2 King Nani 22 - DAWAN BÎLA AISKA

Josías Juda ra king aimakan ba

¹ Josías ba king aimakan witin 8 mani bri kan taim, bara witin ba Jerusalem ra 31 mani king aimaki kan. Ai yaptika nina ba Jedidá mâki kan, witin ba Adaías luhpia mairin, Boscat wina kan.

² Josías Dawan mawanra diara kasak baman daukan, ai yabalka nani sut tilara ai damika Debit yabalka ba kat tauki kan, bara baha yabalka wina tnaya ra tawras ban wapi kan.

Lâ wauhkataya ba pliki sakan sa

³ Josías king aimakan pat 18 mani alkan ba ra, king ba mita ai uplika sturi âiulbra Safán, Asalías luhpia bara Mesulam mulika ba, Dawan watla ra blikan wan. Bara witin ra win:

⁴ —Prîs tara Hilquías ra was, Dawan tempelka lalahka brih balan ba sut brih asla dauks, baha nani dur ra aihwawakra nani upla wina wahban ba sin asla dauks,

⁵ bara baha lalahka ba Dawan tempelka ra wark dauki nani ba mihta ra mangkbia, bara baha nani Dawan watla aisawan paski nani ra aibapbia,

⁶ wibia kaka baha nani utla mâmakra nani, utla mâki smasmalkrika nani ra, tasba pukni wal utla dadaukra nani, tat atki nani ba bara tempel watla playka walpa ni dauki nani ba, baha lalahka nani wal aibapi paskbia.

⁷ Baku sin wis baha lalahka tikaia ba dukiara lika lukbiara, kan witin nani ba lika tânkira diara nani daukisa bamna.

⁸ Bara Hilquías prîs tara ba mita sturi âiulbra Safán ra win Dawan lâka ulban wauhkataya ba sakan Dawan tempelka ra; bara prîs tara Hilquías mita Safán ra lâka ulban wauhkataya ba yaban, bara aisi kaikan.

⁹ Ningkara Safán ba king ra wan dîa taki na witin ra maisa pakaia, bara win: —King tara, dukiam dadaukra nani prias watla ra lalah bâra kan sakan bara wark dauki uplika nani mihta ra mangkan, baha uplika nani Dawan watla aisawan ba paskbia wisi sakan nani ba ra yaban.

¹⁰ Baku sin Safán bui king ra param win prîs Hilquías ba mita lâ ulbanka wauhkataya kumi yaban sa, bara witin naha wauhkataya na king ra aisi kaiki yaban.

¹¹ Bara king ba naha Lâ wauhkataya aisi kaikan walan ba ra, ai prâka ba kalkan,

¹² bara ningkara king mita naku adar yaban Hilquías ra, Safán luhpia Ahicam ra, Micaías luhpia Acbor ra, sturi âiulbra Safán ra, bara Asaías king wihtka ba ra sin:

¹³ —Man nani was Dawan ra aisaia, bara yang maita, upla nani mata bara Juda aiska dukiara sin, naha lâka wauhkataya sakan na dukiara; kan Dawan lawanka ba tara pali sa yawan wan mapara, wan damika nani ba naha wauhkataya ra ulban bîla ba walras kan, bahara dîa ulbi wankan ba kat daukras kan.

¹⁴ Bara Hilquías, Ahicam, Acbor, Safán bara Asaías, prapit mairin Huldá kaikaia wan, witin ba Salum maya mairin, witinka na Ticvá luhpia bara Harhás mulika, bara witin ba sin prâk nani ba auhbi aihwaki kaiki kan tempel ra. Huldá ba Jerusalem ra iwi kan, bara tawan bilara Baikanka Wâl bâra kan ba wina kumika ba ra iwi kan. Bara witin ra aisi banhwan ba ra,

¹⁵ pana witin mita win: —Dawan Israel Gâdka ba naku wisa: ‘Baha waitnika yang ra mai blikan balram ba ra wis,

¹⁶ yang Dawan sna ba, naku wisni: Yang mita naha pliska na sut sauhki tikaisna, naha tasbaika ra iwi uplika nani sut ra sin, wauhkataya ulbanka ra dîa maisa pakan ba kat, naha wauhkataya, Juda kingka aisan ba.

¹⁷ Kan yang ra ai swi si, gâd bahki nani ra kîa yamni nani angki yabi kan, baku kupi uya sauhkan, ai mihta warkka nani daukan ba wal. Bamna yang latwanki ba witin nani mapara sa, bara sin sip pali dasbia apia.

¹⁸ Bamna Juda kingka ra wi banhs, Dawan ra makabi walaia mai blikan ba, Dawan Israel Gâdka ba sin naku wisa: Man naha wauhkataya bîla ba walram ba mita,

¹⁹ bara man kupiam ba sin swapnikira pali takan, bara Dawan lamara sin bawram naha bîla ba tawan uplika nani mapara aisisa bara naha tasbaya ra iwi uplika aiska ba mapara sin, witin nani sut ba âpu pali daukbia saurkira nani ba, bara man prâmka ba kalkram, ba purkara sin yang maiwanra inram ba sin yang walri. Yang, Dawan, man ra aisisna.

²⁰ Baku bamna, kupia kumi pruaia maikamni bara damikam nani wal asla takma, bara pâtka saura wal naha pliska ra sauhki tikamna ba, namkra ni kaikma apia.’ Bara king blikan uplika nani ba kli balan, dîa wiaia kan ba witin ra win.