2 King Nani 19 - DAWAN BÎLA AISKA

Juda ba Senaquerib mihta wina pri sakisa

¹ Naha sturka ba king Ezequías walan ba ra ai prâka ba kalkan, ningkara prâk umpira diman sari ba tânka bara Dawan watla ra wan.

² Bara Eliaquim king watla ra diara nani pura kakaira ba, Sebná sturi âiulbra ba bara prîs kau almuk nani daknika ba sut kwala siksa nani dimi bara prapit Aiseya Emus lupia ra blikan wan,

³ witin ra wibia Ezequías ba naku win sa: ‘‘Naiwa yua na kupia wirha yua, klala yaia yua bara bawan lâka yua, sim mairin kum luhpa baikaia baila pali sa sakuna kuna karnika âpu taki ba baku sa.

⁴ Ban kra Dawan man Gâdkam ba walan baku sa, Asiria kingka bui ai wihta tara kum saki blikan Gâd rayakira ra lahtubaia bara sturi saura nani wiaia, Dawan Gâdkam ba bui naha uplika nani ra klala yabia, baha aisanka yamni apia nani Dawan mapara aisan ba tâwan. Witin nani ai tila kat kau kum kum takaskan bâra sa, baha nani dukiara puram suns.”

⁵ Bara king Ezequías wihtka nani ba Aiseya kaikaia balan,

⁶ bara Aiseya mita adar yaban witin nani ai dawanka ra naku wibia: ‘‘Dawan mita naku win sa: ‘Aisanka nani walram ba dukiara si bripara, baha bîla wal sika laihtuban Asiria kingka albika nani ba mita.

⁷ Kaiks, yang mita witin ra sturi binka daukamni, bara witin sturi binka ba walbia, ningkara ai tasbaya ra kli tawi wabia, bara baku yabrika ai tasbaya ra prubia, upla mita ikbia.’ ”

⁸ Bara Asiria wihtka ba walan Asiria kingka ba Laquis tawanka wina taki wan ba. Bamna witin Jerusalem wina taki wan bara kaikan Asiria kingka ba Libná mapara war aiklabi kan.

⁹ Ba purkara Asiria wihtka pat walan kan Tirhaca, Etiopía kingka ba, ai mapara war daukaia ridi takan ba. Bara kli Asiria kingka ba ai tawanka nani kaina aimamakra nani ba blikan wan Ezequías Juda kingka ra, bara naku win:

¹⁰ “Man Gâdkam, witin kat man kasak lukisma ba, man ra tâm baikbia lukisma Jerusalem ba yang karniki mununhtara kauhbia apia; ban sakuna baha dukiara witin yarka kunin mai munbiara.

¹¹ Man pat walram Asiria kingka ba mita tasba nani ailal pali ra sauhki tikan ba. ¿Bara man swak takma lukisma ki?

¹² ¿Yang damiki nani tawan sauhki tikan piua ra, gâdkam nani mita swaki sakan ki, naha ba Gozán, Harán, Résef, Bet-edén uplika nani Telasar ra iwi kan nani ba?

¹³ ¿Anira sa, Hamat. Arpad, Sefarvaim, Hená bara Ivá tasbaya kingka nani ba?”

¹⁴ Bara Ezequías ba tawanka bîla twatwilkra nani mihta ba wina wauhkataya ba brin, bara aisi kaikan. Ningkara, Dawan watla ra wan, bara Ezequías wauhkataya ba Dawan lamara kwâki mangkan,

¹⁵ bara naku ai pura suni, win: “Dawan, Israel Gâdka, kirubin nani tilara man iwisma ba, man baman sika king tasbaika nani bani tasba ra ba Gâd sma; man sika tasba bara kasbrika purara pali ba sin daukram.

¹⁶ Dawanki, man kiamam ba yang ra pri tniki wals. Dawanki, namkra nani ba ilingki kaiks, bara Senaquerib aisanka ba sin wals, witin sika Gâd rayakira sma ba mampara aisisa.

¹⁷ Dawan, kasak sa Asiria kingka nani ba bui nisan ailal tasbaika nani sauhki tikan,

¹⁸ baku sin ai gâdka nani bri kan ba sin pauta ra angkata, kan witin nani ba gâd pali nani apia kan bamna, baha ba upla mita daukan, dus bara walpa nani wal daukan dukia nani kan. Baha mita sika sauhki tikan ba.

¹⁹ Bamna nanara, yang nani ra Dawan wan Gâdka, nanara swaki wan sâks karnikam ba ni witin nani mihta ba wina, bara king tasbaya nani sut ba kaikbia man baman Dawan Gâd sma ba.”

