2 King Nani 10 - DAWAN BÎLA AISKA

Jehú bui Ahab watla uplika nani ba iki tikisa

¹ Ahab ba Sameria ra luhpa waitna nani 70 bri kan. Bara baku Jehú mita wauhtaya nani ulbi Sameria tawan wihtka nani ra, tawan almukka nani ra, Ahab luhpia main kakaira nani ra blikan, bara naku ulban kan:

² “Man nani wihtkam tara luhpia nani, aras nani, aiklabaia wagin nani, watla bara rakska karnakira nani brih banhwisma bamna, ani yua ra naha wauhkataya na man nani ra wabia ba ra,

³ man nani wihtkam tara luhpia nani tilara ani ba kau wapnika sa kaka, sâks bara ai aisika pliska ra mangks, bara wihtkam watla bîla uplika nani ba dukiara aiklas.”

⁴ Baha witin nani walan ba ra, sibrin pali taki banhwan, bara naku win: “Kaiks, king wâl witin mawanra sip buras kan kaka, ¿yawan nahki witin pura lubia?”

⁵ Bara king watla main kakaira ba, tawan wihtka tara ba, almuk nani bara smasmalkra nani ba sut mita Jehú ra ai bîla bliki, win: “Yang nani lika man adarkam bri banhwisna, bamna dîa dîa sut ai wima ba, yang nani daukamna. Upla kumi ra sin yang nani king saki mangkamna apia. Bamna man dîa daukaia lukma ba dauks.”

⁶ Bara witin mita aima wala ra kli ulbi win: “Man nani ba yang duki sma kaka, bara yang bîli sin walaia wilin sma kaka, man wihtkam tara luhpia nani lal ba dakbi brih, yang ra yauhka titan ra blîks balbia Jezreel ra.” Bara kingka luhpia nani 70 ba tawan bilara upla kau tara nani ba mihta ra swin paki kan.

⁷ Baku ba ra naha nani wauhtaika na brin ba ra, king luhpia waitna nani 70 kan ba sut ikan, bara baskit nani ra lal nani ba mangki Jezreel ra blikan.

⁸ Bara sturi bri balan uplika balan ba ra, Jehú ra witin win: —King luhpia nani lal ba witin nani pat bri balan sa. Bara Jehú adar yaban: —Tawan ra dur ra dimaia ba kat lal nani ba paskanka wâl dauki swis bâra kabia, yauhka titan kat.

⁹ Bara yapra wala titan Jehú mahka taki wan, bara baha kat bûi bara naku win tawan uplika nani aiska ra: —Man nani lika pâtkas sma. Yang mita sika wihtki mapara saura daukri, bara sin ikri; sakuna, ¿ya bui naha nani na iki tikan?

¹⁰ Nanara tânka bri bas, Dawan dîa aisan kan ba Ahab taika dukiara, baha sika aimakisa. Dawan ba naha dukia nani daukisa Ilaidsa bâk, witin ai albika ba.

¹¹ Ningkara Jehú bui Ahab pamalika kau takaskan nani ba sut pali iki tikan Jezreel ra, baku sin ai wihtka tara nani ba, taika nani ba, witin uplika latwankira nani kan ba, bara prîs nani bri kan ba sin sut sin ikan, upla kumi sin raya swiras.

¹² Baha ningkara Sameria ra wan, bara yabal ra Bet-equed Sepad nani pliska ba ra wan,

¹³ bara bahara, Ocozías, Juda kingka kata ba muihnika nani wal prawan, bara Jehú makabi walan: —¿Man nani ba ya sma ki? Bara witin nani mita pana win: —Yang nani ba Ocozías muihnika nani sna, bara yang nani balri king luhpia nani bara kwin luhpia nani ba lakula wiaia dukiara.

¹⁴ Bara Jehú tawi ai nina blablikra nani ra adar yaban: —Witin nani ba raya alki banhs. Bara witin nani ba raya alkan, ba ningkara sut ba nana dakban Bet-equed Sepad nani pliska ba liwanhtika ba lamara. Kumi sin raya swiras, waitna nani 42 kan ba sut ikan.

¹⁵ Baha ningkara Jehú baha wina mahka wan. Kau wiria wan ba ra, Jonadab, Recab luhpia wal prawan, witin Jehú kaikaia wan kata. Jehú bui ai lakula wih, bara witin ra win: —¿Man lukankam ba pain brisma yang tani, yang bui man ra lukisna ba baku? —Baku sa —Jonadab win. —Ban kaka, mihtam ba aik —Jehú mita win. Jonadab mita Jehú lakula win ba ra, Jehú ai waginka ra suni brih wan,

¹⁶ naku wih: —Yuli kahbi yang wal bal, bara kaikma yang nahki prais Dawan nina tâwan lawisna. Bara wagin ra suni brih wan.

¹⁷ Bara Jehú ba Sameria ra wan ningkara, Ahab luhpia nani kau Sameria ra raya takaskan nani ba sut ikan. Alsut iki tikan, dîa Dawan bîla Ilaidsa ra aisan kan ba kat.

