2 King Nani 11 - DAWAN BÎLA AISKA

Atalía mita iwaika ba dakbisa

¹ Atalía Ocozías yaptika ba, ai luhpia ba pruan ba walan ba ra, witin buan bara king kiamka nani aiska sut iki tikan.

² Sakuna Joseba, king Joram luhpia mairin bara Ocozías lakrika ba mita Joás Ocozías luhpia waitna ba brin, bara king luhpia nani iki tiki kan ba tila wina tnaya ra laki, Atalía nakra wina yukukan, witinka bara ai mainka kakaira mairka ba wal, yapaia rumka kum ra. Baku natka ra ikras swakwan,

³ Baku sika Joás ba witin ra main kaiki mairka wal Dawan tempelka ra yukuwi kan 6 mani. Baha piua ra, Atalía ba tasbaya aiska ra wihta tara aimaki kan.

⁴ Bara 7 mani alkan ba ra, Joiadá mita aiklaklabra lalka nani, bara quereteo nani bara aiklaklabra daknika nani sin paiwan balan, bara Dawan tempelka ra yaban diman, witin bâra kan ba kat. Bahara witin nani wal aisi lâ dauki swer takan, bara king luhpia waitna Joás ba upla nani ra marikan.

⁵ Baha ningkara adar yaban: “Naha sika man nani daukaia sma ba: man nani tilam wina baiki sakanka yumhpa wina kumi ba king watla ra bâra aihwaki kama ris yua ra;

⁶ baiki sakanka yumhpa wina wala kumi ba Sur dur dimaika ra aihwaki kabia; bara baiki sakanka yumhpa wina wala ba lika king watla ra dimaika nina tani ra bâra aihwaki kabia. Baku natka ra watla ba aihwaki main kaiki kama, dakni kum taki wabia ba ra, wala dimi kabia.

⁷ Baku bamna, man nani wina ris yua ra dakni wâl ra takbia ba, Dawan watla ra wih king watla ba wal aihwaki kabia king lamara.

⁸ Man nani king lama ba kir main kaiki kutbi kama, sordkam nani mihtam ra bri kama, bara ya ya baha man nani bâra sma ba ra dimi balbia kaka, pruaia sa. Ba purkara sin, king lamara kaia sma anira king ba taki auya bara kli tawi aula piua ra, man nani lika witin yula kahbi kaisma.”

⁹ Bara dîa prîs Joiadá win adarka ba kat kiaptin nani ba daukan. Bara upla bani ba ai uplika nani ba brin, nahki ris yua ra aihwakaia wi dimi kan ba, baku sin taki auya ba, ningkara prîs Joiadá ra bal maisa paki kan.

¹⁰ Bara prîs ba mita ai kiaptin nani bani ra langsa nani, ai lama prakaika nani, Debit aiklabaia dukia nani bri kan ba yaban, baha nani Dawan tempelka watla ra swin kata ba.

¹¹ Bara aihwawakra nani ba mahka bûi banhwan ai pliska nani ra, kumi bani aiklabaia dukia nani bri kan ba wal ai mihta ra, utla aihkika tani wina, laih smihka tani ba kat aihwaki kan, baku sin daiwan iki angkaia pliska watla ba sut kir aihwaki kan, bara king lama aiska kir kutbi bri kan.

¹² Bara Joiadá king luhpia waitna ba sakan, bara kraun ba lal mangkan, bara king sainka ba sin mangkan, bara batana laya ba laiki muni king mangkan. Bara upla sut ai mihta pruki winan: “¡King ba raya sa!”

¹³ Bara baha binka tawan uplika nani bara suldiar nani sut kira dauki kan Atalía walan ba ra, Dawan watla ba kat wan, upla nani sut bâra kan ba kat.

¹⁴ Bara ai natka ba kat, king ba tempel watla playka pali ba kat bûi kan, bara ai tnaya ba kir bri kan wihta nani bara binka sâtka kakangbra nani baman. Bara upla nani baha tasbaya ra iwi nani kan ba sut ai lilia tara bri kan bara trumpit nani ba sin puhbi kan. Bara Atalía ai prâka ba kalkan, ningkara ai bîla saki winan. —¡Maipara buan! ¡Maipara buan!

¹⁵ Sakuna prîs Joiadá bui adar yaban kiaptin nani war lalka nani ra: —¡Upla nani tila wina latara sâks, bara ya uplika witin nina blîkbia ba sut sord ni iks! Kan prîs ba bui win kan Dawan tempelka watla bilara lika ikbia apia,

¹⁶ bara ba mita baha nani witin ba alkan bara king watla ra aras nani dimaika bâk saki, bara baha kat ikan.

¹⁷ Baha ningkara Joiadá lâ kum daukan Dawan, king bara upla nani ba kat, bara witin nani ba Dawan uplika nani ai wîna ba kulkan, king bara upla nani ba tila kat sin baku ai wîna ba kulki banhwan.

¹⁸ Ningkara baha tasbaika uplika sut ba Baal tempelka ra diman, aidul altarka nani ba sut slingbi sauhki tikan, baku sin daiwan iki angkaia pliska nani ba sut pali kriki yakaban, bara lilka nani kan ba sin sut sauhkan. Bara Matán Baal prîska ba lika nana dakbi ikan daiwan iki angkaia pliska ba kat. Bara prîs Joiadá ba mita aihwawakra kum Dawan tempel ba aihwaki kaia mangkan.

¹⁹ Diara sut takan ba ningkara, kiaptin nani, quereteo nani lalka nani, aihwawakra nani bara upla nani naha tasbaya ra iwi nani kan ba sut aikuki asla, king ba yabal bâk brih balan aihwawakra nani dimaika mawan bâk, bara king Joab ba king iwaika ra yaban iwan,

²⁰ bara naha tasbaya uplika nani aiska ba ai lilia brih banhwan. Bara tawanka ba lamni pali iwi kata, kan Atalía ba king watla bîla kat sord ni ikan kan ba mita.

Joás Juda kingka mangkisa

²¹ Joás ba king aimakan witin mani 7 baman bri kan ba ra,