2 King Nani 13 - DAWAN BÎLA AISKA

Joacaz Israel ra king aimakan ba

¹ Joás, Ocozías luhpia ba Juda kingka mani 23 aimaki kan piua ra, Joacaz, Jehú luhpia ba, Israel ra mahka king aimakan, bara Sameria ra 17 mani king aimakan.

² Bara witin sin Dawan mawanra diara nani saura daukan, bara Jeroboam, Nabat luhpia saurka kata ba nina bliki daukan, witinka sika Israel ra yaban saurka daukata ba, bara baha wina wiria sin tnaya ra tawras kan.

³ Bara Dawan ba ai kupia sauhkan Israel luhpia nani ba mapara, bara baha tâwan Hazael, Siria kingka ba mihta ra mangkan, baha purkara sin Ben-hadad, Hazael luhpia waitna kata ba mihta ra mangkan.

⁴ Bamna Joacaz ba Dawan lamara ai pura sunan bara Dawan mita ai pura sunra ba walata, kan Israel luhpia nani kupia kriwan kan ba kaikan, Siria kingka ba bui taibi bri kan ba mita.

⁵ Bara Dawan bui Israel ra swaki sasakra kum yaban, bara Siria uplika nani karnika ba wina pri sakan, bara Israel luhpia nani ba kupia kumi kli ai watla nani ra wih iwi kan, kainara kan ba baku.

⁶ Naha diara nani sut purkara, witin nani Jeroboam saurka ba wina sip tnaya ra tawras kan, baha waitnika Israel ra yaban saurka ra kauhan ba, baha saurka kat witin nani ban tauki kan, baku sin Aserá ba Sameria ra swin ban bâra kan.

⁷ Bara Joacaz aiklaklabrika nani waitna 50 baman takaskan kata, baku sin aiklabaia waginka nani matawalsip bara waitna nani 10,000 ai mina wapi aiklabi, kan Siria kingka ba bui aiska sut iki tikan bara yamhpus baman daukan kata.

⁸ Bara Joacaz diara nani daukan tâkika ba bara ai kupia karna bri kan ba sturka ba sin, Israel kingka nani wauhkataya ra ulban bâra sa.

⁹ Bara Joacaz ba pruan ba ra Sameria ra bikan. Ningkara witin ai watlika ra ai luhpia Joás ba king aimakan.

Joás Israel ra king aimakan ba

¹⁰ Joás king aimakan ba wina pat mani 37 kan piua ra, Joás, Joacaz luhpia waitna ba, Israel ra mahka king aimakan, bara witin ba Sameria ra 16 mani king aimaki kan.

¹¹ Sakuna Dawan mawanra saura pali daukata, kan Jeroboam, Nabat luhpia saurka kata ba wina tnaya ra tawras kan, witin sika Israel ra yaban saura daukan ba, baha saurka ra witin nani ban tauki kan.

¹² Joás daukanka nani bara ai karnika aiska kira Amasías Juda kingka mapara war daukan ba, Israel kingka nani dukiara ulban ba wauhkataya ra ulban sa.

¹³ Bara Joás ba pruan ba ra, Sameria ra Israel kingka nani lamara bikan. Ningkara Jeroboam ba king iwaika ba brin.

Ilaidsa ba ai yua tnata ra diara takaia kan ba dukiara aisisa

¹⁴ Bara Ilaidsa ba pruaia sikniska alkan kan, bara Joás, Israel kingka ba, witin ra balan kaikaia, bara witin ai mawanra ini kiaubi alkan bara win: —¡Yang aisiki, yang aisiki, Israel hilpka ra aiklaklabra karnakira kum katma ba!

¹⁵ Bara Ilaidsa win: —Pantamangka kum bara trisbaya kum kum bris. Bamna witin ba pantamangka bara trisba nani ba sin brin.

¹⁶ Bara baha ningkara Ilaidsa mita witin ra win: —Trisbaya kum lulkaia ridi taks. Bara king ba baha dauki kan ba ra, Ilaidsa bui ai mihta nani ba king mihta nani purara mangkan,

¹⁷ bara win: —Windar ba bukuts lapta baiwi ba tani ra. King ba bukutban bara Ilaidsa mita adar yaban: —¡Nanara lulks! Bara king trisbaya ba lulkan. Bamna Ilaidsa winan: —¡Dawan swaki sakanka lâka trisbaya! ¡Siria mapara bûi swakwaia trisbaika! ¡Afec kat Siria uplika nani ba man bui pura lui iki âpu daukma!

¹⁸ Bara kli aima wala ra king ra win: —Trisbaya nani ba bris. Bara king ba trisbaya ba alkan, bara Ilaidsa adar yan: —Nanara tasba ra wips. Bara king ba aima yumhpa tasba ra wipan, bara alki takaskan.

¹⁹ Bamna prapit ba ai kupia sauhkan bara win: —Man tasba ra aima matsip, apia kaka aima 6 wipram kaka, Siria uplika nani ba pura lui âpu daukaia kapram; sakuna nanara lika Siria uplika nani ra aima yumhpa baman pura luma.

²⁰ Ilaidsa ba pruan, bara biki banhwan. Baha wina mani bani kli kli naha tasbaika ra Moab wina âimplikra daknika nani ba bal pura lui kan bamna,

²¹ piua kum ra waitna kumi pruan kan ba Israel luhpia nani tasba ra biki kan ba ra, baha âimplikra nani daknika kum aula kan ba kaiki, uplika pruan ba Ilaidsa raitika bilara lulki bataki si plapi banhwan. Bara waitnika pruan ba Ilaidsa dusa nani ra kangban ba ra, kli rawi ai mina ra buan.

²² Hazael, Siria kingka ba bui, Israel luhpia nani taibi bri kan Joacaz yua nani ra.

²³ Ban sakuna, Dawan ba witin nani dukiara ai kupia swapnikira, yamni pali kaiki kan, Ebraham, Aisak bara Jekob wal lâ aisi daukan kata mita, sauhki tikaia ai brinka apia kan, bara ai mawan wina sin kangbi sakaia lukras kan. Bara naiwa yua kat sin baku daukras sa.

²⁴ Bara Hazael Siria kingka ba pruan ba ra, witin ai watlika ra ai luhpia Ben-hadad ba king aimakan.

²⁵ Bamna Joás, Joacaz luhpia ba, Ben-hadad mihta wina tasba nani ai aisika Joacaz mihta wina war aiklabi dakban kan ba kli dakbi brin. Bara Joás bui aima yumhpa Ben-hadad ra pura luan, bara Israel tawanka nani ba baku kli dakbi brin.