2 King Nani 8 - DAWAN BÎLA AISKA

Sunem wina mairka ba ai kukanka nani ba kli brin

¹ Ilaidsa ba baha mairka luhpia pruan kan wina witin bui rakata ba wal aisin, bara win witin nani mahka taki wih plis wala ra iwbia ai watla uplika sut aikuki, anira iwaia sip ba kaka pliska ra, kan Dawan mita plun wahwan tara naha tasbaya ra blikaia maisa pakan kan, bara plun wahwanka ba mani nani 7 praiska kabia.

² Bara naha mairka ba buan, dîa Gâd waitnika win kan ba kat daukan; bara witin ai watla uplika nani sut aikuki wan, 7 mani filisteo nani tasbaya ra iwan.

³ Bara baha mairka ba 7 mani luan ba ningkara kli tawi balan ai tasbaya ra, filisteo nani tasbaya ba wina. Baha ningkara, king ra wan ai watla ba bara ai tasbaya ba yabia wiaia.

⁴ King ba Guehazí wal aisi kan, prapit Ilaidsa albika ba, kan makabi wali kan Ilaidsa diara aihkakira daukan ba sut wibia.

⁵ Bara Guehazí king ra aisi kan nahki mairin kum luhpia waitna pruan kan rakan ba, baha minitka ra yaptika wapi sut takan, witin lika ai watla ba ai tasbaya ba wal king ra makabaia aula kan. Bara Guehazí mita win: —Yang kingki tara, bika sika mairka, bara naha mairka luhpia sika pruan kan Ilaidsa mita rakan ba.

⁶ Bara king ba mita mairka ra makabi walan, bara witin nahki dauki rakan ba aiska king ra win. Ningkara, king ba mita wihta kum ai uplika aihwa pali ba ra adar yabi win, diara sut witin ai dukia kan ba aiska pali kli yabia, ai tasbaya bara ai dusa mâ nani ba sin sut yabia, baha yua witin nani naha tasbaya swin ba wina nanara kat.

Hazael Siria ra king aimakisa

⁷ Baha ningkara Ilaidsa ba Damaskus ra wan. Ben-hadad Siria kingka ba, baha yua ra siknis kan, bara witin ra maisa paki wi banhwan prapit ba balan sa.

⁸ Bara king ba Hazael ra win: —Prisantka kum bris bara was prapit ra. Bara witin ra wis Dawan ra aisabia, yang naha sikniska na wina rawamna sapa.

⁹ Bara Hazael prapit ba kaikaia wan, bara Damaskus wina prisant kau pain nani ba brin Ilaidsa ra yabaia. Kiamil nani 40 diara nani suni brih wan, bara witin wal prawan ba ra win: —Ben-hadad Siria kingka ba mita man ra ai blikan, mai walamna ai sikniska ba wina rawbia sapa.

¹⁰ Bara Ilaidsa pana aisin: —Was bara wis ai sikniska ba wina rawbia, ban sakuna Dawan mita yang ra param ai win ba lika, witin ba kasak pali pruaia ban sa.

¹¹ Bara Ilaidsa ba Hazael kat kaiki kan, bara aihka ai dara walan. Baha ningkara prapit ba inan,

¹² bara Hazael makabi walan: —¿Dîa kan man inisma, dawanki? Bara Ilaidsa pana win: —Kan yang kaikisni man mita Israel luhpia nani ra saura munaisma ba, kan kahbaika pliska nani ba sin pauta klauhira mukaisma, wahma nani ra sin sord ni iki tikaisma, tuktika nani lupia ba sin iki tikaisma, bara mairin kwihra nani ba sin ai biara nani ba wina kalki saki ikaisma.

¹³ Bara Hazael pana aisin: —¡Bara yang na dîa sna ki, yul wal sin kau umpira sna na! ¿Nahki baku diara tara nani daukamna? Bara Ilaidsa mita pana win: —Dawan bui yang ra param ai win sa, man ba Siria kingka kama.

¹⁴ Bara Hazael ba Ilaidsa lakula dauki si mahka ai kingka ra wan, bara witin ra makabi walan: —¿Dîa pali mai win Ilaidsa mita? Bara Hazael win: —Ai win man rawma sikniskam ba wina.

¹⁵ Sakuna baha yua ba luan ningkara, Hazael kwala kumi brih bara liura buski muni, Ben-hadad mawan ra prakan, bara witin pruan. Naha ningkara, ai watlika ra Hazael king aimakan.

Joram Juda ra king aimakan ba

¹⁶ Ahab luhpia Joram ba Israel ra king aimakan witin pat mani 5 bri kan ba ra, Joram Josafat luhpia waitna ba mahka Jusa ra king aimakan.

¹⁷ Witin ba pat mani 32 bri kan king aimakan, bara mani 8 Jerusalem ra king aimakan.

¹⁸ Sakuna dîa Israel kingka nani bara Ahab kiamka dauki kan baku witin sin daukan, bara ai daukanka ba Dawan nakra ra saura kan.

¹⁹ Baha sut pali daukan kuna, Dawan mita Juda ba sauhki tikaia brin daukras kan, ai albika Debit wal pramis daukan ba ra luki ba mita, kan witin ra win kan lamp ingnika kum baku ingwi kabia ai mawanra.

²⁰ Bara Joram king aimaki kan piua ra, Edom mita Juda mapara buan, bara witin nani mita ai kingka wala mangkan.

²¹ Bamna Joram ba Saír ra war aiklabaia wan war waginka nani sut bri ba wal, bara tihmia ra witin bara wagin nani kiaptinka nani bûi muni Edom aiklaklabrika nani wal aiklaban, bara yan plapi banhwata.

²² Sakuna Edom ba Juda wina pri takan, naiwa kat ban sa. Baku sin Libná tawanka ba baha yua wina pri takan.

²³ Joram sturka tâka bara diara wala nani witin daukan ba, Juda kingka nani sturka wauhkataya ra ulban sa.

²⁴ Bara Joram ba pruan ba ra, ai aisika nani raitika ra bikan Debit Tawanka. Ningkara ai watlika ra ai luhpia Ocozías king aimakan.

Juda ra Ocozías king aimakan ba

²⁵ Ahab luhpia waitna Joram pat mani 12 Israel ra king aimaki kan ba ra, Ocozías Joram luhpia ba Juda ra mahka king aimakan.

²⁶ Witin ba mani 22 bri kan king aimakan, bara witin mani kum king aimakan Jerusalem ra. Ai yaptika ba nina Atalía mâki kan, Omrí kiamka wina, witinka Israel kingka ba.

²⁷ Bara Ocozías ba Ahab ai taika nani king aimaki aikuki dîa dauki kan ba baku daukan, bara Ahab watla bîla uplika nani wal ai tânka pain apia mita, ai daukanka nani ba Dawan nakra ra saura kan.

²⁸ Ocozías ba Ahab luhpia Joram wal asla takan, Ramot Galaad ra war aiklabaia dukiara Hazael mapara, witinka ba Siria kingka. Sakuna Siria uplika nani ba mita Joram ra klakan,

²⁹ bara Joram Jezreel ra kli tawi wan ai wîna ra insauhkan nani brin ba sîka mangkaia, baha sika Siria kingka Hazael mapara Ramot ra aiklabi kan Siria uplika nani mita klakan ba. Bamna Joram siknis kan ba mita, Ocozías Jezreel ra wan witin ba kaikaia.