1 Tesalonaika 5 - DAWAN BÎLA AISKA

¹ Sakuna baha ahkia takan ba, baha piua nani ba yang ulbi mai wiaia ba nit apia.

² Man nani pain kaikisma, Dawan yua ba lika bîla kaikras pali kama ba ra balbia, sim âimplikra kum tihmia ra aula ba baku.

³ Upla nani bila “Diara sut ba sâpkira bara trabil kumi sin âpu sa” aisi kabia ba ra, bâra mika ban wina sauhki tikaia lâka ba witin nani purara balbia. Baha ba lika sim mairin kwihra aisubaia piua aimakan latwanka nani bri ba baku kabia; bara witin nani sip swak takbia apia.

⁴ Sakuna, muihki nani, man nani lika tihmia ra apia sma, bamna Dawan yua ba mita âimplikra baku mai alkbia apia.

⁵ Kan man nani sut lika ingni uplika nani sma bara kakna uplika banhwisma sin. Yawan na tihmia uplika apia, tihmia tara uplika sin apia sa.

⁶ Baku bamna, yawan na wala nani ba baku yapaia apia sa; yawan lika raya kaia sa bara wan dara sin pain wali kaia sa.

⁷ Tihmia ra sika upla nani yapi ba, bara tihmia ra sika upla nani dih bla taki ba.

⁸ Sakuna yawan lika kakna uplika nani, baku bamna, wan dahra pain wali kaia sa. Yawan na kasak lukan lâka bara latwan lâka wal wan kaina kahbaia sa, sim suldiar kum ai lal prakaia dukia ni ai kaina kahbi ba baku. Baku sin yawan na swaki sakan lâka ba wan kanra bîla kaikaia sa.

⁹ Kan Gâd lika yawan pât bribia wisi bâk wan sakras sa, sakuna wan Dawan Jisas Kraist bal swaki sakan lâka bribia dukiara mika.

¹⁰ Jisas Kraist yawan dukiara pruan, bara baku mika yawan raya kabia, pruan kabia kra, witin wal asla raya iwi banhbia dukiara.

¹¹ Baha mita, pana pana tâm baiki bas, bara pana pana sin walkam ra hilp muni bas, nanara daukisma ba baku.

Pal bui muihni nani ra smalkisa

¹² Muihki nani, yang nani mamkabisna man nani tilamra wark taki nani ba kulki kama, witinka nani Dawan bâk sakan ba tâm briaia dukiara, bara mai smalkaia dukiara sin.

¹³ Witin nani ra kasak kulki bas, bara kasak sin latwan kaiks, witin nani wark dauki nani ba dukiara. Pana pana walkam nani aikuki kupiam kumi lâka ba brih iwi bas.

¹⁴ Baku sin, muihki nani, yang nani mamkabisni, wark takan daukras nani ba ra lawi daukma, si brabrira nani ba tâ baikma, swapnikira nani ba hilp muni banhma, bara upla sut wal kupiam alki takaski bri bas.

¹⁵ Aman kaiks, upla kum mita wala ra saura munbia kaka, pana saura munbiara. Sakuna, man nani piua sut pana pana walkam wal diara yamni ba daukaia trai muni bas, bara upla sut wal aikuki sin.

¹⁶ Man nani piu sut liliam bas.

¹⁷ Piu bani puram suni banhwi bas.

¹⁸ Diara sut dukiara Gâd ra tingki wi bas, kan naha sika Gâd mita man nani wina want ba, Kraist Jisas ra kasak lukisma bamna.

¹⁹ Man nani Spirit pâta ba daskpara.

²⁰ Gâd mita ingni yan mita sturi pain aisi banhwi ba, bahki kulkpara.

²¹ Diara nani sut ba tânka trai kaiki bas, bara dîa pain ba alki bris.

²² Man nani saurka sât sât wina tnaya ra taki banhs.

²³ Gâd pali mita, witinka kupia kumi lâka wanki ba, man nani ba witin ai uplika pali mai daukbia, bara spiritkam, sulkam bara wînam tara ba sin tâski âpu yamni bri kabia, wan Dawan Jisas Kraist balaia ba dukiara.

²⁴ Witinka mita man nani mai paiwan ba, kasakkira sa, bara naha sut witin mita daukbia.

Prakaia lakula nani

²⁵ Muihki nani, yang nani dukira puram suni bas.

²⁶ Wan muihni nani sut ra lakula wis kiawalanka holikira kum wal.

²⁷ Dawan karnika mita man nani ra mamkabisna, naha wauhkataya na wan muihni nani sut ra aisi marikma.

²⁸ Wan Dawan Jisas Kraist mita man nani ra yamni mai munbia.