2 King Nani 23 - DAWAN BÎLA AISKA

¹ Bamna king bui almuk nani Juda bara Jerusalem ra nani ba sut paiwan, witin wal asla takaia.

² Ningkara king bui Juda uplika nani, Jerusalem ra iwi uplika nani, prîs nani, prapit nani, tuktan bara almuk nani kat aikuki Dawan tempelka ra aidrubi wan. Bahara king ba ai bîla karna aisi kaikan, lâ daukan wauhkataya tempel ra sakan ba.

³ Bara king ba utla playa ba kat buan, bara Dawan ra pramis takan, bîla wali daukaia kasakka lâka kat. Ba purkara sin ai lâka bîla nani ba alki daukaia win, bara ai adarka nani ba sin sut bara lâ wal daukan ba aitani kat daukaia, baku sin dîa pali baha wauhkataya ra ulban ba tânka kat. Bara upla nani sut asla takan nani kan ba, aitani sa kulkan baha aisi daukanka ba.

Josías mita kli diara raya daukan ba

⁴ Bamna king ba mita prîs tara Hilquías ra adar yaban, bara prîs wala nani ra, baku sin dur ra aihwawakra nani ra, Dawan tempelka ba wina diara nani bâra ba sut sâkbia, baha dukia Baal Aserá wal dukiara daukan nani ba, lilka bahki nani, slilma ra mayunaia daukan nani ba sin sut, bara Jerusalem ba wina latara saki bri si, Cedrón twiya kat angkan luan; bara baha yamhpuska nani ba yaban Betel kat sin brih wan.

⁵ Baha ningkara prîs nani Juda kingka nani mita saki mangkan nani kan ba sut ai pliska nani wina sakan, baha nani ba idan nani pliska holi ba ra kîa pain nani angkbia dukiara wisi sakan kata; naha pliska nani ba Juda tasbaya ra kan, baku sin Jerusalem lama kir nani ra, sim baku sakan prîs nani Baal ra kîa yamni nani angki dauki kan ba, baku sin lapta, kati, slilma tara wala nani ra, kasbrika purara slilma sâtka sut bâra nani ra mayunra yabi kan nani ba.

⁶ Bara Aserá lilka bahki nani daukan nani kata ba Dawan tempelka ra bri kan nani ba sin, munan Jerusalem ba wina latara saki lulkan, bara Cedrón tingnika ra bri si angkan, bara yamhpuska nani ba tawan luhpia nani raitika ra auhban.

⁷ Baku sin waitna bara mairin wal ur taki kan nani watla ba sut slingban, Dawan tempelka kat dauki kan prias kum baku, bahara sin mairin nani kwala mami kan gâd bahki Aserá ra yaia dukiara, baku prîs nani ba bui adar yaban kan.

⁸ Baha ningkara adar yaban prîs nani Juda ra kan ba sut balbia, bara gâd bahki nani ra pura sunaia watla bâra kan ba Gueba wina Beerseba kat, lasa altarka nani sin bâra kan, baha nani sut sauhki tikan Jasua tawan lalka tara, getka dimaika smihka tani ba kat.

⁹ Sakuna prîs nani gâd bahki ra mayuni, ai gâdka wal aisaia watla bri kan nani ba Jerusalem ra, baha altarka ra lika waras kan, sakuna ai uplika prîs wala nani wal brit îs âpu ba pi kan.

¹⁰ Josías sin Ben-hinom ilka biara langnika ra angkaia dukia kum bâra kan ba tâski daukan, upla kumi ra wiras kan ai luhpia waitna, apia kaka ai luhpia mairin Moloc ra sakripais angki daukaia.

¹¹ Bara Juda kingka nani mita lapta ra kulkanka yabi aras nani daukan kan ba, Dawan tempelka dimaika pali mawan ba kat, baha nani ba sin sut sakan, baha lika Natán-mélec pura kakaira kata ba ai watla tnaya ra, lapta ra mayunaia dukiara wagin nani bri kan ba sut sin angkan.

¹² Baha purkara sin, Juda kingka Ahaz, pura tani ra asla takaia pliska paskan kan ba, bara altar nani Manasés mita paskan kan ba, Dawan tempelka latka tani ra, baha nani sut sauhki tiki, yuya nani ba Cedrón tingnika ra lulkan.

¹³ Baku sin, king mita tâski kulkan idan nani gâdka bahki nani, Jerusalem lalma ra paski bri kan ba, bara Oliv nani ilka waupasa tani ra bri kan ba, Salaman Israel kingka ba mita paskan, Astarté gâdka bahki ba, Sidón uplika nani bara Quemós bara Moab uplika nani aidulka saura nani ba sin. Milcom bui aidul saura Amón luhpia nani dukiara paskan ba baha nani sut ba sin sauhki tikan.

¹⁴ Bara sin lilka walpa ni paskan kan ba, yuya baman krikan, dus playa nani ra dawan ra kulki baku kan ba sauhki tikan, bara baha watlika ra upla dusa nani wal baman banhkan.

¹⁵ Baku sin sakripais daukaia pliska ba ra, Dawan wal aisaia watla Betel ra mâkan kata ba, Jeroboam, Nabat luhpia Israel ra yaban saura daukan ba, Josías mita kaiki âpu daukan ba ra angki sut tikan, Aserá lilka nani bâra kan ba sin.

¹⁶ Bara Josías ba kli tawi balan ba ra, raiti nani baha ilka purara kan kaikan, bara blikan wan pruan nani dusa ba saki balan, bara watlika paskan kan ba purara angki âpu daukan. Baha bîla prapit bâk, Dawan mita aisan kan ba kat, baha ba sika pat maisa paki win kan.

