2 King Nani 6 - DAWAN BÎLA AISKA

Ilaidsa bui asa ba yaban awan

¹ Yu kum prapit nani ba Ilaidsa ra win: —Kaiks, naha pliska ra man wal yang nani iwisna na tutukwa sa.

² Bamna ai swis yang nani Jordan awala ra wamna, bara baha wina dus playa nani yang nani klaki, bahara yawan iwi kaia pliska paskamna. Bara Ilaidsa win: —Was man nani.

³ Bara kumi bui tila ba wina aisin: —Mamkabisna, man sin wan yula kahbi wama. Bara Ilaidsa bui win: —Aitani, yang lika man nani aikuki wamna.

⁴ Bara Ilaidsa lika witin nani aikuki Jordan kat wan, bara dus ba klaki banhwan.

⁵ Bara witin nani dus ba klaki kan ba ra, tila ba wina kum ba pat dus ba klaki batakan, bara ai asika ba liura swak taki dimwan, bara naku aisan: —¡Alakai, smasmalkra! ¡Asa ba upla wina lin taki bri balri kan, bara liura dimwan!

⁶ Bara prapit ba makabi walan: —¿Ani kat asa ba dimwan? Bara witin mita pliska ba marikan. Bara Ilaidsa dus kum klakan, bara bahara lulkan dimwan, bara asika ba yaban awi bal takan.

⁷ Bara Ilaidsa win: —Asika ba alks. Bara witin ai mihta sakban bara alkan.

Ilaidsa bara Siria uplika nani

⁸ Siria kingka ba war aiklabi kan Israel kingka ba mapara. Bara ai wihtka tara nani aikuki aisi kaiki win, ani pliska nani pali kat witin ai kiampka bapaia luki kan ba.

⁹ Bara Ilaidsa bui Israel kingka ra blikan maisa pakaia, baha pliska nani bâk lui wabia apia, kan Siria uplika nani ba bâk lui auya kan ba mita.

¹⁰ Baku bamna, Israel kingka ba mita baha pliska prapit mita win kan ba ra ai aiklaklabra daknika blikan wan, baku ba ra trabil balaia kan ba takaskan, bara baku aima ailal swakwi takan.

¹¹ Bara naha tâwan Siria kingka ba ai kupia tanis takan, bara ai wihtka tara nani ra winan balan, bara win: —¡Man nani param ai wis, yawan nani wan tilara yaba Israel kingka ba wal ai uplika sa sapa!

¹² Bara albika nani tila ba wina kumi ba mita naku win: —Apia, kingki tara, upla âpu sa. Sakuna prapit Ilaidsa, witin sika Israel kingka ra dîa takaia ba sut param pali wisa, king tara uplikam nani aikuki dîa yapaia rumka ra aisisma ba sut param saki wisa.

¹³ Bara Siria kingka ba bui win: —Makabi wals witin ba anira sa sapa, upla blikamna witin ba alkaia. Bara witin ba Dotán ra sa win ba ra,

¹⁴ king ba bui aras ra uli aiklaklabrika nani saki blikan, bara aiklabaia waginka nani, bara ai mina wapi aiklaklabrika nani sin ailal blikan wan, bara aiklaklabra tihmia ra wih ki tawanka ba kutban.

¹⁵ Bara yapra wala titan buan ba ra, Ilaidsa albika ba kaikan aiklaklabra nani, aiklabaia araska waginka nani ailal pali kir kutbi bri kan. Bara alba ba Ilaidsa ra wih win: —Bara nanara, smasmalkra, ¿yawan dîa daukbia ki?

¹⁶ Bara Ilaidsa mita win: —Si bripara, kan yawan wal nani ba sika kau ailal sa, witin nani ba wal.

¹⁷ Bara Ilaidsa ai pura sunan bara win: “Mamkabisna, Dawanki, witin ai nakra ba ilingkma bara kaikbia.” Bara Dawan bui ai albika nakra nani ba ilingkan, bara kaikan il nani ba upla nani ailal, wagin nani, pauta klauhan, araska nani sin wal upla baman banhki pali kan Ilaidsa lama ba kir kan kaikan.

¹⁸ Bara ningkara Siria uplika nani ba witin nani ai mapara aiklabaia balan ba ra, Ilaidsa Dawan ra ai pura sunan bara win: “Man ra mamkabisna naha uplika nani na, nakra nani ba diara kaikras daukma.” Bara baha nani nakra ba diara kaikras daukan, dîa Ilaidsa aisan ba kat.

