2 King Nani 12 - DAWAN BÎLA AISKA

¹ naha baku takan Jehú ba 7 mani king lâka ra iwi kan piua ra; bara Jerusalem ra 40 mani king lâka ra iwi kan. Ai yaptika nina ba Sibiá mâki kan, bara Beerseba wina kata.

² Bara Joás ba diara wapni baman daukan Dawan mawanra king aimaki kan yua nani sut ra, baha ba prîs Joiadá mita smalkan.

³ Ban sakuna, baha pliska nani ra daiwan iki angkaia watlika idan nani bri kan ba lika sakras kan, upla nani ba kau ban daiwan iki angki yabi kan, ba purkara sin dus mâka kîa nani ba sin ban angki yabi kan baha pliska nani ra.

^4-5 Bara yu kum Joás mita prîs nani ra win: —Man nani asla wahbi bri bas tempel ra lalah Dawan ra prisant nani baku yabi ba, baku sin upla bani ai lal mana aibapi ba, upla ai kupia lâka kat lalah nani Dawan tempelka ra brih bali nani ba sin. Lalah main kaiki uplika nani ra makas tempel watla ra pîska nani aisawan bâra nani ba sut pain paskbia.

⁶ Sakuna Joás ba king aimakan pat 23 mani alkan yua kat, kau prîs nani ba Dawan tempelka aisawan pîska nani ba paskras kan.

⁷ Bamna king Joás mita prîs Joiadá ba paiwan balan bara prîs wala nani ba sin, bara witin nani ra win: —¿Dîa muni tempel aisawan nani ba paski banhras sma? Bamna nanara man nani lalah ba kau bripara main kakaira nani ba wina, sakuna witin nani ra yas tempel aisawan nani ba paskbia.

⁸ Bara prîs nani ba aitani lukan kli upla ba wina lalah briras kan, tempel aisawan ba witin nani bui paskaia ai purara apia kan ba mita.

⁹ Prîs tara Joiadá bui tat ni diara auhbaika watla kum paskan, bara baha purara unta kum klauhban; ningkara Dawan altarka lama pali kat bri si swin, mihta aihkika tani ra, bara ya ya lalah Dawan watla ra brih bal kan ba, prîs tempelka dimaika ra kan ba ra auhbi kan.

¹⁰ Bara ani yua ra kaikan lalah ba auhbaika ba banhwan sa, bara king watla ra sturi âiulbra ba balan prîs tara ba sin balan lalah ba kulki watlika wala ra mangki swi kan,

¹¹ bara baku lalah ba aitani pali pura kaiki kan. Ningkara Dawan tempelka ai mihta ra brih pura kaiki nani ba mita baha lalahka ba tempel papaskra nani ra mana aibapi kan.

¹² Bara baha lalahka ba wina sin simint ni paski nani ra bara walpa ni paski nani ra aibapi kan, bara dus nani atki kan walpa nani Dawan tempel aisawan ba paskaia dukiara; baku sin dîa dîa wala Dawan tempelka ra ba paskaia dukia ba, baha lalahka ba wina saki atkan.

¹³ Bara baha lalahka Dawan tempelka ra brih bal kan ba lika silbar kapka tara, diara klakaika dukia sâtka, mihta bara mawan wal sikbaika, trumpit, gul dukia nani sin kau paskras kan Dawan tempelka ba dukiara,

¹⁴ kan baha lalahka ba wal sika wark uplika nani ba mana aibapi kan, ba purkara sin baha wal Dawan tempelka aisawan ba paski kan.

¹⁵ Ban sakuna, baha waitnika nani lalah brih wark uplika nani ra aibapi kan ba ra makabras kan, lalahka ba wal nahki pali dauki sapa, kan witin nani ba aitani kat dauki kan ba mita.

¹⁶ Sakuna baha lalahka saurka mana bara pâtka swih tikaia dukiara yabi kan ba lika Dawan tempelka ra brih waras kata, kan baha lalahka ba sika prîs nani ra yaia kan ba.

¹⁷ Baha piua ra Hazael, Siria kingka ba, Gat mapara bal aiklaban bara pura luan, bara ningkara Hazael ba Jerusalem mapara sin wih aiklaban.

¹⁸ Sakuna Joás, Juda kingka ba, king nani Josafat, Joram bara Ocozías ai aisika nani bui Juda kingka lâka ra diara holikira nani yaban kan ba sut brin; baku sin witin mita yaban dukia nani ba brin, baha purkara gul Dawan tempel ra auhbi swin kan ba sut brin, baku sin king watla ra kan ba sin sut brih, Hazael Siria kingka ra blikan, bara witin Jerusalem ra ai aiklabanka dauki kan ba takaskan.

¹⁹ Bara Joás diara nani sut daukan sturka nani ba, Juda king nani wauhkataya ra ulbi mangkan sa.

²⁰ Bara witin ai suldiarka lalka nani bui ai mapara taki witin ba ikan tasba yakabi daukan pliska watla ba kat, baha lika Silá iwaika ra ba.

²¹ Baku bamna, Josacar, Simat luhpia, bara Jozabad, Somer luhpia ba, ai suldiarka wihtka nani ba, witin ba iki banhwan, bara pruan taim Debit Tawanka ra bri si bikan. Ningkara witin ai watlika ra ai luhpia waitna Amasías ba king aimakan.