2 King Nani 16 - DAWAN BÎLA AISKA

Ahaz Juda ra king aimakan ba

¹ Pécah Remalías luhpia ba king aimakan ba wina 17 mani alki kan ba ra, Ahaz, Jotam luhpia waitna ba, Juda kingka aimakan.

² Ahaz ba king aimakan ba ra witin ba 20 mani bri kan, bara Jerusalem ra 16 mani king aimakan. Bara Dawan lamara diara yamni ba daukras kan ai damika Debit daukata baku,

³ sakuna Israel kingka nani yabalka ra tauki kan, ai luhpia ba sakripais daukaia yaban, tasba wala nani Dawan yamni kaikras dukia nani dauki kan ba baku witin sin daukan, bara Dawan mita Israel luhpia nani ai mawan wina kangbi sakan.

⁴ Baha purkara sin sakripais daukan bara kîa yamni angki kan, idan nani ai gâdka bahki ra mayuni dauki kan ba; il nani ra bara dus wahia pranakira distika nani mununhtika ra sin naha nani ba dauki kan.

⁵ Baha piua ra, Resín, Siria kingka ba, bara Pécah, Remalías luhpia Israel kingka ba wal, Jerusalem ra wan war daukaia. Bara aikuki Ahaz ra kutban, sakuna witin nani sip apia kan tawan ba dakbi briaia.

⁶ Baha yua ra Edom kingka ba kli Elat tasbaya ba Edom dukiara dakbi brin, bara Elat ra Juda waitnika nani bâra kan ba sut baha wina kangbi sakan ningkara, bahara iwaia takaskan bara naiwa yua kat bâra iwi banhwisa.

⁷ Bara king Ahaz ba mita Tiglat-piléser Siria kingka ra ai tawanka tâwan aisin bîla twatwilkra nani ba blikan wan, bara win: “Yang na man dukiam dadaukra sna bara sin man luhpiam baku sna. Baku bamna, bal bara Siria kingka mihta wina bara Israel kingka mihta ba wina sin dakbi wan sâks, kan witin nani ba yang maipara aiklabaisa.”

⁸ Bara Ahaz Dawan tempelka ra bara king watla ra gul bara silbar bâra kan ba brih, Asiria kingka ra prisant baku blikan wan.

⁹ Baku Asiria kingka ra tâ baikan, bara Asiria kingka ba balan bara Damaskus ba dakbi brin, baha ningkara bahara iwi nani kan uplika nani ba sut Quir ra alba lâka ra brih wan, bara Resín ba sin ikan.

¹⁰ Baha ningkara king Ahaz ba Damaskus ra Asiria kingka Tiglat-piléser wal prawaia wan, bara kaikan daiwan iki angkaia altarka bâra kan ba. Bamna prîs Urías ra altarka nahki paskan ba patrangka kum blikan,

¹¹ bara prîs Urías ba altar kum paskan, nahki king Ahaz Damaskus wina dauki blikan kan yaba kat, bara kau king ba Damaskus wina aula kan ba ra baha ba pat ridi kan.

¹² Bamna king ba Damaskus wina balan ba ra altar ba kaikan, bara king baha lamara balan bara daiwan iki angki yaban baha pliska ra;

¹³ baha aiska angkan bara barli mâ nani sin yaban, bara ningkara wain laya baha altar ba purara srikban, daiwan ikan tâlia ba sin srikban, naha ba kli wal uplika takaia sakripaiska kan.

¹⁴ Bara baha bras altarka Dawan tempelka mawan kat kan ba lika, Ahaz bui saki altar ba yahbra tani ra mangkan, bara nanara Dawan altarka raya ba bara tempel ba lila kat kan.

¹⁵ Baha ningkara prîs Urías adar yaban altar tara ba ra titan yu aiska angkbia wîna ba, bara tutni ra lika barli mâ nani ba angkbia, bara aiska angkaia barlika mâ nani ba king ra yabaia prisantka kabia, bara aiska angkaia barli mâ, wain ba, upla sut dukiara angkbia. Bara sin win altar ba purara tala ni srikbia aiska angkaia sakripaiska ba, ban sakuna bras altarka ba lika Dawan ra pas makabi wali daukbia.

¹⁶ Bara prîs Urías ba dîa king Ahaz mita win kata ba kat daukan.

¹⁷ Baha ningkara king Ahaz ba lî watla playa ba klakan, bara bîp wainhka lilka bras ni paskan ba, laya watla ba twilki kan, baha wina saki walpa lalauban kum purara mangkan.

¹⁸ Baku sin, Asiria kingka kupia lâka daukaia wisi, Dawan tempelka wina sakan luaika lata tani ra king dukiara paskan kan ba, ris yua ba dukiara.

¹⁹ Ahaz ai warkka daukan sturka tâka nani ba, Juda kingka nani dukiara ulban wauhkataya ra bâra ulban sa.

²⁰ Bamna king Ahaz ba pruan ba ra, ai damika nani lamara bikan, Debit Tawanka ra. Bara ai watlika ra ai luhpia Ezequías king aimakan.