1 Kronikas 29 - DAWAN BÎLA AISKA

¹ Baha ningkara aidrubanka aiska ra king Debit bui win: “Luhpi Salaman baman sa Dawan bui bâk sakan ba, witin wahma pali sa, mani kulki baman brisa, sakuna wark na lika tara pali sa, kan tempel ba upla dukia apia sa, sakuna baha ba Dawan dukia sa.

² Yang karniki aiska ni Dawan tempelka paskaia dukiara gul, silbar, bras bara ayan nani ridi daukri sa. Silak nani ba sabaia ra yus munbia dus ba diara nani dus ni daukaia dukiara, walpa sangni ba walpa sangni ni daukaia dukiara, walpa manakira ba walpa manakira ni daukaia dukiara, walpa siksa nani ba diara nani walpa siksa ni daukaia dukiara, bara walpa manakira sât sât ba bara walpa pihni lipi ba sâtka sin ailal pali ridi daukri sa.

³ Baha sut purkara, tempel ba dukiara diara nani brisna tilara, Dawanki tempelka ra latwan kaikisna ba mita, yang pali bui sin ba dukiara yabisna gul bara silbar mani:

⁴ gul ba 115 ton, silbar ba 265 ton bara gul sâtka wala sin, baha sut ba ni tempel tnaya aiska ba prakaia dukiara.

⁵ Gul ba ni diara nani gul wal dauki nani daukaia, silbar ba diara nani silbar wal daukaia dukiara, bara wark nani wan mihta wal daukaia dukiara sin yâri. ¿Bamna ya naiwa Dawan ra ai kupia aiska ni diara yabaia lukisa ki?”

⁶ Bamna utla pamali lalka nani ba, Israel luhpia nani lalka nani ba, war aiklaklabra daknika tara nani lalka nani ba, daknika sirpi lalka nani ba bara king nasla nani pura kakaira nani ba, ai kupia aiska ni diara prisant sal yaban.

⁷ Dawan tempelka warkka ba daukaia dukiara yan gul 165,000 kilo bara gul mâ 10,000, silbar 330,000 kilo, bara bras lika 600,000 kilo, bara ayan sin 3,300,000 kilo nani.

⁸ Ya ya nani walpa manakira nani bri kan ba sin yan tempel watla ba dukiara, baha ba Jehiel, Guersón kiamka ba mihta ra kan.

⁹ Bamna upla nani ba lilia takan kan upla nani ailal ai kupia aiska ni diara yan bamna, upla nani ba Dawan ra ai prisantka yan. King Debit sin uya lilia takan.

¹⁰ Baku bamna, Debit bui Dawan ra sin yamni pali win, upla nani sut mawanra, naha bîla nani aisi: “¡Dawan, yamni pali kama, wan aisika Israel Dawanka sma ba!

¹¹ ¡Dawan, man dukiam sa tara kulkan lâka ba, karnika ba, prana ba, pura luan lâka bara king lâka ba sin! Kan kasbrika purara diara nani bâra ba, bara tasba ra bâra ba sut ba sin man dukiam atia sa, king lâka ba man dukiam sa, bamna man Dawan sika sut purkara sma.

¹² Yuyakira lâka ba bara prana ba sut lika, man wina aula sa, man karnikam mununhtara aiska brisma, man mihtam ra sa, karnika bara sip lâka ba sin, man mihtam ra sa karnika lâka bara diara sut ra karnika yaia ba.

¹³ Bamna nanara wan Dawanka, yang nani aiwani mamyuni ninam ba prana dauki banhwisna,

¹⁴ ¿kan yang na ya, bara upliki nani ba sin ya kan, baku sip kan ba man ra ai kupia aiska ni diara maikaia? Bamna diara sut ba man dukiam sa, man wina dîa wankram ba wina man ra maiki banhwisna.

¹⁵ Yang nani na man mamwanra upla tringsar bara mai kakaira sin apia, wan aisika nani wal baku; naha tasba purara yang nani rayaki ba dista kum baku sa, bîla kaikanka âpu pali.

¹⁶ “Bamna Dawan, wan Gâdka, naha diara ailalka yang nani asla daukri na man wina baman sa, baha dukia nani wal yang nani tempel kum man ninam ra daukaia dukiara nâra banhwisni; baha sut ba man wina sa bara man dukiam sa, bara man ninam ra tempel ba mâkbia.

¹⁷ Dawanki, yang kaikisna man upla kupia tânka pliki kakaira sma, bara kupia wapnikira ba man yamni kaikisma; baha mita yang kupi wapnikira ni naha diara nani na maikri sa, bara nanara man uplikam nani nahara asla taki banhwan na, liliakira pali wal diara maikan sa.

¹⁸ Dawan, almukki nani Ebraham, Aisak bara Israel Gâdka, naha man uplikam nani ai kupia wilinkira lâka bri ba ban kaia ra bris, bara yarka ai kupia ba man kat wapi kabia.

¹⁹ Baku sin luhpi Salaman ra kupia wapni kumi yas, baku mika man lâmka nani ba alki bri kabia, man witniskam bîla nani dîa lâ nani aisi mangkram ba sin, bara baha nani sut ba sin dauki kabia, bara tempel watla ba mâkbia, baha dukiara yang diara nani sut asla daukri ba.”

²⁰ Ningkara Debit upla nani ra win: “Nanara Dawan Gâdkam ra yamni wis.” Bamna upla nani sut bui Dawan ai aisika nani papaskrika ra yamni win; ningkara ai lal makupi banhwan bara Dawan king ra sin mayunan.

²¹ Yua wala Dawan ra aiska angki kîa yamni nani yan, bîp wainhka 1,000, sîp wainhka 1,000, sîp lupia 1,000, bamna Israel luhpia nani sut diara bri ba wina yan, bara wain sin naha nani wina mana luha yan ai Dawanka ra.

²² Bamna baha yua ra di bara pi banhwan Dawan mawanra. Baha ningkara Debit luhpia Salaman ba kli aima wala ra king mangkan, bara Sadoc ba prîs mangkan.

²³ Bamna king Salaman ba, Dawan king iwaika ra iwan ai aisika Debit watlika ra, bara uya pali tara takan, Israel luhpia nani bui sin ai bîla wali kata.

²⁴ Bara tâ uplika nani, war aiklaklabra nani bara Debit luhpia nani sut bui witin ra tâ baikan.

²⁵ Bamna Dawan bui Israel luhpia nani mawanra, Salaman ba tara pali bukan kata, ai kingka lâka prana ba, witin ai kainara kau king wala nani ba briras kata.

Debit pruan ba

²⁶ Bamna Jesé luhpia Debit ba, baku king aimakan Israel aiska purara.

²⁷ Mani yawanaiska wâl Israel kingka aimakan, baha tila wina Hebrón ra mani 7 aimakan, bara Jerusalem ra lika mani 33.

²⁸ Almuk pali taki pruan, yuyakira bara pranakira kan. Bara ai luhpia Salaman ba ai watlika ra king aimakan.

²⁹ Debit dîa daukan ba tâura bara ninara, baha lika prapit Samuil, prapit Natán bara Gad sturi almuk nani ulban ba wauhkataya nani ra ulbi mangkan sa.

³⁰ Ai kingka lâka dukiara, ai karnika aiska bri kan ba, dîa dîa witin ra takan ba, Israel ra bara kuntri wala nani ra takan sturka ba sin.