1 Samuil 29 - DAWAN BÎLA AISKA

Filisteo nani Debit ra kasak lukras ba

¹ Filisteo nani ai aiklaklabra nani sut Afec ra asla daukan. Israel luhpia nani Jezreel laya kârma lama kat takaskan.

² Filisteo war wihtka nani ba ai daknika tara bara dakni sirpi nani ra taki balan, ningkara Debit ai uplika aikuki Aquís wal taki balan.

³ Bara filisteo war wihka nani Aquís ra makabi walan: —¿Naha Hibruka nani na, nâra dîa daukisa? Aquís pana witin nani ra win: —Naha na Debit, Saúl Israel kingka wihtka tara kata ba. Witin ba yang wal pat piu wihka takaskisa, baha yua wina naiwa kat ai swakwanka kumi sin yang kaikras.

⁴ Sakuna filisteo war wihtka nani ai kupia sauhki, Aquís ra win: —Wis yawan aikuki war aiklabaia waia apia, ai tawanka yaram ba ra kli tawi wabia; ban kra witin war aiklabi ba tilara wan waihla takbia, wan suldiarka nani lal na bri si ai dawanka ra mariki wal kli wapni takbia.

⁵ Naha Debitka na dukiara sika mairin nani dans puli aiwanan ba: ‘¡Saúl bui 1,000 waitna nani ikan, bara Debit lika 10,000 ikan’!

⁶ Bara Aquís bui Debit ra tawi win: —¡Dawan raya sa, baha ba kasak sa, man ba waitna wapni kum sma! Kiamp ra man nahki diara dauki kapram ba yang yamni pali kaikri. Man bal ai kaikram ba yua wina yang lika man wina diara watawi kumi sin kaikras. Sakuna filisteo war wihtka nani man ra pain lukras sa,

⁷ baha mita man âmyapah kli tawi was, witin nani yamni kaikras ba dukia ban daukaia apia ba mata.

⁸ Debit pana win: —¿Yang dîa daukri? ¿King tara ba dîa ai kaikan kan ba tâwan, ai swin ai waihla nani mapara aiklabaia waras?

⁹ Aquís pana win: —Yang kasak daira walisna man lika Gâd insalka kum baku yamni sma. Sakuna filisteo nani war wihtka nani ba aitani lukras sa man sin war ra dimaia.

¹⁰ Baha ba mita, man bara ai dawanka dukia dadaukra nani sut man wal balan ba, yauhka titan ingwi takbia ba ra mahka kli tawi impaki banhs.

¹¹ Baku bamna, Debit ai uplika nani aikuki yua wala titan pali buan bara filisteo tasbaya ra tawi wan, bara filisteo nani lika Jezreel tani ra kau dimi wan.