2 King Nani 24 - DAWAN BÎLA AISKA

¹ Bara Joaquim king aimaki kan piua ra, Babilon kingka Nabucodonosor ba ai uplika nani kira balan bara tawan dahra walras kutbi alkan, bara Joaquim ba witin ai albika takan mani yumhpa praiska. Sakuna tisku kan witin mita Nabucodonosor mapara buan.

² Sakuna Dawan mita Joaquim mapara âimplikra nani Caldea, Siria, Moab bara Amón wina blikan. Baha nani ba Juda mapara blikan sauhki tikbia dukiara, dîa Dawan mita ai prapitka nani bâk aisan kan ba kat.

³ Juda mapara naku takan, Dawan ba pat aisan kan bamna, kan Manasés saurka daukan ba mita naha uplika nani ba ai lama wina sakaia kan,

⁴ baku sin tala pâtkas Jerusalem ra laikan kan ba tâwan. Baha mita Dawan bui naha pâtka kau ban swih tikras kata.

⁵ Joaquim daukanka nani ba bara dîa dîa daukan ba, Juda kingka nani dukiara ulban ba wauhkataya ra ulban sa.

⁶ Joaquim pruan ba ra, witin ai watlika ra ai luhpia Joaquín ba king aimakan.

⁷ Baha piua nani wina, Idsip kingka ba kli ai tasbaya wina takras kata, kan Babilon kingka ba bui pura luan bara diara nani bri kan ba sut dakban kata, Idsip tingnika ba wina, laih Éufrates awalka ba kat.

Joaquín bara wihta tara nani ba sut aikuki Babilon ra alki brih wan

⁸ Joaquín ba 18 mani bri kan ba ra witin Jerusalem ra king aimakan, bara witin Jerusalem ra kati yumhpa baman king lâka ra iwan. Ai yaptika nina ba Nehustá mâki kan, witin ba Elnatán luhpia mairin kan, Jerusalem wina.

⁹ Bara witin ba Dawan mawanra diara saura daukan, ai aisika dîa daukan ba baku daukan.

¹⁰ Baha piua ra, Nabucodonosor aiklaklabrika dakni nani ba Jerusalem mapara balan, bara kir kutbi brin aiklabaia.

¹¹ Bara baha yua ra Jerusalem ba kir kutbi bri kan ba ra, Nabucodonosor Babilon kingka ba balan pura luaia.

¹² Bamna Joaquín Juda kingka ba mapara taki balan, witin, ai yaptika, ai albika nani, ai wihtka tara nani sut aikuki, bara Babilon kingka mita priski banhwan. Naha na Nabucodonosor king aimakan ba wina pat 8 mani bri kan.

¹³ Baha ningkara Nabucodonosor bui Dawan watla ra diara kukan nani bâra kan ba sut pali sakan, baku sin king watla ba wina, bara Dawan watla ra king Salaman mita diara nani gul ni paski swin kan ba aiska saki sauhki tikan.

¹⁴ Bara Jerusalem uplika nani ba sut alki, alba lâka ra brih wan, wihta nani wina aiklaklabrika kau pain nani ba sin sut pali alkan, alsut ba ra 10,000 silak ra alki brih wan, ai mihta warkka dadaukra nani bara ayan warkka dadaukra nani sin sut. Kuntri ra upla kumi sin takaskras, sakuna upla kau umpira nani ba lika brih waras kan.

¹⁵ Baku sin Nabucodonosor mita king Joaquín ba alki brih wan ai maya, ai wihtka nani, upla wala tara nani bâra kan ba sin sut alkan bara Jerusalem wina Babilon ra brih wan.

¹⁶ Bara war uplika nani baman 7,000; ai mihta warkka papaskra nani bara ayan warkka dadaukra nani sut ba ra, 1,000 alkan kata; baha purkara war aiklaklabra nani karnira bâra kan ba sin sut alki, Babilon ra brih wan alba lâka ra.

¹⁷ Bara Babilon kingka ba mita Joaquín watlika ra, ai tubani Matanías ba king mangkan, bara ai nina kata ba Sedequías mâkan.

Sedequías Juda ra king aimakan ba

¹⁸ Sedequías ba 21 mani bri kan ba ra king lâka ra iwan, bara Jerusalem ra 11 mani king aimakan. Ai yaptika nina ba Hamutal mâki kan, witin ba Jirimaya luhpia mairin, Libná wina kan.

¹⁹ Bara Dawan mawanra diara saura baman daukan, dîa Joaquim daukan kata ba baku.

²⁰ Bamna Dawan lawanka ba Jerusalem wihki Juda wal purara balan, ani yua ra ai mawan wina kangbi sakan ba kat.