Jehú bui Baal ra mayuni nani kan ba aiska âpu daukan

¹⁸ Baha ningkara Jehú upla nani aiska ba asla daukan, bara win: —Ahab lika wiria baman Baal warkka daukan, sakuna yang Jehú lika kau wark ailal dauki kamna.

¹⁹ Baku bamna, Baal prapitka nani ba sut paiws balbia, witinka ra mayuni nani bara prîska nani ba sut, kumi sin takaskbiara, kan yang lika Baal ra mayunaia dukiara sakripais tara kum dauki brisna. Ani uplika balras kabia kaka, sip pali raya kabia apia. Jehú ba tânkira pali daukan, baku muni Baal ra mayuni nani kan ba sut âpu daukaia dukiara.

²⁰ Baha mita, Jehú adar yaban lilia yua kum Baal ra daukaia, bara baku daukan kata.

²¹ Baha ningkara Jehú bui Israel aiska ra maisa papakra blikan wan, bara Baal ra mayuni kan nani sut tempel ra balan. Bamna aiska pali balan kan, kumi sin takaskras, bara Baal priaska watla ra dimi banhwan, bara Baal priaska watla ba banhki pali kan, tnaya wala ba wina tnaya wala ba kat.

²² Bara Jehú win baha uplika prâk nani main kaiki ba ra, Baal ra mayuni prâka nani ba bri balbia. Bara witin bui prâka nani ba bri balan, dîa win ba kat.

²³ Bara Jehú wih, Recab luhpia waitna Jonadab wal Baal tempelka watla ra dimi wan, bara Baal ra mayuni nani ra win: —Aman kaiks, man nani tilamra Baal mayuni nani baman tilamra kabiara, Dawan ra mayuni nani ba kumi sin âpu kabia.

²⁴ Bara witin nani daiwan iki aiska angki yabaia diman ba ra, Jehú latara waitna 80 mangkan, bara smalkan: —Ani uplika man nani tilamra naha waitnika nani mihtam ra mangkri na, swika kum plapi swak takbia kaka, man rayakam ba witin watlika ra pruan kaia sa.

²⁵ Jehú witin daiwan nani ba iki aiska angkan ba ningkara, aiklaklabra nani wihtka nani ra adar yabi win: —¡Nanara man nani bal dimi uplika nani ba iks! ¡Kumi sin swak takbiara! Bara Jehú uplika nani dimi, baha bilara upla nani bâra kan ba sut sord ni ikan. Bara saki lulkan ningkara Baal ra ai pura suni ba pliska kat diman.

²⁶ Bara Baal lilka nani paskanka priaska watla ra kan nani ba sut sakan, bara angkan.

²⁷ Baku sin altarka paskan kan ba krikri tikan, bara Baal tempelka kan ba sin sauhki tikan, bara dipasta lulkaika pliska daukan, baha ba naiwa yua kat baku ban sa.

²⁸ Baku sika Israel ra Baal kata ba Jehú bui âpu daukan.

²⁹ Baha sut daukan, sakuna Jehú ba Jeroboam, Nabat luhpia waitna saurka kata ba wina tnaya ra tawras kan, bara Israel ra yaban saurka bara bîp lilka gul wal daukan kata ba Betel bara Dan wal ra bahara mayuni kan.

³⁰ Bara Dawan Jehú ra win: “Man lika yang naikra ra diara yamni nani ba daukram, baha purkara sin yang kupi ra Ahab watla ra daukaia lukri kan ba kat daukram, bamna man kiamkam nani ba king iwaika ra mani nani ailal iwbia ban kiamka nani 4 ba kat Israel tasbaika ra.”

³¹ Ban sakuna, Jehú ba Dawan Gâd lâka Israel luhpia nani ra yaban ba kat iwras kan, baha sut purkara Jeroboam saurka kata ba wina sin tnaya ra tawras kan, baha mita Israel ra yan saurka daukan ba.

³² Bara baha yua nani ra, Dawan mita Israel tasbaya ba sirpi daukan. Bara Hazael mita Israel tasbaya aiska ba aiklabi pura luan:

³³ Jordan lapta uli ba wina, Galaad tasbaya aiska bâk, Gad tasbaya aiska, Ruben tasbaya aiska bara Manasés tasbaya ba kat, bara Aroer wina, baha lika Arnón tingnika un lamara ba, Galaad wihki Basán wal ba kat.

³⁴ Bamna Jehú sturka tâka bara dîa daukan ba sut, bara ai karnika aiska wal daukan ba, king nani sturka ulbi mangkan ba ra ulbi swin sa.

³⁵ Bara witin pruan ba ra, Sameria ra bikan, bara ai watlika ra ai luhpia Joacaz king aimakan.

³⁶ Jehú Sameria tawanka ra Israel luhpia nani kingka 25 mani aimaki kan.