1 Samuil 7 - DAWAN BÎLA AISKA

¹ Bamna Quiriat-jearim uplika nani ba Dawan lâ auhbaia watla ba brih wan, bara Abinadab watla ra dingkan, baha lika il kum ra kan; baha ningkara ai luhpia waitna Eleazar ba yamni munan bara ark ba ai mihta ra mangkan main kaiki kaia.

Samuil wihta mangkan ba

² Mani 20 Dawan lâ auhbaia watla ba Quiriat-jearim ra takaski bri kan, bara baha piua sut ra Israel luhpia nani Dawan ra ai hilpka makabi pliki kan.

³ Bahamna, Samuil Israel luhpia nani sut ra win: “Man nani kupiam aiska kira kli Dawan ra tawma kaka, tringsar nani gâdka Astarté ba kli tilam wina saki lulkma, rayakam nani Dawan ra yama bara Dawan ra baman mayuni kama kaka, baku lika filisteo nani karnika wina dakbi mai sâkbia.”

⁴ Bara Israel luhpia nani gâd bahki nani lilka Baal bara Astarté nani bri kan ba saki lulkan, bara Dawan ra baman mayuni dukia daukan.

⁵ Baha ningkara Samuil bila win: “Israel luhpia nani sut Mispá ra asla dauks, bahara yang bui man nani tâmwan Dawan ra puri sunamni.”

⁶ Israel luhpia nani Mispá ra aidruban, bara lî panhki Dawan mawanra tasba ra laikan, prisant kum yabi ba natka kat. Baha yua witin kaiki plun piras, bara ai saurka Dawan mapara daukan ba dahra aisi sakan. Baha yua wina Samuil sin Israel luhpia nani wihtka aimakan.

⁷ Filisteo nani walan Israel luhpia nani ba aidrubanka tara dauki kan Mispá ra. Bara wihtka nani matsip ba witin nani mapara aiklabaia taki wan. Israel luhpia nani baha sturka walan ba ra, sibrin takan,

⁸ bara Israel luhpia nani Samuil ra makaban: “Yang nani tâiwan puram suni takaskpara, filisteo nani mihta wina Dawan bui yang nani swaki ai sâkbia.”

⁹ Sîp lupia kum kau tiala di ba Samuil brin, bara aiska angki sakripais dauki, Israel luhpia nani tâwan Dawan ra makabi ai pura sunan, bara Dawan pana witin ra walan.

¹⁰ Samuil sakripais ba angki dauki kan ba ra, filisteo nani ba Israel luhpia nani lamara dimi wan iki tikaia; sakuna Dawan bui kasbrika pura wina alwani binka karna witin nani purara blikan, bara sirang tara iwi plapan, bara baku natka ra Israel luhpia nani bui pura luan.

¹¹ Bara aihni pali Israel luhpia nani filisteo nani nina bliki aiklabi, Bet-car lama mâya tani kat bri si swin.

¹² Baha ningkara Samuil walpa tara kum brin, bara mark kum kaia mangkan Mispá bara Sen wal bilka ra, bara nina ba Eben-ézer mâkata, kan witin bila: “Nanara kat Dawan hilp wan munan sa.”

¹³ Naku filisteo nani ba pura luan kata, bara witin nani kli baku Israel luhpia nani tasbaya mapara dimi waras kan; Samuil raya kan ba piua nani sut ra Dawan filisteo nani mapara karna kan.

¹⁴ Tawan nani sut Ecrón wina Gat kat filisteo nani mita Israel luhpia nani wina dakbi brin kan ba, Israel bui kli sut dakbi brin bara kli Israel luhpia nani tasbaya takan. Naku natka ra ai tasbaya nani sut filisteo nani karnika wina pri sakan, bara kupia kumi lâka amorreo nani Israel luhpia nani wal aikuki bri kan.

¹⁵ Samuil ai yua nani sut ra, Israel luhpia nani wihtka aimaki kan.

¹⁶ Mani bani witin taki wi kan Betel ra, Guilgal ra, Mispá ra sin, bara upla nani lâka dauki kan.

¹⁷ Ba sut taukan ba ningkara, witin kli ai watla Ramá ra bali kan, bahara sin Dawan altarka paski bri kan. Baha wina Israel luhpia nani sut lâka dauki kan.