1 Tesalonaika 2 - DAWAN BÎLA AISKA

Tesalonaika tawanka ra Pal wark daukan ba

¹ Bamna muihki nani, pain kaikisma man nani ra wih mai kaikatna ba lika bahki baman apia kan.

² Man nani pain kaikisma, yang nani na pat kanra Pilipai tawanka ra nahki saura ai wisata bara nahki sin rau ai sauhkata ba, Tesalonaika ra balras katna ba ra. Baku ai muni banhwan, ban sakuna, Gâd mita yang nani ra hilp ai munan ai sturka yamni ba sibrin âpu mai smalki banhwamna dukiara, aiklabanka karna tilara.

³ Kan yang nani dîa aisi mai smalki katna ba lika swakwanka âpu kan; bara tâski lâka wal aisi smalkras katna, upla ra sin baha ni kunin munaia lukras kapri.

⁴ Sakuna, yang nani lika piua sut dîa Gâd want ba kat aisisna, kan witin mita trai wan munan, bara sturi yamni ba smalki kamna wisi aikan. Yang nani mita upla nani dîa brin dauki ba kat daukras, kuna Gâd brinka ba kat mika, witinka wan kupia nani tânka pliki kaiki ba.

⁵ Kan man nani kaikisma ba baku, yang nani mita man nani ra mamyuni bîla painkira nani aisaras, bara lalah briaia wisi kunin bîla nani sin aisaras katna. Gâd baha witniska sa.

⁶ Upla nani wina mayunra plikras kapri, man nani wina, apia kaka upla wala nani wina kra; ban sip katna yang nani Kraist apastilka nani baku, man nani puramra karniki tânka ba mamrikaia;

⁷ sakuna pain mai muni banhri, sim yapti kum ai luhpia nani paki bara main kaiki ba baku.

⁸ Man nani ra uya latwan mai kaikisna ba mita, yang nani ridi kapri Gâd sturka yamni ba mai smalkaia bara rayaki nani pali sin yabaia. ¡Man nani ra uya latwan mai kaikri sa!

⁹ Muihki nani, man nani pain kupiam kraukisma si, nahki wark taki trabil bri banhwatna ba, yang nani rayaki hilpka bri kaia dukiara. Kakna bara tihmia wark taki banhwi katna, Gâd sturka yamni mai smalki kapri ba ra, man nani puramra wirhika kumi sin maiki banhras katna.

¹⁰ Naha witniska nani sma, bara Gâd sin: man nani lalukra nani sma ba tilara, yang nani ba sunu katni, kasak lâka ra sin iwi banhwi katna, bara upla kumi mita sin pât kum dukiara kra sip daihra sakras kan.

¹¹ Pain sin kaikisma, nahki man nani kumi bani ra, yang nani tâm baikri bara maisam nihkri ba, sim aisa kum mita ai luhpia nani ra maisa nihki ba baku.

¹² Mai smalkri, man nani lika Gâd uplika nani watauki ba baku kama; witinka mai paiwi ba, ai kingka lâka bara ai prana ba sin witin ai dukia sa.

¹³ Yang nani naha tâwan, piu sut Gâd ra tingki wisna. Gâd sturka yamni ba sal maikri ba ra, man nani walram bara alki briram; upla bîla baku lika briras katma, sakuna Gâd bîla baku mika. Bara kasak pali baha ba Gâd sturka yamni sika, bara man nani kasak lukisma ba tilamra baha ba wark daukisa.

¹⁴ Muihki nani, Gâd sertska nani Judia ra takan ba baku, man nani ra sim sât mai takan, Kraist Jisas tânka nani ba. Man nani ba kuntrikam uplika nani mita ninam bliki rau mai sauhkan, witin nani ra ai kuntrika uplika Ju nani mita nina bliki, rausauhkan ba baku.

¹⁵ Naha Ju nani sika Dawan Jisas ba ikan, patitara ai prapitka nani ra ikan ba baku; bara yang nani ra sin kangbi ai sakan. Witin nani ba dîa Gâd want ba kat daukras bara upla sut mapara bûi banhwisa.

¹⁶ Ju apia nani ba ra sin yang nani aisaia lukri, witin nani sin swaki sakan kaia mata, sakuna witin nani bui yang nani ai swin aisaras. Bara baku natka ra witin nani saura daukan ba kau tara daukan. Sakuna nanara lâs kat, klala saura pali ba Gâd wina witin nani purara balan sa.

Pal kli Tesalonaika uplika nani ra wih kaikan daukisa

¹⁷ Muihki nani, man nani wina piu wiria dakwi takri ba ra, mai kaikras kapri sakuna, kupi ra piu sut mai luki banhwi katna, bara wih mai kaikan pali sin ai dauki kata.

¹⁸ Yang nani waia munri; yang Pal, aima manis waia want kapri, sakuna aima bani Sitan mita yang nani ra ai alki ai takaskan.

¹⁹ ¿Bamna yang nani kainira diara bîla kaikisna ba, liliaki ba bara yang nani maiyunra kraunka ba, dîa kabia ki? Baha ba man nani pali sika, wan Dawan Jisas Kraist balbia ba ra.

²⁰ Âu, man nani mita sika âiyapah ai daukisma ba, bara lilia kaia ba sin.