¹⁹ Bara Ilaidsa bui witin nani ra win: —Yabalka plikisma ba naha apia sa, bara tawanka plikisma ba sin apia sa. Bamna nini blîks, bara yang mai brih wamna plikisma waitnika ra. Bara baku Sameria ra brih wan.

²⁰ Bara witin nani Sameria ra wan ba ra, Ilaidsa naku ai pura sunan: “Nanara, Dawan, naha waitnika nani na ai nakra nani na ilingks, bara witin nani kaikbia.” Bara Dawan mita nakra nani ba ilingkan, bara kaikan witin nani Sameria tawanka lila kat kan.

²¹ Bara Israel kingka ba kaikan, ningkara Ilaidsa makabi walan: —¿Uplika nani ba ikamna ki, aisiki, ikamna ki?

²² Sakuna Ilaidsa win: —Apia, ikpara. ¿Man mita witin nani ba iki tikma ki, sordkam bara pantamangka brisma ba ni, witin nani alki bri balram nani ba? Witin nani mawanra lî bara brit wal kahs witin nani piaia bara dibia sin, bara baku sip kabia kli ai dawanka ra tawi waia.

²³ Bara witin nani dukiara lilia tara pali daukan, bamna plun pin bara di banhwata. Ningkara king ba baha nani mahka blikan wan bara kli ai dawanka ra wan. Bara baha yua wina Siria aiklaklabra nani ba kli Israel tasbaya ra dimi wataukras kata.

Ilaidsa bara Sameria kutbi brin ba

²⁴ Naha diara nani ningkara, Ben-hadad, Siria kingka ai aiklaklabrika nani sut ba asla daukan, bara Sameria ra balan aiklabaia, baku bamna kir kutban.

²⁵ Baha tawanka ra kutban ba mita, plun wahwanka tara bâra kan. Baha tâka muyul lalkamhka kumi mana ba silbar mâ 80 kulki kan; baha purkara butku kânka batil banhras ba silbar mâ matsip mana atki kan.

²⁶ Yu kum Israel kingka ba baha kutbanka pura bâk wapi auya kan, bara mairin kum bui wini, win: —¡Kingki tara, hilp ai muns!

²⁷ King ba pana win: —Dawan ba man ra hilp mai munras kaka, ¿yang lika nahki man ra hilp mai munamna? ¿Dîa yang sip sna ki, plawar mâ bara wain ba wal maikaia?

²⁸ ¿Man dîa lukisma? Bara mairka ba mita pana king ra win: —Naha mairka na mita ai win, luhpi yabrika piaia yang wal naiwa, bara yauhka ba lika witin ai luhpia ba ikbia bara yang wal pibia.

²⁹ Bamna luhpi iki pi banhri witin wal. Bara yapra wala, yang wîri luhpiam iks bara piaia, bara witin ai luhpia lika yukukan.

³⁰ Bara king ba baha mairka aisanka ba walan ba ra, ai kupia sauhkan tukinka baku ai prâka nani ba kalkan. Bara baha tawan kutbanka ba purara kan bamna, upla nani ba kaikan king ba sari dauki kwalka dimi kan ba.

³¹ Bara king ba wini aisin: “¡Gâd bui yang ra klala aikbia naiwa, yang bui Ilaidsa Safat luhpia waitna nana ba dakbras kamna kaka!”

³² Bara Ilaidsa ai watla ra kan, witin almuk nani ba wal aisi kan. Bara sim piua ra, king ba ai uplika nani wina kum blikan wan witin ra. Bamna blikan uplika ba witin ra kau balras kan ba ra, Ilaidsa bui almuk nani ra naku win: —Kaiki kaiks nahki naha waitnika upla âikra kum luhpia ba, yang naina dakbia wisi upla blikan aula ba. Bamna kaiks, blikan uplika nani kau balras ba ra, dur ba praks bara swirka dimbiara, kan witin ai ninara ai dawanka aula mina binka ba walisa.

³³ Bara kau witin baha nani wal aisi kan ba ra, baha sturi twatwilkra Ilaidsa ra balan bara win: —Kasak pali baha Dawan lawanka ba aula bika, ¿dîa kau yang bui witin wina bîla kaikaia sna ki?