2 King Nani 18 - DAWAN BÎLA AISKA

Ezequías Juda ra king aimakan ba

¹ Oseas Elá luhpia ba Israel ra king aimakan pat mani yumhpa kan ba ra, Ezequías, Ahaz luhpia ba, mahka Juda kingka aimakan.

² Witin king aimakan ba piua ra 25 mani bri kan, bara Jerusalem ra witin ba 29 mani king lâka ra iwan. Witin ai yaptika ba nina Abí mâki kan, bara witin ba Sakaraya luhpia mairin kan.

³ Bara witin ba diara wapni pali ba daukan Dawan mawanra, dîa ai damika Debit daukan ba kat.

⁴ Witin mita sika gâd bahki nani dukia tempel ra paskan kan ba sut sakan, bara sin ai gâdka bahki nani ra yaia walpa ni paskan kan ba sin sut sauhki tikan, bara Aserá lilka paskan nani bâra kan ba sin sut klakan, bara bras piutka Moses bui daukan kata ba sin kriki pîs ra yakabata, kan Israel luhpia nani ba baha yua kat sin ban dus kîa nani angki yabi kan, bara sin ai nina ba Nehustán mâkan.

⁵ Bara Ezequías ba Dawan Israel Gâdka ra, ai kupia aiska ba mangkan. Witin kainara bara ningkara sin witin baku âpu kan, Juda kingka nani ba tilara.

⁶ Kan witin Dawan kat nina blikan, bara sin witin Dawan yabalka ba wina tnaya ra tawras kan, dîa Dawan bîla kainara Moses bâk ulbi yaban kan ba kat alki dauki kan.

⁷ Ba mita Dawan ba witin wal kan, bara anira taki auya piua ra pura luanka lâka ba Dawan bui witin ra yabi kan. Ezequías lika Asiria kingka mapara buan, baku sin witin dukia daukaia apia win.

⁸ Ba purkara sin, filisteo nani ra aiklabi pura luan Gaza ra, bara ai tasbaya piarkika nani kan ba sin sut dakban, tawer aihwawakra nani pliska purara daukan ba wina, tawan karnika kutbanka ba kat.

Sameria kauhanka ba

⁹ Oseas Elá luhpia ba pat 7 mani Israel ra aimakan kan, Ezequías sin Israel ra pat mani walhwal king aimaki kan piua ra, Salmanasar Asiria kingka ba bal Sameria ba kutbi brih ki mapara aiklaban,

¹⁰ bara mani yumhpa kat aiklabi pura lui dakban. Baha piua ra Ezequías ba pat 6 mani king aimaki kan, bara Israel kingka Oseas ba lika pat 9 mani Israel kingka aimaki kan, baha piua kat sika Sameria ba aiklabi dakban.

¹¹ Bara Asiria kingka bui Israel luhpia nani ba alki alba lâka ra Asiria ra brih wan, bara Halah tawanka ra yaban iwan, Habor tasbaika ra, Gozán awalka lama kat swin bâra kan, bara naha na Media uplika nani tawanka kan.

¹² Naha na Dawan ai Gâdka bîla walras kan ba mita sika takan ba, baha purkara sin Dawan wal aisi lâ daukan lâka ba krikan, bara sin Dawan napakanka Moses mita adar nani yaban ba sin krikan kata, baha lâka nani ba witin nani walras kan bara alki sin daukras kata.

Senaquerib bui Juda tasbaya ba dahra walras kutbi alkan

¹³ Ezequías ba king aimakan ba wina pat 14 mani bri kan ba ra, Senaquerib, Asiria kingka ba witin mapara aiklabaia balan, bara tawan kutbanka karnika bri kan nani ba sut dakban.

¹⁴ Bamna Ezequías Juda kingka ba mita Asiria kingka Laquis ra ai bîla blikan bara win: “Yang mistik kum daukri. Bamna kuntriki wina mahka was, bara yang laila mana aibapaia ai wima ba kat aibapamni.” Bara Asiria kingka ba mita Juda kingka Ezequías ra ai lal mana munan aibapbia win silbar 9,900 kilo bara gul lika 900 kilo.

¹⁵ Bahamna Ezequías ba mita silbar Dawan watla ra bâra kan ba bara king lalahka auhbaika ra bâra kan ba sut wal asla praki yaban.

¹⁶ Bara Ezequías ba gul Dawan watla dimaika ra bâra kan ba, Dawan watla playka nani gul wal lalaubi paskan kan ba sin sut saki, bara Asiria kingka ra yaban.

¹⁷ Ningkara Asiria kingka ba Ezequías ra wihtka tara kum blikan, aiklaklabra kau tara ba. Bara wala kum lika war aiklaklabra daknika tara tâura blikan wan, witin nani Laquis wina Jerusalem ra wan aiklabaia. Bara witin nani Jerusalem ra balan ba ra, lî madakura kwala tatuskra nani pliska ba kat bal takaski banhwan.

¹⁸ Ba ningkara king ra paiwan balbia bâra witin nani wal prawaia dukiara. Eliaquim, Hilquías luhpia ba, king watla pura kakaira ba, Sebná sturi âiulbra ba bara king wauhkataya âiulbra, Joah, Asaf luhpia, witin sika king wauhtaika âiulbra ba.

