2 King Nani 4 - DAWAN BÎLA AISKA

Piarka batanka laya

¹ Mairin kum bâra kan, witin ba prapit nani kan ba tila wina kum maya, bara witin prapit Ilaidsa ra wan, bara naku ini aisi, win: —Yang mayi waitna ba pruan, bara man nu sma mayi ba Dawan ra lalukra kan. Bara nanara lalah lin mamunra kum balan, yang luhpi wâl ba alki ai albika briaia wisi.

² Bara Ilaidsa makabi walan: —¿Yang dîa mai daukamna? Ai wis man dîa brisma wamtla ra. Bara witin bui win: —Man warkkam dadaukra mairin na diara kumi sin ai watla ra briras sa, ban sakuna batana laya watlika kumi baman brisna.

³ Bara Ilaidsa win: —Was, bara man uplikam nani lamamra iwi nani ba wina, batana laya laikaika sumika nani makabi bris bara briaia sip sma kat bris, sakuna bîla baman kaka.

⁴ Baha ningkara man luhpiam nani aikuki wamtla ra dims, bara dur ba praki, batana laya laikaika ba banhki dauki, tnaya ra laki swis.

⁵ Baku mairka ba mahka wan Ilaidsa wina, bara ai watla ra dimi dur nani ba prakan ai luhpia nani aikuki. Bamna mahka batana watla nani ba ra batana laya laikan.

⁶ Watlika sut ba pat banhki daukan ba ra, ai luhpia waitna kum ra win: —Watlika wala nani pliki aik, bîla baman kaka. Bara luhpia waitna ba bui win: —Sumi kau âpu, danh takan sa. Baha minitka ra batana laya plapi kata ba takaskan.

⁷ Ba ningkara mairin ba kli wan, bara Gâd prapitka ra dîa takan ba win, bara pana witin bui win: —Nanara was batana laya ba atkaia, bara baha ni traskam aibaps, bara man wih luhpiam nani aikuki lika dîa takaskbia ba wina pih raya bas.

Ilaidsa wihki Sunem wina mairka ba

⁸ Yua kum Ilaidsa ba Sunem bâk lui auya kan, bara bahara kulkanka bri mairka kum bâra kan; mairka ba mita Ilaidsa ra paiwan plun piaia. Aima bani Ilaidsa bâk lui auya taim, baha mairka watla ra takaski kan plun piaia.

⁹ Bara mairin ba ai maya waitna ra win: —Yang daihra walisna ani yua ra witin lui auya bani, wapi wan kaiki si wisa; witin sika Gâd prapitka kasakkira ba.

¹⁰ Yang mamkabisna witin dukiara yapaia pliska kum daukma, bara bahara krikri, iwaika, plun piaika nani sin paski swiaia, bara lamp sin kum bâra swiaia, bara ani yua ra witin yawan ra aula ba ra takaskaia sip kabia.

¹¹ Bamna yua kum witin bâk balan, bara baha yapaia pliska daukan ba ra takaski yapan.

¹² Ilaidsa bui ai albika Guehazí ra win: —Sunamita mairka ba wis balbia. Bamna alba bui mairin ba winan, bara mairin ba balan ba ra, Ilaidsa ai albika ra win:

¹³ —Man kaiks nahki naha mairin kupia pain sa yawan wal, bara dîa yawan dauki yabaia sip sa kaka witin ra, yawan king ra, apia kaka war wihtka ra witin dukiara aisaia. —Yang tawanki uplika nani tilara pain iwisna —mairin ba aisin.

¹⁴ —Ban kaka, ¿yawan dîa daukbia mairin na dukiara? —Nu âpu sna —Guehazí win—. Kaiks witin luhpa âpu sa, bara ai waitnika ba sin pat almuk pali sa.

¹⁵ Bamna Ilaidsa win: —Wins. Bara witin bui winan, bara mairin dimaika pali ba kat buan.

¹⁶ Bara Ilaidsa win: —Naha mani aula ba yua ra naha sim piua ra, klamhkla ra luhpa kum bri kama. Bara mairin ba mita win: —Apia, dawanki, Gâd waitnika bui albikam mairin ra kunin munpara.

¹⁷ Sakuna Ilaidsa dîa win ba kat takan, mairin ba baha manka kwihra takan, bara ai luhpia waitna kum baikan.

¹⁸ Bara tukta waitna ba pâwan. Sakuna yu kum ai aisa kaikaia balan, bara aisika ba insla ra suliar nani aikuki plun mâ dâki kan.

¹⁹ Bara aisika ra wini, naku win: —¡Ay, laila! ¡Laila latwan pali sa! Bara ai aisika ai albika kumi ra win: —Ai yaptika ra brih was.

²⁰ Bara witin ba brih balan ai yaptika ra, bara witin iwi tukta ba ai plahpia ra bri kan yu wan lal kat. Bamna tukta ba pruan.

²¹ Sakuna ai yaptika ba prapit rumka ra uli wih, krikrika ra tniki durka praki swi si, taki wan.

²² Ba ningkara ai maya waitna ra winan balan bara win: —Albikam kum ai blîks muyul kum wal, baku yang sip kamna wih balaia Gâd prapitka ba wina.

²³ —¿Dîa muni naiwa witin ra kaikaia auma? —maya waitna makabi walan—. Naiwa sika kati raya apia, ris yua sin apia. —Baha lukpara —mairin ba win.

