2 King Nani 20 - DAWAN BÎLA AISKA

Ezequías ai sikniska ba wina rawisa

¹ Baha yua nani ra Ezequías ba sikniska saura pali alkan, pruaia man kan. Bara Aiseya, Emus luhpia ba balan witin ra kaikaia bara win: —Dawan ba naku wisa: ‘Man wamtla uplika nani ra lâs bîla nani smalks, kan man pruaisma; man sikniskam na wina rawma apia.’

² Bara witin ba ai mawan tat kutban un ra lakan, bara naku Dawan ra ai pura sunan:

³ “Dawanki, yang mamkabisna man bui yang dukira kupiam krauks, kan yang sika man mamwanra kasak ba kat daukri kupi aiska kira ba wal, bara diara nani daukri ba sin man kupiam brinka kat daukri.” Bara Ezequías ba karna inan.

⁴ Kau Aiseya king watla latka bilara kan ba ra, Dawan bîla ba Aiseya ra naku win:

⁵ “Yang upliki nani wihtka Ezequías ra tawi wih wis: ‘Dawan, man damikam Debit Gâdka ba naku wisa: Yang lika man puram sunra ba walri bara man namkra laya nani ba sin kaikri. Yang mai rakaisna, bara lapta yumhpa dimbia yua ra Dawan tempelka ra uli was.

⁶ Kau 15 mani maikisni raya kaia naha tasbaika ra. Man ra bara Jerusalem sin pri sakamna Asiria kingka mihta ba wina. Ba purkara sin naha tawanka na kaina kahbamna, yang laitwanki ra bara naipakan Debit latwanka ra sin.’ ”

⁷ Bara Aiseya win kwah damni dusa ba wina tuski bribia, bara dauki muni sikniska purara yuki banhwan, bara king ba rawan.

⁸ Bamna Ezequías mita Aiseya ra makabi walan: —¿Dîa sainka brimna ki, Dawan bui yang ra ai rakaia tânka ba, bara yang lapta yumhpa alkbia ra Dawan watla ra uli wamna?

⁹ Bara Aiseya pana win: —Naha sainka na Dawan maikbia, baku mamrikaisa witin dîa pramis mai munan ba baha kat witin daukuya ba: ¿Man want sma ki baha distika ba mina mangka matawalsip ai kainara kitwi wabia, apia kaka kau kitwi ai ninara wabia?

¹⁰ Bara Ezequías win: —Dista ba ai kainara waia ba isi sa. Sakuna sip apia sa, baha distika ba ai ninara kitwi waia.

¹¹ Bara prapit Aiseya ba Dawan ra makaban, bara Dawan mita baha distika ba yaban ai ninara kitwi mina mangka matawalsip praiska wan.

Babilon wina blikan nani ba brisa

¹² Baha yua nani ra king Merodac-baladán, Babilon kingka Baladán luhpia ba, witin maisa papakra nani sakan bara blikan wan wauhkataya ulbi bara diara prisantka sin, kan walan Ezequías ba siknis pruaia man sa win bamna, baha kaikaia dukiara.

¹³ Bara Ezequías baha nani ra yamni brin, ningkara ai dukia kukanka watla nani ba, ai silbarka, ai gulka, diara kîa yamni nani bri ba, batana laya sin bara ai sordka watla nani, bara dîa wala nani bâra kan ba sut kumi sin swiras witin nani ra marikan Ezequías ba mita; baku sin king watla, ai tasbaya aiska ba sin marikan.

¹⁴ Bara prapit Aiseya ba king Ezequías ra balan bara makabi walan: —¿Baha waitnika nani ba ani wina balan, bara dîa sin mai win? Bara Ezequías pana aisi, win: —Plis laih wina balan, Babilon tasbaya ba wina.

¹⁵ Aiseya witin ra makabi walan: —¿Bara man wamtla ra dîa kaiki banhwan? Bara Ezequías pana win: —Dîa dîa nâra ba sut pali kaikan. Diara kumi sin kaikras wimna apia, sut kaikan.

¹⁶ Bara Aiseya mita Ezequías win: —Wals Dawan bîla na:

¹⁷ ‘Yua nani balbia, wamtla bilara diara nani uya bâra yaba, diara nani sut pali man damikam nani mita kulkan ba naiwa yua kat, baha nani aiska ba Babilon ra brih wan kabia, bara diara kumi sin takaskan kabia apia.

¹⁸ Bara man kiamkam nani man wina takbia ba, tila wina sut sin Babilon ra brih wabia, bara ai mahbra nani ba saki king watla ra alba bri kabia.’

¹⁹ Ezequías luki kan, witin ai rayaka yua nani ra kupia kumi bara sibrin luha pan bâra kabia, bara naku Aiseya ra win. —Dawan bîla man bui yang ra bal aisaram ba kasak pali sa.

Ezequías pruanka ba

²⁰ Ezequías dîa dîa daukan tâka ba bara ai daukanka tara nani, bara nahki lî watla paski muni lî kârma dauki tawan ra bri sal dingkan ba sin, baha nani ba Juda kingka nani wauhkataya ra ulban sa.

²¹ Bara Ezequías ba pruan ba ra, ai luhpia waitna Manasés ba king aimakan.