²⁰ Bara Aiseya mita Ezequías ra ai bîla bliki win: “Dawan Israel Gâdka ba naku wisa: ‘Senaquerib Asiria kingka dukiara yang ra makabram ba, walri sa.’ ’’

²¹ Naha bîla nani sika Dawan aisan ba Asiria kingka ba dukiara: “Saion tawanka ba, mairin tiara kum baku, Senaquerib, lamwaska kikisa. Man ninamra Jerusalem ba ai lal wauhisa man mahka taki auma ba ra wisi.

²² ¿Ya ninara saura aisi lawaska kikram? ¿Ya mapara bîlam karna saki aisaram bara namkra nani ba kwalhwi pura kat bukram? ¡Israel Gâdka holikira ba mapara sika!

²³ Man bîlam dahra aisasara nani bâk, Dawan mapara saura aisaram. Man aisatma: ‘Yang waginki ailal nani brisna ba aiklabaia dukiara, baha nani sut wal unta tara nani ba purara uli wari. Bara ai yalamka bara ai awaska kau pranakira yari nani ba sin klakri. Bara kau unta biara ra dimi wari, baha pliska ba tangni kau pranakira nani pliska baku kan.

²⁴ Tasba tringsar ra yang mita liwanhta salhki, ai layawanhta ba wina lî sin diri; bara yang mini bîla nani ba wal sin Idsip tingnika nani aiska ba lâkri.’

²⁵ ¿Man aima kumi sin walras kapram ki, yang Dawan sna ba tânka, yang bui sika naha dukia nani sut daukri ba? Kaina piua wina naha ba aisi aulna, bara nanara lika yang daukri sa; baha mita sika man bui tawan karnakira pali, kutbanka tara nani daukan ba sin sauhki âpu daukisma, bara tawan sauhki tikanka tara nani ra laki swisma.

²⁶ Bahara iwi uplika nani ba ai karnika âpu pali kan, ai swira bara sibrinkira pali nani kan, bara witin nina ba sin inma wahia nani baku kan, twi sangni nani pâwi ba baku kan, utla bahna ra twi nani pâwi ba baku kan, bara lalma payaska laptika mita angki lâki kan.

²⁷ Man nahki wataukisma ba sut yang kaikisna, dîa dukia nani sut daukisma ba sin, bara sin nu sna man bui yang maipara kupiam sauhkram ba.

²⁸ Bara kupiam sauhkan lâka brisma ba kaikisna mita, bara pren takankam ba sin, baku ba mita yang bâra diara krukma kum kakmam ra klauhbi pamamna bara unam mangkaika sin mangkamna; baku kli mai lakrika wama ani yabalka balram bâk.”

²⁹ Bara Aiseya bui Ezequías ra win: “Naha ba sain kum takaia ba tukinka kabia: naha mani na bara mani wala aula ba, man nani plawar mâ nani ban wina pâwi ba wina pima, bara mani yumhpika ba alkbia piua ra mangki dâki banhma; bara wain nani sin mangki saki, baha wina mâ nani pima.

³⁰ Bara ya nani pruras swakwan nani ba, Juda ra inta wahia baku pâwi kabia, ai wakia nani sâkbia bara ai mâ ailal sin sâkbia.

³¹ Kan upla nani tila ba Jerusalem ra takaskan kabia, bara Saion ilka ra sin pruras swakwan nani ba bâra kabia. Naha ba Dawan karnika latwanka lâka ba mita daukbia.

³² ‘‘Bahamna, Dawan mita naku wisa Asiria kingka ba dukiara: ‘Jerusalem ra sip dimbia apia, trisba kumi sin mangki lulkbia apia, witin ai mapara ai lama praki aiklabaia dukia ni aiklabia apia, ba purkara sin ai yukuwaika sip mangkbia apia.

³³ Ani yabalka balan bâk kli tawi wabia; naha tawanka ra lika sip bal dimbia apia. Yang, Dawan, baku aisisni.

³⁴ Kan yang mita naha tawanka na kaina kahbamna bara swaki sin sakamni, yang naipakan Debit latwanka ra, baku sin yang silp laitwanki ra.’ ”

³⁵ Bara baha sim tihmika, Dawan insalka ba taki wan Asiria nani kiampka ra, bara upla nani 185,000 ikan, bara titan ra bûi banhwan ba ra sut pali ba pruan atia kan.

³⁶ Bara Senaquerib, Asiria kingka ba, kli tawi mahka wan Ninibi ra, bahara sika witin ba takaskan.

³⁷ Bara witin yu kum ai gâdka Nisroc priaska watla ra dimi mayuni kan, bara ai luhpia nani Adramélec bara Sarézer wal bui sord wal klaki ikan, bara Ararat tasbaya ra plapi wan. Ningkara witin ai watlika ra ai luhpia waitna Esarhadón ba king aimakan.