1 Samuil 22 - DAWAN BÎLA AISKA

¹ Debit baha wina taki plapi Adulam walpaya unta ra wih diman. Ai muihni nani bara ai taya nani ai sturka walan ba ra, baha nani witin ra wan aikuki asla takaia.

² Taiban uplika nani, tras tara bri kan nani, rarangbra nani sut asla takan witin wal, bara Debit lika witin nani kiaptinka aimakan. Debit wal tauki waitnika nani lika 400 lama kan.

³ Baha wina Debit Mispá ra wan, Moab tasbaya ra, bara Moab kingka ra win: —Man ra puri sunisni papiki bara yaptiki sin man wal nâra takaski kaia, Gâd bui yang wal dîa daukaia ba ai wibia daira walamna ba kat.

⁴ Bara baku Debit ai papika bara ai yapti sin Moab kingka ra brih wan, bara witin nani king wal iwi kan Debit kan kahbaika pliska ra kan piua sut ra.

⁵ Bamna prapit kum nina Gad, Debit ra kupia kraukanka kum yan: —Man nâra kan kahbaika pliska ra yukuwi ban kapara. Yabal ra taks bara Juda tasbaya ra was. Baku bamna, Debit lika Héret untika ra wan.

Nob prîska nani ba iki tikan

⁶ Bara ban kan, Saúl lika Guibeá ra kan, prias watla latka ra tamarisku dusa distika ra iwi kan, bara ai langsika ai mihta ra bara wihta tara nani sin kutbi bri kan. Bara ai tânka brin taim, Debit ba ai waitnika nani wal pat witin bâra pliska ba kir laki kaikan kan.

⁷ Saúl wihta tara nani ra win: —Benjamín waitnika nani, yang ra wals: ¿Man nani lukisma Jesé luhpia ba tasbayam bara wainkam nasla nani maikbia, bara man nani sut sin wihta tara nani, kiaptin nani mai mangkbia ki?

⁸ Man nani sut yang maipara buram, man nani wina kumi sin yang ra ai wiras kapram luhpi ba Jesé luhpia wal lâ kum daukan ba; man nani kumi sin yang dukira trabil taki lukras, kumi sin ai wiras luhpi maipara tawan ba, bara hilpiki kan ba bui ai ikaia aihwakisa, nanara dauki ba baku.

⁹ Bamna Doeg, Edom wina ba, Saúl wihtka tara nani tilara bâra bûi kan ba, naha bîla nani aisi witin ra win: —Jesé luhpia ba yang kaikri Nob ra wan Ahimélec wal aisaia, witinka lika Ahitub luhpia ba.

¹⁰ Debit dukiara Ahimélec Dawan ra makabi walan, bara witin ra plun yan, filisteo Goliat sordka ba sin.

¹¹ Bara king ba Ahimélec paiwan, Nob prîska wala nani sin sut baha nani witin ai taya nani kan ba, sut king mawanra bri balan.

¹² Bara Saúl Ahimélec ra win: —Ahitub luhpia, yang ra pain ai wals. Ahimélec pana win: —King, yang lika man kat mai walisna.

¹³ Saúl witin ra makabi walan: —¿Dîa muni man Jesé luhpia wal maipara buisma? Man bui witin ra brit yaram, sord sin kum, bara Dawan wal sin aisi Debit dukiara tânka plikram, witin bui yang maipara buaia bara ai kutbi kir ikaia plikisa nanara.

¹⁴ Bamna Ahimélec pana king ra win: —King, ¿man wihtkam nani tilara Debit baku wala kum kau kasakkira bâra sa ki, baha purkara witin sin king dapnika, king watla bilara wihta main kaiki ba, yamni pali kulkan lâka sut bri ba?

¹⁵ ¿Yang naiwa kat witin ai tânka pliki Dawan wal aisisna ki? ¡Baku apia! Baha mita, king ai dukia dadaukra mapara bara ai taya nani mapara sin dahra kwahkbiara, kan man albikam lika diara wiria, diara uya tânka sin briras sa.

¹⁶ Sakuna king bui witin ra taibi munan: —¡Ahimélec, kasak damra wali bas, man bara tamya nani sut pruaia sma!

¹⁷ Bara king bui witin ra main kaiki, ai lamara bûi nani ra adar yan: —¡Dawan prîska nani ba iks! Witin nani sin Debit wal sa, witin nani kaikan Debit plapi kan ba, sakuna yang ra ai wiras kan. Sakuna king main kakaira nani ba, Dawan prîska nani mapara ai mihta bukaia wilin apia kan.

¹⁸ Baku bamna, king ba tawi Doeg, Edom wina ba ra win: —¡Man bui witin nani ba iks! Doeg prîs nani mapara dimi wan, bara baha yua linin kwalka prâka dimi kan nani ba 85 ikan.

¹⁹ Baha ningkara Nob ra diman, prîs nani tawanka ra waitna, mairin, tuktan bara bibi swap luhpia nani sut sord ni ikan. Baku sin bîp wainhka nani, biriku nani bara sîp nani sin ikan.

²⁰ Sakuna Ahimélec luhpia waitna kumi nina Abiatar, upla iki kan ba tila wina swakwi plapi swak takan ba, Debit ra wan.

²¹ Bara Saúl nahki Dawan prîska nani sut ikan ba win,

²² bara Debit pana win: —Yang pat daira wali kapri baha yua Doeg bâra kan ba kaikri bara pat lukri kan, witin Saúl ra wih baha sturka ba wibia. Tamya nani sut pruan pâtka ba yang purira sa.

²³ Sakuna yang wal nâra bas, si bripara, mai ikaia lukan ba, yang ra sin ai ikaia brin daukisa. Sakuna man lika yang laimara swakwaikam brisma.