1 Samuil 26 - DAWAN BÎLA AISKA

Debit bui Saúl ikras swin

¹ Zif uplika nani Guibeá ra wan Saúl kaikaia, bara witin ra wi banhwan: “Haquilá ilka ra Debit yukuwisa, upla iwras tasbaya mawanra.”

² Bamna Saúl lika aiklaklabra kau pain nani ba Israel wina 3,000 brih impakan, bara Zif ra wan Debit pliki.

³ Haquilá ilka ra ai kiampka bapan, twi tasbaya wal bailka ba kat. Sakuna Debit twi ra bâra kan ba, ai dara walan Saúl ba kat ai nina bliki wan ba,

⁴ bara biki kakaira nani blikan wan, Saúl ani kat dimi wan ba kaikaia.

⁵ Ba ningkara Debit ba Saúl kiampka ba kat wan bara kaikan Saúl yapi kan, Abner, Ner luhpia ba sin, witin lika Saúl suldiarka kiaptinka ba. Saúl lika lila kat ai suliarka ba ai kaina kir yapi banhwi kan.

⁶ Bara Debit ba Ahimélec hitita ba wal aisin, Abisai wal sin, baha lika Seruiá luhpia bara Joab muihnika, bara witin nani ra makabi walan: —¿Man nani wâl sma na, ya ridi sma Saúl kiampka ra waia yang wal? Abisai win: —Yang lika man wal wamna.

⁷ Baha tihmia Debit bara Abisai wal, Saúl kiampka ra wan. Saúl yapi kan kiamp ba kat, ai lal lamara ai langsika ba bahara bapan kan. Abner ai daknika ba wal ai kaina kir aitniki kan.

⁸ Bara Abisai bui Debit ra win: —Waihlam na naiwa Dawan mihtam ra mangkan. Yang ra ai swis, aima kumi ba aitani, ai langsika ba ni tasba wal sabi swimna. Baha ba wal aitani kabia.

⁹ Sakuna Debit pana witin ra win: —Ikpara, kan Dawan bui bâk saki king mangkan uplika ba ya bui ikuya uplika ba, klala yaras lika swibia apia.

¹⁰ Dawan nina ra yang swer aisisni, witin bui rayaka ba sâkbia, ai piua balbia bara prubia, apia kaka war aiklabi prubia.

¹¹ Dawan swaki ai sâkbia, witin bui saki king mangkan kingka ra ikaia lukri ba. Bamna ai langsika, ai laya watla ba sin bris bara kaisa mahka wap.

¹² Baku natka ra Debit bui langsika bara laya watla ba sin Saúl lal lamara kan ba brin, bara wi banhwan. Upla kumi sin witin nani ra kaikras, walras; upla kumi sin rawras kan, sut pali ba yapi kan, kan Dawan bui witin nani purara yapan wirha kahban.

¹³ Baha ningkara Debit ba twi langni baila wala ra lui wan, il purara wiria ilihwi takan. Witin bâra kan ba lilapas ra plis tara kum takaskan.

¹⁴ Bara Debit ai bîla baikra karna winan Abner ra bara aiklaklabra nani ra sin: —¡Abner, pana ai aisas! Abner pana aisin: —¿Man ba yamna bara king ra kisbaia?

¹⁵ Debit bui witin ra win: —¿Waitna tarka tara kumi Israel ra bâra ba, man apia ki? ¿Dîa kan man dawankam king ba kan kahbras sma? Upla kum tawan wina bal diman, witin ba ikaia lukanka ba wal.

¹⁶ Man daukankam ba yamni apia sa. Dawan nina ra swer takisna, man nani pruaia ba aitani sa, man nani dawankam kan kahbras kapram, Dawan bui bâk sakan kingka ba. ¡King langsika ba, laya watla ba sin lal lamara kata ba pliki kaiks, sâkma sapa!

¹⁷ Saúl bui Debit bîla baikra walan ba ra, karna winan: —¿Luhpi Debit, man sma ki, yang ra aisi ba? Debit pana win: —Âu, king, yang sika.

¹⁸ Sakuna, ¿king ba dîa muni kau ban ai dukia dadaukra ba nina blikisa? ¿Dîa daukri? ¿Dîa saurka pali yang daukri?

¹⁹ Yang bui king ra puri sunisni, man albikam aisinka na wals: Dawan bui king ba yang maipara blikisa kaka, prisantka kum yabrika bribia kaka lilia kamna; sakuna waitna bui daukisa kaka, Dawan bui lahtubia. Kan nanara Dawan tasbaya wina saki ai lulkan, bara baku plaitukbisa gâd bahki nani dukia daukaia.

²⁰ Dawan mamwan wina laihura upla wala tasbaya ra yang tâilia laikan kaia ba brin ai daukras, ¡sakuna king ba pisa kum pliki taukisa, bara kwamu pliki tauki baku il nani ra nini bliki taukisa!

²¹ Bara Saúl win: —¡Luhpi Debit, saurki ba lata kaikisni! ¡Yang sinskas kum baku wataukisna, swakwanki ba tara sa! Sakuna kli tawi bal, yang kli saura mai munaia plikamna apia. kan naha yua pali ra mairikisma man bui yang rayaki ba kulkisma.

²² Debit pana win: —King tara langsika ba nâra sa. Albikam kum bal brih wabia,

²³ upla kumi bani mana ba Dawan wina aibapbia, ai lâka kasak wapni kunin âpu ba tânka kat. Dawan bui king tara ba naiwa mihti ra mangkan kan, sakuna witin bui bâk saki mangkan kingka ra mihti bukaia ba brin ai daukras kan.

²⁴ Naiwa baku yang bui king tara rayaka ba kulkanka yâri ba, baku sin Dawan bui yang rayaki ba kulkbia, bara kupi wirha taiban lâka wina pri ai sâkbia.

²⁵ Bara Saúl karna inan: —¡Yang luhpi Debit, yamni pali kama! ¡Diara tara nani man tâ krikma, bara diara sut daukisma ba yamni takbia! Baha sut ningkara, Saúl ai watla ra tawi wan, bara Debit sin ai yabalka ra wan.