2 King Nani 17 - DAWAN BÎLA AISKA

Sameria kauhanka ba bara Israel tasbaya wina kangbi sakan ba

¹ King Ahaz Juda kingka aimakan ba wina pat 12 mani alkan ba ra, Elá luhpia waitna Oseas ba king aimakan Israel ra, bara Sameria ra 9 mani king aimakan.

² Bara Dawan mawanra saura daukan, ban sakuna Israel kingka nani saura daukan ba baku lika apia.

³ Bara Asiria kingka Salmanasar mita Oseas mapara aiklaban, ningkara ai albika daukan bara diara lal mana aibapi kan.

⁴ Sakuna Salmanasar ai adar walan Oseas yukuwan ra ai mapara diara daukaia luki kan ba, bara upla nani kum kum saki Idsip kingka So ra blikan, baha purkara lal mana aibapras kan mani bani aibapi kan mânka ba. Bamna Salmanasar adar yan Oseas ba alki silak ra mangkbia wisi;

⁵ ningkara kuntrika aiska kutbi brih ki, takaskras pali Sameria mapara mani yumhpa aiklaban.

⁶ Bara Oseas ba king aimakan ba wina pat 9 mani diman ra, Asiria kingka ba mita Sameria tasbaya aiska ba dakban, bara Israel luhpia nani ba alba lâka ra sut alki brih wan, bara Halah ra swin, Habor tasbaya ra, Gozán awalka lama pali kat, Media uplika nani tawanka ra.

⁷ Naku takan Israel luhpia nani ba Dawan ai Gâdka mapara saura daukan ba mita, ai dahra walras kan witin mita Idsip tasbaya wina sakan kata ba king fero mihta ba wina, kan gâd bahki nani ra mayuni dukia dauki kan,

⁸ bara upla sât wala nani lukanka ra baman tauki kan, baha tawanka nani sika Dawan bui witin nani ai mawan wina kangbi sakan ba ai kupia ra briras kan, baku sin Israel kingka nani mita lâ nani bapan kata ba.

⁹ Baha purkara, Israel luhpia nani ba Dawan Gâd lamara diara yamni nani apia ba daukan, ai tawanka nani aiska ba idan gâdka nani pliska paskan, aihwawakra nani watla laih purara paskan ba wina tawan kutbanka tara nani paskan ba kat.

¹⁰ Baku sin walpa holikira nani bukan bara Aserá lilka nani paskan dus pranakira nani ba mununhtara, baku sin il bîla nani ra,

¹¹ bara baha pliska ra dus kîa pain nani ba angkan upla sut ai natka baku, ai tasbaya wina kangbi sakan sainka Dawan brin daukras dukia nani daukan, baha tâwan sika pat witin nani ra kangbi sakan ba diara saura uya dauki kan mita, baku Dawan kupia sauhki banhwi kan.

¹² Bara witin nani ba gâd bahki nani ra mayunan, Dawan pat win kata bahmuna daukaia apia.

¹³ Pat Dawan mita prapit nani bara baku sin diara kakaira nani bâk, Israel uplika ra kupia kraukan witin nani ai yabalka saura ba wina tawi bal witin lâka bîla yaban ba alki daukbia, bara ai adarka nani witin nani damika nani ra smalki yaban ba ai dukia dadaukra prapit nani bâk.

¹⁴ Ban sakuna, witin nani ai kupia ba karna pali daukan, kaina piua ra ai damika nani daukan ba baku, bara sin witin nani Dawan ai Gâd ra kasak lukras kan.

¹⁵ Bara witin nani ai lâka nani ba lulki swin, bara sin ai damika nani wal lâ aisi daukan kan ba sut krikan, baha tânka bribia dukiara kaina wina ulbi swin kan ba witin nani dukiara. Bara baku gâd bahki nani ba nina blikan, bara witin nani ba sin bahki baman takan. Baha purkara sin, nisan sât wala nani witin nani ai lamara iwi nani kan ba ninara wan, baha pali dukiara sika Dawan mita pat win kan daukbiara naha uplika nani dauki ba.

¹⁶ Dawan ai Gâdka lâka nani kan ba sut swi banhwan, bara bîp lilka wâl paskan ayan angki slilkan wal, bara sin Aserá lilka bahki sin paskan bahara mayunaia, bara kasbrika purara slilma nani ra bara Baal ra sin mayunan.

¹⁷ Baku sin ai luhpia waitna bara ai luhpia mairin nani ba pauta ra angkan, baku sin ai kanra diara takaia ba kaiki wi uplika nani ra ai kaina kaiki kan, bara diara luki sakisa wisi dauki nani ra ai tânka pliki kan, baku sika witin nani Dawan mawanra diara saura dauki banhwi kan, bara baku Dawan kupia sauhki kan.

¹⁸ Bahamna Dawan ba ai kupia sauhkan Israel luhpia nani ba mapara bara ai mawan wina sakan, bara Juda kiamka nani baman yaban takaskan.

¹⁹ Ban sakuna, Juda sin Dawan Gâd lâka nani ba kulkras kan, sakuna witin nani ban Israel lâka kat ban tauki kan, dîa witin nani dauki kan ba kat.

²⁰ Bara Dawan mita Israel kiamka nani aiska ba ai lamara kaiki ba wina sakan, bara swira dauki âimplikra nani mihta ra mangkan.

