2 King Nani 25 - DAWAN BÎLA AISKA

Jerusalem kauhanka ba

¹ Sedequías king aimakan pat 9 mani bara kati matawalsip piua ra, ai aiklaklabrika daknika tara pali ba aikuki Jerusalem mapara aiklabaia bal, tawanka aiska ba kutban, bara ai tnaya kir ba laih wina kaiki aiklabaia watla nani paski bri kan.

² Bara naha tawanka ba kutbi bri kan Sedequías 11 mani king aimaki kan yua ba kat.

³ Naha manka bilara yua 9 pura kati walhwal ra diman piua ra, naha tasbaya ra plun âpu takan, tawanka nani aiska sut ra sin.

⁴ Bara kutbanka ba ra unta kumi klauhbi war aiklaklabra nani ba sut taki plapan. Yabal dimaika kutbanka wâl bâk witin nani taki plapan tihmia ra, naha ba king watla latka lama kat kan. Caldea uplika nani ba lika tawan ba ban kutbi bri kan, bara aiklaklabra nani ba Jordan ilka bîla tani ra impakan.

⁵ Sakuna Caldea suldiarka nani mita king Sedequías nina blikan, bara Jeriko twiya langnika kat nina bliki alkan, bara aiklaklabrika nani ba yakabrira plapi takan.

⁶ Bara Caldea uplika nani mita king ba alki Babilon kingka ra brih balan Riblá kat, baha ba Hamat tasbaya ra. Bahara Nabucodonosor mita Sedequías ba pât ra lakan.

⁷ Bara Sedequías luhpia nani sut, aisika mawan kat nana dakbi ikan. Bara Sedequías ra lika ai nakra wâl ba sakan, bara ai mihta nani ba wilki, Babilon ra brih wan.

Tempel ba sauhki tikan

⁸ Nabucodonosor Babilon kingka ba ai kingka lâka ra iwan pat 19 mani, kati matsip bara lapta 7 alkan ba ra, Nebuzaradán king watla wihtka ba, aiklaklabra kamandantika kan ba, Jerusalem ra wan, bara

⁹ Dawan tempelka ba, king watla ba, Jerusalem uplika nani watla aiska ba, baha sut purkara wihta tara nani watla ba aiska pali angkan luan.

¹⁰ Bara Caldea aiklaklabrika nani witin wal tauki kan nani ba lika Jerusalem kir kutbanka ba aiska slingban.

¹¹ Ningkara tawan uplika nani takaskan kan nani ba Babilon kingka ra tawan nani ba, bara upla wala wark sâtka nani taki ba sut Nebuzaradán kamandantika ba mita alki, Babilon ra brih wan.

¹² Ban sakuna, baha tasbaika ra upla umpira nani bâra kan ba baman lika, Nebuzaradán mita swi si wan, tasba warkka dauki wain mangki kabia dukiara.

¹³ Bara Caldea uplika nani ba mita Dawan tempelka ra bras playka nani bâra kan ba krikan, bara utla playka tara nani alkaika bapan kan ba sin, lî alkaia watla tara kata ba sin; baku sin bras dukia nani bâra kan ba sut Babilon ra brih wan.

¹⁴ Baha purkara sin, yamhpus alkaika, tasba kiubaika nani, ispan tara plun witkaika bras nani daukan bâra kan ba sin, bara dîa dîa tempel ra wark daukaia dukia kan ba, sut brih wan.

¹⁵ Baku sin suldiar kamandantika ba, diara nani gul bara silbar ni daukan dukia nani kan ba sut brih wan, baku sin pauta mukaika bara kâp tara nani ba sut.

¹⁶ Utla playa tara wâl ba dukiara lika bara lî alkaia watla tara king Salaman mita paskan kan ba tempel ra, baha lika sip apia kan bri waia, kan uba wirha kata; baha wirhika ba sip kulki sakras kan.

