nani was bara baha mairka saurakira ba biki banhs, kan witin ba king luhpia mairin kum kan bamna.

³⁵ Sakuna witin ba bikaia wan ba ra, ai lal kamhka, ai mina nani bara mihta bîla nani baman kaikan, ai wîna lika apia.

³⁶ Bamna kli tawi balan bara Jehú ra win. Bara Jehú aisin: —Naha sika Dawan pat aisan kan ai prapitka Ilayas Tisbé wina ba bâk, Jezreel tasbaya ra yul nani mita Jezabel wîna tara ba pibia,

³⁷ bara Jezabel wîna tara ba daiwan tâskika ba baku kabia Jezreel tasbaya ba purara, baha mita upla kumi sin wibia apia baha sika Jezabel wîna tara ba.