1 Samuil 9 - DAWAN BÎLA AISKA

Saúl Samuil wal prawan ba

¹ Benjamín kiamka tilara waitna kum bâra kan nina Quis, Abiel luhpia kan bara Seror mulika; ai aisika damika nina ba Becorat, Afíah luhpia waitna. Quis ba kulkanka tara bri waitnika kan.

² Ai luhpia waitna kum bri kan, wahma mawan painkira, nina Saúl. Witin ai prana bri ba baku Israel ra wala âpu kan, waitna wala nani witin pâwanka ba pahpaya pura kat sin luras kan.

³ Yu kum, Quis birikuka mairin nani ba tiwan. Bara witin ai luhpia Saúl ra win: —Bus, ridi taks biriku nani tiwan ba pliki waia, albikam kum sin brih was.

⁴ Saúl taki wan, Efraín ilka biara kir taukan bara Salisá tasbaya bâk luan; sakuna biriku mairin nani ba sakras kan. Saalim bara Benjamín tasbaya sut taukan, bahara sin sakras kan.

⁵ Witin nani Suf tasbaya kat balan ba ra, Saúl ai albika ra win: —Kaisa mahka kli tawaia, yang lukisna papiki ba nanara yawan wan dukiara kau trabil taki lukisa, biriku mairin nani tiwan ba dukiara uya lukras.

⁶ Albika pana win: —Naha tawanka ra prapit kum nâra sa, upla sut mita witin ba tara kulkisa, kan diara sut witin aisi ba ai bîla win ba kat takisa. Kaisa bâra waia, ban kra witin wan wibia bara wan yabalka ba wan marikbia.

⁷ Saúl bila: —Ban kaka, kaisa yawan bâra waia. Sakuna, ¿yawan prapit ra prisantka yabaia dukia dîa brisa? Nanara yawan brit pan âpu, prisant yaia dukia diara kum pan âpu.

⁸ Alba ba pana win: —Silbar mâ sirpi kum yang brisna, baha yawan prapit ra yaia, bara baku witin wan wibia wan yabalka waia ba dukiara.

⁹ (Blasi pali piua lika, Israel luhpia nani kum Gâd wina diara tânka kum walan dauki kan ba ra, witin nani aisin: “Kaisa yawan diara kakaira ra waia”; baha sika nanara “Gâd prapitka wi ba”, bara witin ba sika blasi “diara kakaira” mâki kan ba.)

¹⁰ —Baku kabia —Saúl win—. Kaisa yawan bahara waia. Witin wâl impakan Gâd prapitka bâra ba tawanka ra waia.

¹¹ Tawan ra dimaia ilka uli auya kan ba ra, tiara nani tawan ba wina lî panhkaia taki aula kan ba aikuki prawan, bara baha nani ra makabi walan: —¿Diara kakaira ba wal yang nani nâra prawamna sa ki?

¹² Mairka nani pana witin nani ra win: —Âu, sakuna kau bukra wal prawma. Isti was, naiwa tawan ra upla nani ba sakripais daukaia watla ra sakripais daukaia sa, bara witin bahara aula.

¹³ Man nani bâra wama ba wal, witin ba pliks, sakripais daukaia watla ra plun piaia kau waras ba ra. Upla nani plun ba pibia apia witin wabia ba kat, kan witin mita pata ba yamni munisa, baha daukbia ba ningkara paiwan uplika nani ba sin pibia. Bara nanara pali man nani mahka was, witin kau bâra kaka wal prawaia sip sma.

¹⁴ Witin nani takaskras ban impaki kan tawan ra dimaia. Bara witin nani auya kan ba yabalka ra, Samuil sin pat taki aula kan sakripais daukaia watla ba ra waia.

¹⁵ Saúl kau balras kan ba yua kainara, Dawan bui Samuil ra pat marikan kata naha tânka dukiara:

¹⁶ “Yauhka, sim naha awarka, waitna kum man ra blikamna Benjamín tasbaya wina, man bui witin ba batana ni laikma, yang upliki Israel luhpia nani wihtka kaia, witin bui witin nani ba filisteo nani karnika ba wina dakbi sâkbia, yang sin upliki nani kupia lukra ba wal sna, ai inanka nani ba yang kat uli wan bamna.”

¹⁷ Samuil bui Saúl ba kang kaikan ba ra, Dawan mita witin ra win: “Baha sika waitnika ba, witin ai dukiara sika yang nani wîri ba. Witin sika yang upliki nani wihtka aimaki kabia.”

¹⁸ Tawan ra dimaia getka bîla kat diman ba ra, Saúl bui Samuil lama kat dimi bara makabi walan: —Pliskam pali, diara kakaira waitnika ba anira iwisa kaka ai wis.

¹⁹ Samuil pana win: —Yang sika diara kakaira ba; bal tâiura uli wap purara, plun piaia pat wan bîla kaikisa. Man naiwa yang wal plun pima, bara diara nani tânka makabi walaia brin mai dauki ba dukiara lika, yauhka titan mai wimna, ba ningkara mai blikamna.

²⁰ Birikukam nani tiwan pat yu yumhpa bri ba dukiara lika sari bripara, baha nani lika pat sakan sa. Sakuna Israel luhpia nani diara kum kau tara pali brin dauki ba sika, man bara wamtla uplika nani ba sut sin.

²¹ Saúl bila pana win: —¡Sakuna yang lika Benjamín kiamka wina sna, Israel kiamka nani tila wina kau sirpi ba! Baha purkara, Benjamín kiamka aiska tilara yang taiya nani ba kau maura lupia sa. ¿Bara nahki baha bîla nani yang ra ai wima?

²² Bamna Samuil bui Saúl bara ai albika sin brin, bara rum bîla ra bri si tibil pliska kau tara ba lamara yan iwan, upla 30 pura pat paiwan nani ba bâra iwi bîla kaiki kan ba tilara.

²³ Bara Samuil bui kuk waitna ba ra win: —Wîna pîs kum suni swiaia maikatna ba, nanara bri bal.

²⁴ Kuk ba aihni pali wan, kuhma wîna aiska ba sakan bara Saúl mawanra kahban. Bara Samuil bila win: —Saki suni swiri kan ba nanara mamwanra kahban sa. Bamna brih pis, kan yang bui suni swiri kan man pima wisi. Naiwa yua yawan aikuki naha pata piaia dukiara upla nani paiwri. Baha yua Saúl ba Samuil wal iwi plun pin.

²⁵ Bara pura pliska holi ba wina tawan mâyara bal iwan ba ra, utla bahna ra krikri kum palkan kan Saúl dukiara,

²⁶ bara Saúl mahka yapan. Titan ra Samuil bui Saúl ra winan witin kau buras kan bamna: —Bus bara yabalkam ra impaks. Saúl buan bara witin nani wâlsut tawan yabalka ra taki wan,

²⁷ bara tawan tara wina mahka yabal langni ra taki wan ba ra, Samuil bui Saúl ra win: —Albikam nani ra wis tâura wabia, bara man wiria takasks, Dawan diara ai win ba mai wiaisna bamna.