¹⁷ Plaika tara kumi bani bapan kan ba 27 pît bri kan yarika ba, baha lal purara bapan kan ba 6 pît yarika kan. Kir ba sakahkan kan mâ krukma nani sâtka dauki muni, taya pura ba sin sakahkan kan. Bara playka wâl ba sim yahpika bri kan.

Juda uplika nani ba alki brih wan

¹⁸ Bara kamandanti, suldiar nani lalka tara ba, prîs tara Seraías ba sin alkan; bara Sofonías ba sin alkan, utla playka tara nani aihwaki kaiki kan nani yumhpa kan ba sut alkan.

¹⁹ Tawan uplika nani ba wina aiklaklabra lalka ba alki silak ra mangkan, bara king main kakaira nani ba wina sin matsip alkan, aiklaklabra lalka upla alki war ra bliki kan ba sin alkan, kau wihta tara nani lalka ba wina 60; naha nani aiklaklabra wihtka nani, upla kulkanka tara bri nani ba sin sut silak ra mangkan.

^20-21 Naha nani sika Nebuzaradán mita alki Babilon kingka Riblá ra brih wan, Hamat tasbaya ra. Bahara Babilon king mita adar yaban sut ikbia. Baku sika Juda uplika nani ra alba lâka ra bri kan, ai tasbaya ba wina saki muni.

Kau tâkika nani bâra kan ba Idsip ra plapan

²² Bara baha uplika nani king Nabucodonosor Babilon kingka ba mita Juda tasbaika ra swin kan ba baha nani dukiara pura kakaira kum mangkan, baha sika Guedalías, Ahicam luhpia waitna, Safán mulika ba.

²³ Bara Juda aiklaklabra lalka nani naha walan ba ra, witin nani ai uplika nani aikuki Mispá kat balan, Guedalías ba wihta tara Babilon kingka mita mangkan win ba wal aisaia. Naha nani balan kata: Ismael, Netanías luhpia; Johanán, Caréah luhpia; Seraías Tanhúmet luhpia, Netofá wina kata ba; bara Jaazanías, Maacá nina mâki luhpia kata ba. Witin nani ai uplika nani sut aikuki balan.

²⁴ Bara Guedalías swer taki win witin nani ra bara ai uplika nani ra sin, Caldea wihtka nani ra si bribia apia, baha tasbaya ra iwi kabia bara Babilon kingka dukia dauki kabia, baku lika witin nani ra pain kabia.

²⁵ Sakuna kati 7 alkan ba ra, Ismael, Netanías luhpia bara Elisamá mulika, Juda ra king kiamka uplika kan ba, witin bara waitna nani matawalsip aikuki balan, bara alsut bakahnu Guedalías ra ikan, baku sin Caldea uplika nani bara Juda uplika nani witin aikuki Mispá ra kata ba sut ikan.

²⁶ Bara upla nani sut bâra kan ba buan, bara sut ba Idsip ra wan Caldea uplika nani ra sibrinka mita. Upla tara, sirpi nani bara aiklaklabra wihtka nani sut ba sin bahara wan kata.

Joaquín ba pri sakisa bara kulkanka sin yabisa Babilon ra

²⁷ Mani 37, kati 12 bara yua 27 alkan kan, king Joaquín Juda wina ba alki silak ra mangkan ba wina; bamna naha piua ra Babilon ra, Evil-merodac ba king aimakan, witin Joaquín ra uba latwan kaikan bara silak wina sakan.

²⁸ Bara witin ra kasak yamni pali aisan, bara king nani sut bâra kan ba wal kau Babilon kingka nani ba purara kulkanka tara pali yaban.

²⁹ Naku natka ra, ai prâka silak watla ra dimi kan ba daiki wala dingkan, bara witin wal ai rayaka sut yua nani ra plun pi kan.

³⁰ Baha purkara, ai rayaka yua nani sut ra witin ra yu bani Babilon kingka ba wina hilpka kum yabi kan.