1 Samuil 24 - DAWAN BÎLA AISKA

¹ Bara Saúl filisteo nani wal aiklabi si kli tawi balan ba ra, sturi walan Debit En-gadi upla iwras tasbaya ra sa.

² Bamna Saúl waitna 3,000 Israel wina brin bara wan Debit bara suliarka nani ra pliki alkaia, walpa tara witni nani ba tilara.

³ Ai yabalka ra sîp klarka nani ra wan, baha nani lamara walpa unta kum bâra kan, Debit ai uplika nani sut aikuki pat dimi bâra kan ba kat. Saúl sin baha kat dimi tâski iwaia dukiara,

⁴ bara Debit waitnika nani bui naha ra win: —Dawan mita man waihlam nani mihtam ra mangkaia win ba, baha pramiska ba naiwa aimakan. Nanara man sip sma dîa daukaia lukisma ba witin nani ra daukaia. Debit buan bara kwasi wih, Saúl prâka tara ba wina pîs kum klaki brin;

⁵ sakuna baha daukan ningkara, Debit kli ai lukanka ra latwan yan,

⁶ bara ai uplika nani ra win: —¡Dawan pâtki swih tikbia, dawanki king mapara mihti bukri ba! ¡Âu, witin ba king, Dawan mita witin ra bâk sakan sa!

⁷ Debit baha dauki baku aisin ba natka ra ai uplika nani Saúl ra saura munaia luki kan ba wina takaskan. Bara Saúl walpa unta wina taki, ai yabalka ra wan.

⁸ Baha ningkara Debit sin walpa untika ba wina bal takan bara Saúl nina bliki wan, bara witin ra winan: —¡King tara, King tara! Saúl ai ninara tawi kaikan, bara Debit tasba kat ai mawan ra bawi, yamni kulkanka tukinka ba dauki yan,

⁹ bara witin ra win: —King tara ba, ¿dîa muni baha uplika nani aisi ba ra walisa, witin nani wisa yang bui king ra saura munaia plikisna?

¹⁰ King tara ba nâra laki kaikaia sip sa, walpa unta ra Dawan mita naiwa king ba mihti ra mangkan kan, sakuna yang bui ikaia brinki apia kan, ikras ban swiri bara ai rayaka ra kangbras. Yang kupi ra wîri, king tara ba king sa, Dawan bui bâk saki mangkan.

¹¹ “Mihti ra diara brisna na, king ba pain pali kaikbia: naha na king tara prâka tara ba pîska kum sa, yang sip kapri mai ikaia. Naha wal king tara ba tânka bribia, yang bui witin ra saura munaia bara waihla mihta ra mangkaia plikras sna ba, baha swakwanka sin yang daukras. Ban sakuna, king tara ba nini bliki taukisa rayaki tikaia.

¹² ¡Dawan bui yawan wal wan lâka ba daukbia, witin bui king ra pana munbia! Yang bui daukaia sna ba lika, mihti bukamna apia pali king tara ba mapara.

¹³ Wan damika nani aisinka kum ba naku wisa: ‘Watawika lâka ba, watawikira nani wina sa’; ba mita yang pali lika king tara ra mihti bukamna apia.

¹⁴ Baha purkara, ¿Israel kingka ba, ya ninara taki wan? ¿Ya nina bliki taukisa? ¡Yang ra, yang lika yul pruan kum sna ba, pisa kum baku!

¹⁵ Baku bamna, yawan wâl wan lâka na Dawan bui luki kaiki wapni daukbia, witin pliki kaikbia pâtka nani ba king mawanra tâiwan aiklabia.

¹⁶ Debit aisi swin ba ra, Saúl alai winan: —¡Man pali sma ba, luhpi Debit, ai aisisma ba! Bamna Saúl mahka inan,

¹⁷ bara win: —Yamni daukaia lâka ba man wal sa, saura ba maikri, baha watlika ra yamni ba aikisma.

¹⁸ Naiwa man bui yang ra mairikisma, man ba yang ra yamni kaia plikisma, Dawan mita mihtam ra ai mangkan, sakuna man ai ikras kapram.

¹⁹ Kasak pali, upla kumi sin âpu sa ai waihla ba wal prawi sanska brin ba ra, diara munras yamni swika waia. ¡Baha ba mita, yamnika yang ra daukram ba mana, Dawan bui yamnika ni mana maikbia!

²⁰ Nanara yang kasak pali daira walisna man ba king kama, man yabalkam auma bâk Israel kingka lâka ba pâwi tara takbia.

²¹ Dawan nina ra yang ra swer taks, yang kiamki nani ba âpu daukma apia, yang nini ba sin taiya nani kupia wina diki sâkma apia.

²² Debit bui Saúl ra swer takan, bara ningkara Saúl king watla ra tawi wan, bamna Debit sin ai uplika nani wal kan kahbaika pliska ra kli wan.