¹⁷ Baha ningkara makabi walan: —¿Dîa lilka sa ki bukra kaikisna ba? Bara tawanka uplika nani ba mita pana win: —Naha sika Gâd prapitka raitika, Juda wina balan ba, baku sin witin sika king bui naha diara nani Betel ra sakripais nani angki daukaia pliska ba dîa takan tânka dukiara param aisan ba.

¹⁸ Bara Josías adar yaban: —Swis baku. Upla kumi sin dusa nani ba kangkbiara. Bara baku sika baha dusa nani ba ban bri kan, baha prapit nani Sameria wina balan dusa nani ba sin.

¹⁹ Utla tara nani gâd bahki watla paskan kan ba Sameria ra Israel kingka nani ba mita Dawan kupia sauhkaia dukiara, baha nani sut ba sakan pliska ba wina Josías mita; baku sin baha dukia nani wal Betel ra daukata baku daukan.

²⁰ Baha purkara, prîs bahki nani bâra kan ba sut ikan bara witin nani ai purara upla pruan dusa nani suni angkan. Baha ningkara Jerusalem ra kli tawi balan.

Josías ba Insal luan Yua Liliaka ba daukisa

²¹ Bara king mita upla nani ra adar yaban, Insal luan Yua Liliaka ba Dawan ra dauki yabaia ai Dawan Gâdka ra, naha wauhkataya ra lâka nani ulban ba baku.

²² Naha Insal luan Yua Liliaka ba Dawan ra dauki yabaia sâtka lika kau daukras kan, baku sin Israel kingka nani king aimaki kan ba yua nani ra sin daukras kata, baku sin Juda kingka yua nani ra daukras kan.

²³ Josías king aimakan pat 18 mani alkan yua ra sika, naha Insal luan Yua Liliaka ba Dawan ra dauki yaban Jerusalem tasbaya ra.

Dawan lawanka ba Juda mapara ban sa

²⁴ Baku sin Josías ba sukia nani, diara wan kanra takaia nani ba nu wan munisa wisi kunin aisi nani ba, upla nani ai tila kat aidul nani bri kan ba, bara aidul wala saura nani Jerusalem bara Juda wal ai tilara bri kan nani ba sut âpu daukan, baha bîla lâka nani prîs Hilquías mita Dawan watla ra kan sakan ba wauhkataya ra ulban kan ba tânka kat.

²⁵ King wala witin wal baku âpu kan, kainara bara ningkara sin, ai kupia bara ai sulka aiska kira Dawan ra tawan ba, Moses lâka ra ulban ba kat.

²⁶ Baha yamnika nani daukan ba sut purkara Dawan lawanka ba sip takaskras kan Juda mapara, baha Manasés daukanka saura mita ai kupia sauhkan kan bamna.

²⁷ Baha mita Dawan bui sin win kan ai mawan wina Juda ba sakbia Israel ra sakata ba baku, bara naha tawanka na lulki swibia, Jerusalem bâk sakan kan lulkan ba baku, bara baha tempelka watla dukiara witin win kata ba baku, ai nina ba bahara ban bâra kabia.

Josías pruanka ba

²⁸ Josías sturka bara dîa nani daukan ba, Juda kingka nani wauhkataya ra ulban sa.

²⁹ Witin piua ra king fero, Necao, Idsip kingka ba, Éufrates awalka kat balan Asiria kingka ra tâ baikaia dukiara. Bara ai mapara king Josías ba aiklabaia balan, sakuna Necao bui Meguido kat kaikan bara bahara witin ba ikan.

³⁰ Bara ai wihtka nani mita wagin ra mangki brih balan, Meguido wina Jerusalem kat, bara ai raitika kat bikan. Bara upla nani baha tasbaika ra iwi kan ba mita ai luhpia waitna Joacaz ba brih, ai watlika ra king mangkan.

Joacaz Juda ra king aimakan bara ai kingka lâka wina sakan ba

³¹ Joacaz ba king aimakan piua ra 23 mani bri kan, bara Jerusalem ra kati yumhpa king aimakan. Ai yaptika nani ba Hamutal mâki kan, witin ba Jirimaya Libná wina kata ba luhpia mairin.

³² Bara witin ba Dawan mawanra saura daukan, dîa ai damika nani daukan kan ba baku.

³³ Bara king fero Idsip kingka Necao mita, Riblá Hamat tasbaika ba kat alki, silak ra mangkan, ban kra Jerusalem ra king aimakbia kra sîa, bara ai tasbaya ba ra taibi munan lal mana silbar mâ 7,500 paun bara gul 75 paun aibapan.

³⁴ Baha purkara, king fero Necao ba mita Josías watlika ra, Eliaquim ba king mangkan ai aisika watlika ra. Bara ai nina ba Joaquim mâkan, bara Joacaz ba lika Idsip ra brih wan bâra ban pruan.

³⁵ Joaquim mita king fero Necao ra yaban kata, silbar bara gul nani, witin bui upla ra makabi kan ba yabia dukiara. Naha silbarka sakaia dukiara kuntri aiska ra upla nani ra lal mana kum kahban kata. Upla nani ba mita naha ba silbar bara gul ra aibapan kata lal mana kulkan ba, baku king fero Necao ra yabaia dukiara.

Joaquim Juda ra king aimakan ba

³⁶ Joaquim ba king aimakan piua ra 25 mani bri kan, bara Jerusalem ra 11 mani king aimakan. Ai yaptika nina ba Zebudá mâki kan, Pedaías Rumá wina kata ba luhpia mairin.

³⁷ Sakuna Dawan mawanra saura daukan, dîa pali ai damika nani daukan kan ba baku daukata.