1 Kronikas 4 - DAWAN BÎLA AISKA

Juda kiamka nani

¹ Juda luhpia nani ba sika Fares, Hesrón, Carmí, Hur bara Sobal.

² Sobal luhpia Reaías ba Jáhat aisika kan, bara Jáhat ba Ahumai wihki Láhad wal aisika kan. Bamna naha nani sika soratita nani kiamka kan ba.

³ Hur luhpia nani kan ba sika Etam, Jezreel, Ismá, Idbás, Penuel, Guedor aisika kan ba, bara Éser, Husá aisika kan ba. Naha nani ai lakrika kumi bri kan nina ba Haslelponi.

⁴ Naha nani sika Hur luhpia nani, witinka lika Efrata luhpia waitna tawahkia ba, Betlehem aisika kan ba.

⁵ Tecoa aisika Ashur ba mairin wâl bri kan: Helá bara Naará wal.

⁶ Naará ba Ahuzam yaptika, baku sin Héfer, Temení bara Ahastarí. Naha nani sika Naará luhpia nani kan ba.

⁷ Helá luhpia nani ba naha nani kata: Séret, Jesohar bara Etnán.

⁸ Cos ba sika Anub bara Sobebá aisika bara Harum luhpia Aharhel kiamka nani ba sin.

⁹ Upla nani bui Jabés ra kau kulkanka lâka yabi kan muihnika nani ba wal, baha mita yaptika bui nina Jabés mâkata, kan witin bila: “Kasak pali latwan uya wauhri ba mita witin ba baiki sakri.”

¹⁰ Jabés Dawan ra ai pura suni, naku win: “Mamkabisna yamni ai munma bara sin tasba pîs tara kum aikma, hilp ai muns bara saura wina swaki ai sâks, baku mika yang pât wahwamna apia.” Bara dîa makaban ba kat Dawan bui yan.

¹¹ Quelub, Suhá muihnika ba, Mehír aisika kan; Mehír ba Estón aisika kan;

¹² Estón ba Bet-rafá aisika kan, baku sin Paséah bara Tehiná aisika, witin lika Nahas tawanka papaskra ba. Bara naha nani sika Recá ra iwi kan uplika nani ba.

¹³ Quenaz luhpia nani kan ba lika Otoniel bara Seraías. Otoniel luhpia nani ba lika Hatat

¹⁴ bara Meonotai, Ofrá aisika. Seraías ba Joab aisika kata, Harasim twaya bîla ra iwi nani ba damika kata, witin nani ba ai mihta warkka dadaukra kata.

¹⁵ Caleb luhpia nani ba, witinka lika Jefuné luhpia ba, naha nani kata: Ir, Elá bara Náam. Elá ba Quenaz aisika kata.

¹⁶ Jahaleel luhpia nani ba naha nani kata: Zif, Zifá, Tirías bara Asarel.

^17-18 Esdras luhpia nani ba sika: Jéter, Méred, Éfer bara Jalón. Méred ba king fero luhpia mairin Bitiá wal marit takan, bara naha sika ai luhpia nani ba: Meri, Samai bara Isbah, witin ba Estemoa aisika. Méred ba Juda kiamka wina mairka kum wal bri kan, witin ba Jéred yaptika kan, witinka lika Guedor aisika, baku sin Héber aisika, witin ba Socó aisika, bara Jecutiel aisika sin, witin ba Zánoah aisika.

¹⁹ Hodías maya mairin luhpia nani ba, Náham lakrika, Queilá aisika ba, Daliá garmita kata ba, bara Estemoa Maacat wina ba sin.

²⁰ Saiman luhpia nani ba naha nani kata: Amnón, Riná, Ben-hanán bara Tilón. Isí luhpia nani ba lika Zohet bara Ben-zohet.

