2 King Nani 3 - DAWAN BÎLA AISKA

Joram Israel ra king aimakan ba

¹ Josafat ba Juda ra mani 18 king aimaki kan piua ra, Joram, Ahab luhpia ba, mahka Israel purara king aimakan, bara Samaria ra mani 12 king aimakan.

² Witin lika Dawan nakra ra saura manis daukan, ai papika wih ai yapti saurka daukan baku lika daukras kan, witin sika walpa ni lilka ai aisika bui paskan kan ba, baha wina sakan.

³ Ban sakuna, dîa Jeroboam Nabat luhpia saura nani daukan kan ba, witin sin baha saurka ra kauhan, baha saurka wal sika Israel ra yaban saurka daukan.

Ilaidsa dahra aisisa Moab ra pura luaia ba

⁴ Bamna Mesá Moab kingka ba, sîp sahwi kan, bara Israel kingka ra sîp luhpia nani 100,000, sîp wainhka nani 100,000 bara taya ba wal sin lal mana aibapi kan.

⁵ Sakuna king Ahab pruan ba ningkara, Moab kingka ba Israel kingka mapara buan.

⁶ Bara Joram Sameria kingka ba buan, bara Israel aiska ra maisa pakan.

⁷ Ningkara Juda kingka ra maisa pakaia blikan: “Moab kingka ba yang maipara buan sa. ¿Man ba yang wal wama ki Moab mapara war aiklabaia?” Bara Juda kingka pana win: “Wamna man wal, yang aiklaklabriki nani ba man aiklaklabrikam sa, bara yang araski nani ba man araskam nani sa.

⁸ Sakuna, ¿ani yabalka bâk wih aiklabia ki?” Bara Joram win: “Edom upla iwras tasbaya bâk.”

⁹ Baku bamna, Israel, Juda bara Edom kingka nani ba mahka taki wan. Sakuna baku upla iwras tasbaya bâk yu 7 wapi tauki kan bara lî âpu takan, aiklaklabra nani bara aras nani brih tauki kan ba dakakaia.

¹⁰ Bamna Israel kingka ba aisin: —¡Ay! Dawan mita baha king nani yumhpa ba yawan ra brih aula talia sa, yawan mita Moab uplika nani mihta ra mangkaia.

¹¹ Bara Josafat makabi walan: —¿Nâra Dawan dahra aisasarika ba âpu sa ki, Dawan ra makabi walaia witin bâk? Bara Israel kingka wihta tara kum bui win: —Ilaidsa ba nâra sa, Safat luhpia waitna Ilayas wal tauki kata ba.

¹² —Bamna Dawan wina diara wan wiaia bri kaia sa —Josafat bui win: Bamna istikira Israel kingka ba, Josafat bara Edom kingka ba aikuki wan Ilaidsa ra kaikaia;

¹³ sakuna Ilaidsa bui Israel kingka ra win: —¿Yang na man wal dîa daukaia brisna ki? Man aisikam nani piua ra prapit nani kan nani ba ra wih wals. Bara Israel kingka ba baku aisin witin ra: —Apia, kan Dawan bui sika naha kingka nani yumhpa ra asla daukan, Moab uplika nani mihta ra mangkaia dukiara.

¹⁴ Bara Ilaidsa win: —Dawan karnika sut bri ba nina ra swer takisna, witin ai kaiki kabia, yang Josafat, Juda kingka kulkanka ra apia kan kaka, aisisma ba walaia apia kapri, mai kaikamna sin apia.

¹⁵ Ban sakuna, ¡nanara man nani miusik papulra kumi bri sal aik! Bara miusik papulra ba kau kangbi kan ba ra, Dawan karnika ba Ilaidsa purara balan,

¹⁶ bara Ilaidsa win: —Naku Dawan aisan: ‘Naha ilka langnika bîla ra lî watlika nani ailal pasks,

¹⁷ kan Dawan bui win sa, pâsa bara lî auhka sin man nani kaikma apia, sakuna naha ilka langnika bîla na lika lî baman banhki pali kabia, bara man nani, araskam nani bara bîpkam nani sut sin dibia.’

¹⁸ Bara naha na Dawan nakra ra diara sirpi sa, kan Moab uplika nani ba man nani mihtam ra mangkbia,

¹⁹ bara man nani bui ai tawanka kutbanka karnakira paskan nani ba sin sut pali sauhki tiki banhma, bara ai yabalka pranakira nani ba sin, dus mâ bri painkira nani sut ba klakma, lî kârma nani ba aiska pali lâkma, bara walpa nani wal ai tasbaya nani ba sin sauhki tikma.

²⁰ Bara yapra wala, Dawan ra prisant yaia awarka ra Edom tani wina lî balan, bara tasba ba lî nani ni banhwan.

²¹ Bara Moab uplika nani aiska, king nani ba, witin nani ai mapara aiklabaia auya sa win walan ba ra, witin nani paiwan upla sut, tuktan nani wina almuk pali ba kat, bara ai tasbaya luaika pîska ba kat bal aihwaki banhwan.

²² Titan ra Moab uplika nani ba buan, bara lapta ba lî purara lakwi kan ba ra witin nani laih wina kaikan, lî nani ba tala baku pauni pali kan.

²³ Bara witin nani win: “Naha lika tala sa. Naha taki na lika, king nani ba pana pana ai mapara bûi aiklaban, bara pana pana aikuki prui tiwan sa. ¡Moab uplika nani, bûi banhs, kaisa yawan bâra wih ai dukia nani swin ba yawan briaia!”

²⁴ Sakuna Moab uplika nani ba Israel kiampka ra diman ba ra, Israel luhpia nani ba Moab uplika nani mapara aiklaban bara munan plapan. Bamna nina bliki bri si Moab uplika nani ra sut iki tikan.

²⁵ Ningkara ai tawanka nani sin sut sauhki tikan, bara ai tasbaya plun mangki kata ba sut walpa ni banhkan, ai tingnika kârma nani sut ba sin prakan, ba purkara sin ai dusa ai mâ saki nani kan ba sin sut klakan. Quir-haréset tawanka ba baman sauhkras swin kata. Sakuna praukpraukia lalulkra nani ba mita kutbi kir brih, ai mihta ra alki bri banhwan.

²⁶ Bamna Moab kingka ba kaikan aiklabanka ba pat ai pura luan kan, bara witin suldiar aiklaklabra nani ai mina ra wapi ba 700 brin, Edom kingka bâra ba kat yabal kum sakaia dukiara, sakuna sip apia pali muni banhwan.

²⁷ Bamna ai luhpia tawahkia ai watlika ra king aimakaia kata ba alkan, bara alki iki wîna tara aiska ba angkan kutbanka ba purara. Naha ba Israel luhpia nani mapara kasak kupia sauhkan, bara witin nani ai kiampka ba swih ki, mahka ai tasbaya ra tawi wan.