2 King Nani 5 - DAWAN BÎLA AISKA

Naamán lipar sikniska wina rawan ba

¹ Waitna kumi kan nina Naamán, Siria kingka suldiarka wihtka tara, kingka ba mita witin ra tara kulki kan bara yamni sin kaiki kata, kan witin mita sika Dawan bâk Siria ra yan ai waihla pura luan. Sakuna baha waitnika ba lipar sikniska bri kan.

² Bara Siria wina aiklaklabra nani dakni kumi taki, Israel tasbaya ba wina tukta mairin kum alki brih wan; naha tuktika mairin ba Naamán maya mairin albika taki kan.

³ Naha tuktika mairin lupia ba ai dawanka mairin ra naku win: —Dawanki waitna ba yang wihtki prapitka Sameria ra bâra ba bahara wih aisabia kaka, witin sip sa liparka ba wina rawaia.

⁴ Bara Naamán ai wihtka ra dimi wih aisin, tukta mairin lupia dîa sturka aisin ba.

⁵ Bara Siria kingka ba win: —Aitani, was, bara yang mita Israel kingka ra wauhtaya kum blikamna. Bamna Naamán taki wan. Bara silbar mâ 30,000, gul mâ 6,000 bara waitna prâka nani matawalsip brih impakata,

⁶ bara wauhkataya ba sin brin bara Israel kingka ra bri si yan, bahara naku ulban kan: “Man naha wauhkataya na brima bara tânka brima, wihta tara nani brisna ba kumika ba nina Naamán, witin lipar sikniska brisa bara man rakma.”

⁷ Bara Israel kingka ba naha wauhkataya aisi kaikan ba ra, ai prâka ba kalkan, bara win: —¿Yang na Gâd ki, upla rayaka yabi ba bara saki ba, bara naha na yang ra blikaia ai liparka ba wina rakaia? ¡Nanara aman kaiks, nahki yang maipara mini prukaia taukisa sapa!

⁸ Prapit Ilaidsa ba sturi walan Israel kingka ba ai prâka kalkan ba dukiara, bara king ra ai bîla bliki win: “¿Dîa muni man prâmka ba kalkram? Wis waitnika ba yang ra balbia, bara ai tânka bribia Israel ra prapit kum bâra ba.”

⁹ Bara Naamán ba ai araska nani bara ai waginka nani ba wal balan, bara Ilaidsa watla durka kat bal takaskan.

¹⁰ Bara Ilaidsa sturi twatwilkra kumi blikan wan, bara wibia win: “Was Jordan awala ra, aima 7 aihtabi taks, bara man wînam tara ba klin takma lipar ba wina.”

¹¹ Bara Naamán naha walan ba ra, ai kupia sauhki, naku win: —Yang luki kapri witin ba taki bal ai aisabia, ai Dawanka Gâd nina mâki, ai mihta purara buki, bara liparka ba ra kangbi ai rakbia.

¹² ¿Damaskus awala Abaná bara Farfar wal ba, laya kau pain apia sa ki Israel laya nani ba wal? ¿Yang bahara aihtabamna kaka, sip sna apia kau klin pain takaia? Bara ai kupia kasak sauhki baha wina mahka wan.

¹³ Ban sakuna, ai albika nani ba witin lamara balan bara aisi, win: —Dawanki, prapit ba kau diara tara karna daukaia mai blikan kata, ¿man daukaia apia kapram? Kanra yamni sa man ra mai win ba, wih aihtama bara klin takma.

¹⁴ Baku ba ra Naamán wan bara aima 7 Jordan awala ra buswi takan, baha kat Gâd prapitka win ba baku takan, sikniska ba rawan wahma lupia baku takan bara klin sin takan.

¹⁵ Bara Gâd prapitka ra tawi balan, witin bara ai uplika nani aikuki. Bara witin ai mawanra bal takaski win: —¡Nanara yang kaikisna tasba aiska ra Gâd wala âpu sa, sakuna Israel ra baman lika! Baku bamna, mamkabisna man diara kum prisantka brima man albikam na wina.

¹⁶ Sakuna Ilaidsa mita win: —Dawan ai kaiki ba ra swer takisni, diara kumi sin man wina yang brimna apia. Bara Naamán ban kli kli aisi kan diara kum bribia, sakuna Ilaidsa diara briras kan.

¹⁷ Bara Naamán mita win: —Ban kaka, aikrika Israel tasbaya na wina tasba muyul nina wâl brih wamna, kan nanara wina albikam na gâd bahki nani ra daiwan wîna aiska angki yabamna apia, sakripais sin gâd wala nani ra daukamna apia, sakuna Dawan ra baman.

¹⁸ Dawan ra diara kumi baman makabisna pâtki swih tikbia: ani yua ra yang wihtki Rimón tempel watla ra mayunaia wabia ba ra, yang mihti ra alki ai lula krikaia, yang sin witin wal alki Rimón tempelka watla ra luli krikamna. Bara Dawan ba naha dukiara ai albika pâtka ba ban swih tikbia.

¹⁹ Bara Ilaidsa mita win: —Kupiam kumi was. Bara Naamán baha wina mahka wan. Pat laihura auya kan ba ra,

²⁰ prapit Ilaidsa albika Guehazí, witin ai kupia wal aisan bara win: “Kaiks, yang wihtki Naamán bui Siria waitnika ba wina diara kumi sin briras witin brih balan dukia ba wina. Swer takisna Dawan nina ra, yang istikira nina blikamna, bara witin wina diara kumi pan brimna sapa.”

²¹ Bara Guehazí ba Naamán ninara wan; bara Naamán kaikan Guehazí ai ninara auya, bara witin ai waginka ba wina iwan witin wal prawaia, bara makabi walan: —¿Diara saura takisa ki?

²² —Apia, diara âpu —Guehazí bila—. Ban sakuna dawanki ba bui man ra ai blikan mai wiaia, bisiura pali prapit wahma wâl wan Efraín ilka ba wina, bara mamkabisa silbar mâ 3,000 bara prâk raya sin wâl blîkma.

²³ Bara Naamán win: —Pliskam pali, silbar mâ 6,000 bris. Baha ba bribia wisi Naamán bui kli kli wih ki, krukus kumi ra prâka wâl ba wilki yaban, bara ai albika wâl ra yaban Guehazí ra brih wabia wisi.

²⁴ Baku bamna il bahna ra wan ba ra, alba nani silbar mâ brih wata ba brih, ai watla ra yukukan, bara ningkara waitnika nani mahka swin wan.

²⁵ Baha ningkara witin ai dawanka mawanra wan. Bara Ilaidsa makabi walan: —Guehazí, ¿ani wina aulma? Bara Guehazí mita win: —Yang anira waras.

²⁶ Bara Ilaidsa kli makabi walan: —Yang kupi ba sin bâra kan baha waitnika man wal prawaia ai waginka ba wina bal iwata ba ra. Sakuna piua apia sa lalah briaia, bara prâk nani, dus nani, wain nasla nani, sîp nani, bîp bul nani, alba waitna bara mairin nani sin briaia.

²⁷ Baha tâwan, Naamán liparka ba man ra mai alkbia, ba purkara sin man kiamkam nani sut ra ban kaia ra. Bara Guehazí ba Ilaidsa mawan wina taki wan ba ra, liparkira taki wan, pihni pali wahmuk pinhka baku.