²¹ Bara Israel luhpia nani ba Debit king aimaki aula ba wina dakbi sakan kata, witin nani mita Nabat luhpia, Jeroboam ba king mangkan. Bara Jeroboam mita sika Israel luhpia nani ba Dawan lama wina tnaya ra lakan bara saurka tara pali yaban daukan.

²² Bara Israel luhpia nani ba Jeroboam saurka daukan kan ba wina, kumi sin tnaya ra tawras ban dauki tauki kan, witin dîa dauki kan ba kat.

²³ Lâs kat Israel luhpia nani ba Dawan mita ai mawan ba wina sakan, sip pain takras kan bamna, dîa witin prapit nani bâk aisan ba kat, bara Israel luhpia nani ba Asiria ra alki brih wan, naiwa yua ba kat ban bâra sa.

Upla nani ba Sameria ra kli iwan

²⁴ Bara Asiria kingka ba Babilon wina upla nani brih balan, baku sin Cuta, Avá, Hamat bara Sefarvaim wina, bara naha uplika nani aiska ba Sameria ra swin, Israel luhpia nani watlika ra. Baku witin nani Sameria ba brin bara ai tawanka nani ra iwi banhwan.

²⁵ Sakuna naha uplika nani Dawan ra mayunra sin daukras kan ba mita, witin nani mahka ai pliska brin taim Dawan mita witin nani mapara layan nani blikan bara ai tila kat kum kum ra iki kan.

²⁶ Bamna Asiria kingka ra wih wi banhwata: “Upla nani man mita Sameria tawanka ra brih waram ba bahara iwbia dukiara, baha nani tasbaika bara gâd lâka bâra ba tânka briras nani sa, bara ba mita witin mita layan nani blikan sa, bara kaiks layan nani ba bui witin nani ra ikisa.”

²⁷ Baku bamna, Asiria kingka ba mita adar yan: “Prîs nani alba baku bri balram ba wina bahara kum blîks, bara witin nani sin bahara iwbia bara baku sip kabia baha gâdka lâka ba witin nani ra tâ baiki smalkbia.”

²⁸ Bara prîs nani Sameria wina alki brih wan kan ba wina kum balan bara Betel ra iwan, bara baha nani ra smalkan nahki Dawan ra sibrin lukaia ba.

²⁹ Sakuna nisan bani silp ai gâdka bahki nani paski bri kan ani tawanka ra iwi ba ra, bamna Samaritan nani ai priaska watla nani ba kiuhsi purara paski bri kan ba kat mangkan.

³⁰ Babilon uplika nani ba Sucot-benot lilka paski bri kan; Cuta uplika nani ba Nergal lilka paski bri kan, bara Hamat uplika nani ba lika Asimá lilka paski bri kan.

³¹ Avá uplika nani ba lika Nibhaz kum bara Tartac kum dauki bri kan, bara Sefarvaim uplika nani lika ai gâdka nani Adramélec wihki Anamélec wal ra mayunaia dukiara ai luhpia nani pauta ra angki sakripais dauki yabi kan.

³² Ba purkara witin nani ba Dawan ra kulkanka yabi kan, ban sakuna witin nani prîs nani saki bri kan bara witin nani sika lukras priaska watla nani ra dukia dauki mayuni kan.

³³ Baku bamna, Dawan ra mayunra yabi kan sakuna, silp ai gâdka bahki nani ra sin mayuni kan, ani tasbaika wina witin nani balan kan ba natka ba kat, ban dauki banhwi kan.

³⁴ Naiwa yua kat ban daukisa patitara kan ba baku, kan Dawan ra kulkanka yabras, ai lâka bîla nani bara ai adarka nani sin kulkras, ba purkara sin Dawan bîla ba kaina wina ulbi ban adar nani Jekob kiamka nani ra yaban, bara Gâd bui sika Jekob nina ba Israel mâkan ba, baha lâka nani ba sin kulkras sa.

³⁵ Dawan ba witin nani wal lâ daukan ningkara, naku adar yan: “Gâd bahki nani ra kulkanka yapara, mayuni warkka sin daukpara, ba purkara sin daiwan iki angki witin nani ra sin mayunpara, sakripais sin dauki yapara.

³⁶ Sakuna yang ra kulkanka aiki banhs, Dawan Gâdkam sna ba, ai karnika aiska mariki Idsip wina mai sakan ba. Yang ra baman kulkanka aikaia sma, bara mayunra aikaia bara yang ra sin sakripais nani dauki aikaia.

³⁷ Baha purkara, yang bui lâ nani, adar nani bara daukaia dukia nani ulbi maikri ba kulkaia sma, bara baha nani sin alki dauki kaia sma, bara gâd bahki nani ra si bripara.

³⁸ Âmya tikpara man nani wal lâ aisi daukri ba dukiara, ba purkara sin upla wala gâdka bahki nani ra sin si bripara.

³⁹ Kau kanra, Dawan man nani Gâdkam ra sibrin luks, bara baku lika yang mita man nani ra waihlam nani sut mihta ba wina dakbi mai sakamna.”

^40-41 Ban sakuna, baha nisanka nani walras baku dauki kan, bara witin kau kanra ai natka almuk nani kan ba lika dauki kan; baha piua ra baha uplika nani Dawan ra baku sibrin luki kan, sakuna witin nani ban sin lilka bahki nani ra mayunra yabi kan. Bara baku sin ai luhpia nani bara mulika nani ba ai aisika nani dîa dauki kan ba kat daukan, bara ban sin naiwa kat daukisa.