²¹ Selá kiamka nani ba, witinka Juda luhpia ba, naha nani kata: Er, Lecá aisika ba, Ladá, Maresá aisika, baha kiamka nani ba linin warkka dauki kan Bet-asbea ra,

²² Joaquim, Cozebá ra iwi nani ba, Joás bara Saraf, baha nani ba wih Moab mairka nani wina ai maya brin, ningkara kli Betlehem ra tawi balan, baha ba patitara ulbanka nani ra sa.

²³ Baha nani ba slaubla ni diara papaskra kan; witin nani Netaim bara Guederá ra iwi kan, bara king warkka dauki banhwi kan.

Simian kiamka nani ba

²⁴ Simian luhpia nani ba naha nani kata: Nemuel, Jamín, Jarib, Zérah bara Saúl.

²⁵ Saúl ba Salum aisika kata; Salum ba Mibsam aisika kan, bara Mibsam ba Mismá aisika kan.

²⁶ Mismá ba Hamuel aisika kan; bara baha luhpa ba Zacur, bara Simí ba baha luhpa kata.

²⁷ Simí ba luhpa waitna 16 bara luhpa mairin matlalkahbi brin; sakuna ai muihnika nani ba lika luhpa ailal briras kata, baku bamna ai kiamka nani ba ban ailal takras kan Juda kiamka ailal takan ba baku.

²⁸ Witin nani iwi kan Beerseba ra, Moladá, Hasar-sual,

²⁹ Bilhá, Ésem, Tolad,

³⁰ Betuel, Hormá, Siclag

³¹ Bet-marcabot, Hasar-susim, Bet-birai bara Saaraim. Naha tawanka nani ba sika witin ai tawanka kan Debit king aimakan ba kat.

³² Baha purkara kau tawan sirpi nani matsip sin bri kan: Etam, Ain, Rimón, Toquen bara Asán,

³³ naha tawanka nani tnaya kir tawan sirpi nani bâra kan ba kira ban Baalat kat. Naha tawanka nani ra sika iwi banhwi kan witin ai kiamka nani ba sut.

³⁴ Bara Mesobab, Jamlec, Josías, Amasías luhpia,

³⁵ Joel, Jehú, witin ba Josibías luhpia, witinka lika Seraías luhpia, bara naha lika Asiel luhpia kan;

³⁶ Elioenai, Jaacoba, Jesohaías, Asaías, Adiel, Jesimiel, Benaías,

³⁷ Zizá, Sifi luhpia kan ba, witin na Alón luhpia, witin na Jedaías luhpia, witin na Simrí luhpia, witin na Semaías luhpia kata.

³⁸ Naha uplika nani nina mâkan ba sika, kiamka bani bâra kan ba lalka nani kan. Baha nani kiamka ba ailal pali takan kan ba mita,

³⁹ witin nani ba Guerar twiya lalmika kat wan ai daiwra daknika nani ba pata pliki,

⁴⁰ bara baha kat twi raya pain ailal pali sakan, tasba pîs tara pain langni, bahara ris briaia pliska pain pali kan. Baha pliska ra kaina piua ra, Cam kiamka nani ba iwi kan,

⁴¹ sakuna Juda kingka Ezequías piua ra, naha nani pat nina mâkan ba aidrubi bal bahara iwi kan nani ra âpu pali sauhki tikan, utla papakni nani ra takaski kan nani ba sin sut sauhki tikan; baha nani tiwan ba watlika ra, witin nani iwaia wisi takaskan, kan twi sin pain bâra kan ba dukiara ai daiwra nani pata.

⁴² Baha purkara, witin nani ai tila ba wina, Simian kiamka ba wina waitna nani 500, Seír untika ra aidrubi wan; tâ bri kan nani ba sika Pelatías, Nearías, Refaías bara Uziel, Isí luhpia ba,

⁴³ bara Amalec uplika nani kau bâra iwi kan nani ba sut sauhki tikan. Baha yua ba wina bahara iwan naiwa ba kat.