¹⁹ Bara Asiria wihtka tara ba witin ra win: —Nanara Ezequías ra bliki maisa paks naha king sturka tara na, Asiria kingka tara ba naku wisa: ‘¿Dîa dukia wal man ba kasak sma lukisma?

²⁰ ¿Man lukisma sturi painkira aisanka ba, sim baku sa war aiklabaia smalkanka nani wal baku bara aiklabaia karnika ba wal? ¿Ani uplika ra kasak lukisma yang maipara buaia dukiara?

²¹ Yang kaikisna man ba Idsip uplika nani ra tniwisma. Baha pain, Idsip ba kayu taiban yuya baku sa, bahara tniwisma ba, ya bahara tniwi ba ai mihta bâk silak dimi mâ walak lubia. Baha sika king fero Idsip kingka, ya uplika nani witin ra kasak lukbia kaka, baku takbia.

²² Bara baku sin man nani bui yang ra ai wima kaka: Yang nani Dawan wan Gâdka ra kasak lukisna, yang kasak pali tânka brisna naha waitnika sika kiuhsi pura nani ra prias watla nani sauhki tikan ba, Ezequías apia. Bara sin Juda bara Jerusalem uplika nani ra adar yan, Jerusalem altarka ra baman mayunaia ba.

²³ Asiria kingka wal aisi lâ kum dauks, yang dukia dadaukra sna ba: Yang aras nani 2,000 maikamna, man araska âiulra nani sâkma kaka.

²⁴ Man Asiria aiklaklabra kau sirpi kum ra sin sip yabrika plapbia apia, ¿bara man bîla kaikisma aras bara aras âiulra nani briaia Idsip ra?

²⁵ Baha purkara, ¿man ban kra lukisma yang naha pliska ra aiklabi sauhki tikaia balri na, Dawan ba luha taukisna? ¡Dawan ba yang ra adar aikan sa, aiklabi sauhki mai tikaisna ba!’

²⁶ Bara Eliaquim, Sebná bara Joah mita sin, Asiria wihtka tara ra win: —Mamkabisna man wan aisas Aram uplika bîla ra, baku yang nani tânka brimna. Hibru bîla ra wan aisapara, kan baha uplika nani kutbanka purara bâra ba mai walisa.

²⁷ Kuna Asiria wihtka ba win: —Yang ra ai blikras sa man dawankam bara man nani ra mai wiaia, sakuna baha waitnika kutbanka purara nani ba ra wiaia ai blikan. Kan witin nani baku man nani sut kli tawi tâski kan bara iskikam dima sa.

²⁸ Bara wihta ba ai mina ra buan, bara ai bîla karna winan Hibru bîla ra: —King tara bîla na wals, Asiria kingka ba aisin:

²⁹ ‘Yarka king Ezequías mita kunin mai munbiara, kan man nani ba yang mihti wina swaki mai sâkbia apia.’

³⁰ Ezequías trai munbia kupiam lakaia wisi: ‘Dawan ra baman kasak lukma’ wibia, bara mai wibia: ‘Kasak pali sika Dawan ba mita swaki wan sâkbia, baku sin baha tawanka tara na, Asiria kingka ba swika sip pali bribia apia’,

³¹ Ezequías ra walpara, kan naku sika Asiria kingka ba aisisa: ‘Yang wal kupia kumi dauks, bara yang ra taki bal, bara kumi bani wainkam bara tawahkia dusa mâ ba wina pima, bara kumi bani ai laya watlika ba wina sin lî dima.

³² Ningkara yang bal muni, tasba kum maikamna, mani tasbayam na sâtka bara bahara mai brih wamna; plawar mâ nani bara sin wain nani tasbaya sa, brit bara wain nasla sa sin, batana laya bara batana dusa wal tasbaya sa, bara sin nasma tasbaya sa, bahara iwi kama bara sip sin pruma apia. Ezequías bîla walpara, kan witin sika kunin man mai munisa, Dawan swaki wan sâkbia bîla ba mai wisa.

³³ ¿Dîa gâd bahki nani tawan sât sât nani bri ba ai tila kat, pat aima kum pan pat pri mai sakan sa ki, Asiria kingka mihta ba wina?

³⁴ ¿Anira sa ki Hamat wihki Arpad gâdka ba wal? ¿Anira sa Sefarvaim, Hená bara Ivá nani kat gâdka ba? ¿Witin nani ba sip kan ki Sameria ba Asiria kingka mihta wina pri sakaia?

³⁵ ¿Ani gâdka bahki nani ba sip kan ai tasbaya ba pri sakaia Asiria kingka mihta wina? ¿Dîa muni lukisma, Dawan bui Jerusalem ba pri sâkbia?’

³⁶ Upla nani ba sâp kan, bîla kumi sin pana aisaras kan, king baku adar yan bamna: “Upla kumi sin pana aisabia apia.”

³⁷ Bara king watla pura kakaira tara Eliaquim ba, Sebná, sturi âiulbra ba, bara Joah, king wauhkataya âiulbra ba, witin nani sari takan bara ai prâka nani ba kalkan ningkara Ezequías ra balan, bara Asiria wihtka tara dîa aisin ba sut win.