²⁴ Bara adar yaban muyul ba nina palkbia, bara ai albika ra win: —Kaisa mahka wap, yabal ra lika ai takaskpara, yang mai wimna ba kat.

²⁵ Baku witin impakan, bara Gâd prapitka Carmelo ilka ra kan ba kat balan. Bara laihura aula kan prapit ba pat kaikan, bara ai albika Guehazí ra win: —Kaiks, sunamita mairka aula ba.

²⁶ Was wal prawaia bara makabi wals nahki sa, bara wals ai maya ba nahki sa bara sin ai luhpi ba nahki sa. Alba ba wan, bara mairin ba bui win witin nani yamni sa.

²⁷ Bara Ilaidsa il ra bâra kan ba kat wan, bara ai mina kat kiaubi alkan. Bara Guehazí ba balan ba wina tnaya ra sakaia, sakuna Ilaidsa bui win: —Swis, kan witin ba trabil pali brisa bamna, bara Dawan sin kau ai wiras sa dîa pali witin ra takan sa sapa.

²⁸ Bara mairin ba win: —Dawanki, ¿luhpa kum briaia mai makabri ki? ¿Yang mai wiras katna ki kunin ai munma apia?

²⁹ Bara Ilaidsa bui Guehazí ra win: —Ridi taks, bara kînki ba brih ki bâra man was. Bara ya wal prawma kaka lakula wipara, bara ya lamkula wibia kaka sin lakula daukpara. Bara kînki ba ni tukta pruan ba mawan ra mangkma.

³⁰ Bara tukta yaptika ba bui Ilaidsa ra win: —Dawan nina ra swer takisna, man ninam ra sin mai wisna, man waras sma kaka yang sin wamna apia. Bara Ilaidsa mairin ba wal wan.

³¹ Bara Guehazí lika witin ai tâura pat wan kan, bara tukta ba mawan ra ai kingka ba ni mangkan, ban sakuna diara kumi sin takras kan; bara baku sika kli tawi bal Ilaidsa wal prawan, bara witin bui param saki muni, win: —Tuktika ba sip rawras sa.

³² Ilaidsa ba utla ra diman ba ra, tukta ba pruan tnikan kan ba kaikan krikri ra.

³³ Bara witin utla ra dimi dur ba praki, Dawan ra ai pura sunan. Witin bara tukta ba wal baman bilara kan.

³⁴ Ba ningkara krikri ra ulan, bara tukta ba purara aitnikan, bara ai bîla ba witin bîla purara mangkan, ai nakra nani ba witin nakra nani purara mangkan, bara ai mihta nani ba sin witin ai mihta nani purara mangkan, bara tukta wîna tara ba lapta takan.

³⁵ Ba ningkara Ilaidsa bui utla ba bilara wapi taukan, tâ kum ba wina tâ wala ba kat; ba ningkara kli tukta ba purara uli aitnikan, bara tukta ba 7 taim trisiam munan, bara ai nakra nani ba kwâkan.

³⁶ Ba wina Ilaidsa bui Guehazí winan bara win: —Sunamita mairka ba wins. Bara dîa win ba daukan, bara mairin ba dimi balan Ilaidsa bâra kata ba kat, bara win: —Kaiks, man luhpiam ba bâra sa, bris.

³⁷ Bara mairin ba Ilaidsa mina ra kauhan ai mawan tasba ra makupi; ningkara ai luhpia brih rumka bîla wina mahka taki wan.

Diara aihkakira plun ra daukan ba

³⁸ Naha ningkara Ilaidsa ba Guilgal ra kli tawi wan, baha tasbaika ra plun wahwan tara bâra kan baha yua nani ra. Bara prapit nani ba witin ai lamara balan, bamna ai albika ra win: “Dikwa tara kumi mangks pauta ra bara bahara plun kum dauks prapit nani ba dakakaia.”

³⁹ Bara witin nani wina kum ba taki wan twi ra inma wahia nani ba plikaia, bara dus wail wahia palhwan kumi wal prawan, bara witin baha dusa mâ, kamhpipis talia nani ba dakbi ai prâka banhki bri tawi balan; ningkara kiskaia dakawa ra mangkan, dîa pali kata sapa kaikras ban.

⁴⁰ Baha ningkara prapit nani ra pata ba yaban pin, sakuna witin nani pata ba pin bara naku aisin: —¡Prapit, naha pata na puisin brisa! Bara witin nani piras takaskan.

⁴¹ Bara Ilaidsa win: —Plawar wiria bri sal aik. Bara plawar sal yaban taim dakawa ra mangkan, bara win: —¡Nanara upla nani ra yas pibia! Bamna upla nani ba pin, bara baha dakawa ra diara saura âpu kan.

⁴² Baha ningkara Baal-salisá wina waitna kum balan, bara Ilaidsa ra yabaia barli mâ britka angki sakan ba wina 20 brih balan, baha purkara plawar kura singban ba sin diara watla kum. Bara Ilaidsa ai albika ra win: —Baha upla nani ra yas pibia.

⁴³ Sakuna ai albika ba win: —¿Nahki naha lupia na upla nani 100 na ra yabamna? Sakuna Ilaidsa win: —Upla nani ra yas pibia, kan Dawan baku wisa pih banhbia, bara kau sin pura takbia.

⁴⁴ Baku bamna, napakan ba baha nani mawanra kahban pih banhwan, bara kau sin pura takan, dîa Dawan aisan kan ba kat.