2 King Nani 14 - DAWAN BÎLA AISKA

Amasías Juda ra king aimakan ba

¹ Joás Joacaz luhpia ba mani wâl Israel ra kingka aimakan piua ra, Amasías, Joás luhpia ba, Juda kingka aimakan.

² Witin ba king aimakan piua ra 25 mani bri kan bara 29 mani Jerusalem ra king aimakan. Ai yaptika nani ba Joadán, bara Jerusalem wina kan.

³ Amasías diara wapni baman daukan Dawan kaiki kan ba ra, ai damika Debit daukan pali baku lika daukras kan sakuna, ai papika Joás dîa daukan kan ba lika daukata.

⁴ Diara yamni baman daukan sakuna, idan nani gâdka ra pura sunaia watla mâkan kan ba lika sakras kan, bara upla nani ba ban baha nina bliki ban daiwan iki baha ra sakripais bara kîa yamni ba angki kan.

⁵ Bara Amasías ai mihta ra king lâka karna mangkan ba ra, baha wihta tara nani ai aisika ikan kata uplika nani ra ikan.

⁶ Sakuna baha waitnika nani ai papika ra ikan nani kan ba luhpia nani ba lika ikras kan, dîa Moses wauhkataya ra ulban kan ba kat, Dawan adarka yan ba kat: “Aisika pâtka nani ba tâwan luhpia nani ra ikaia apia sa, bara luhpia nani tâwan sin aisika nani ikaia apia, ban sakuna upla bani ba ai saurka ba tâwan lika pruaia sa.”

⁷ Bara Amasías bui sika Edom uplika nani 10,000 iki tikan Sâl Langnika Bîla ra, baku sin Selá ba aiklabi dakban bara nina mâkan Jocteel, naiwa yua kat nina ba baku ban sa.

⁸ Baha ningkara, Amasías mita maisa papakra nani blikan Joás, Joacaz luhpia waitna bara Jehú mulika ra, witinka ba Israel kingka, bara naku win kata: “Man bal bara wan mawan nani ba pana pana kaikpi.”

⁹ Sakuna Joás bui witin ra naku ai bîla blikan: “Kiaya ba mita Líbano yalamka ra naha bîla nani blikan: ‘Luhpiam mairin ba luhpi waitna ra maya yas.’ Sakuna daiwan wail kum bahak lui wan, bara kiaya ba ai mina ra taibi lapaskan.

¹⁰ Edom ra pura luram ba kasak kulkisna, baha mita man kupiam ra lukisma man baman sma. Aitani pain, man baman sma baku luki bas; sakuna kanra yamni kabia man watla ra takaski bâra kama. ¿Dîa kan man un pâtkam plikisma bara Juda ra sin pât ra dingkaia lukisma?”

¹¹ Ban sakuna, Amasías ba walras baku kan. Bamna Joás mahka taki wapan Amasías mapara aiklabaia dukiara, Bet-semes ra, baha lika Juda tasbaya ra ba.

¹² Bara Juda ba Israel mawanra kauhan, bara kumi bani ai watla nani ra plapi wan.

¹³ Joás Israel kingka ba mita Amasías Juda kingka ra silak mangki bri kan Bet-semes ra, bara baha ningkara Jerusalem ra wan, bara kutbanka ra unta kum kwâkan 200 ‘‘mita’’ prais, Efraín Durka dimaika wina Un wala Durka dimaika ba kat.

¹⁴ Baha purkara gul, silbar bara diara wala nani sin Dawan tempelka ra kan ba sut pali brin, baku sin king watla ra kukanka bâra kan ba aiska pali brin. Bara upla nani kum kum silak uplika baku alki brih ki, Sameria ra kli tawi balan.

¹⁵ Joás dahra nani kau bâra ba, dîa dîa daukan ba, pura luanka manis brin ba, bara Amasías Juda kingka mapara aiklabata ba, baha sut Israel kingka nani wauhkataya ra ulban bâra sa.

¹⁶ Bamna Joás ba pruan, bara Sameria ra biki banhwan, Israel kingka nani ba lamara. Baha ningkara ai watlika ra ai luhpia waitna Jeroboam ba king aimakan.

¹⁷ Amasías, Joás luhpia, Juda kingka ba, Joás pruan ningkara kau mani 15 raya iwi kan, witinka lika Israel kingka bara Israel kingka kan ba.

¹⁸ Amasías dîa dîa daukan tâka ba, Juda kingka nani sturka wauhkataya ra ulban sa.

¹⁹ Jerusalem ra Amasías mapara buan kata, bara witin ba Laquis ra plapan; sakuna Laquis kat nina bliki, baha kat ikan.

²⁰ Bara ba ningkara aras kum purara suni bri balan, bara ai damika nani aikuki Jerusalem Debit Tawanka ra bikan.

²¹ Bamna Juda tawanka uplika nani aiska ba buan bara Azarías ba ai kingka brin ai aisika Amasías watlika ra. Baha piua ra Azarías ba 16 mani bri kan,

²² bara witin mita sika ai aisika ba pruan ningkara, Elat tawanka ba kli paskan bara kli Juda tasbaika takan.

Jeroboam II Israel ra king aimakan ba

²³ Amasías mani 15 king aimakan ba piua ra, witinka ba Joás luhpia, Juda kingka ba, Jeroboam, witinka ba Joás luhpia, Israel kingka ba, mahka Israel ra king aimakan, bara Sameria ra mani 41 king aimakan.

²⁴ Ban sakuna, ai daukanka nani ba Dawan nakra ra saura kata, kan Jeroboam, Nabat luhpia saurka nani daukan ba wina tnaya ra tawras kan, witin sika Israel ra yaban saurka daukan ba.

²⁵ Jeroboam mita sika Israel piarkika nani ba kli bapan, Hamat ra dimi waia ba wina Arabá kabuka ba kat, dîa Dawan Israel Gâdka aisan kan ba kat, ai napakan Jona bâk, witinka ba Amitai luhpia waitna, witinka ba prapit Gat-héfer wina kata ba.

²⁶ Kan Dawan bui Israel paniska wahwanka tara ba kaikan kata, baha wina upla kumi sin swakras kan, bara Israel ba hilp kumi sin âpu kata ba.

²⁷ Bamna Dawan mita Israel nina ba kasbrika mununhta ba wina kau diki sakaia lukras kan, bahamna Jeroboam, Joás luhpia waitna mihta bâk swaki sakan.

²⁸ Jeroboam daukanka nani tâka ba, dîa dîa daukan ba, pura luanka nani brin ba ai kupia karnika wal, war nani daukan ba, bara nahki Damaskus wihki Hamat tawanka nani kli dakbi Israel tilara dingkan ba, baha sut lika Israel kingka nani sturka ulbi swin ba wauhkataya ra ulban sa.

²⁹ Bamna Jeroboam ba pruan ba ra, Israel kingka nani aikuki bikan. Ningkara ai watlika ra ai luhpia Sakaraya ba king aimakan.